«នៅមុនការប្រកួត ខ្ញុំបាននិយាយទៅ Gigi [Buffon] ថា គាត់បានឈ្នះពានជាច្រើន ជាពិសេសគឺឈ្នះជាមួយឪពុករបស់ខ្ញុំ។ ល្ងាចនេះ យើងត្រូវព្យាយាមឈ្នះរួមគ្នាឲ្យបាន»។ Federico Chiesa ដែលជាអ្នកស៊ុតបាល់បញ្ចូលទីគ្រាប់ទី២ ដែលនាំជ័យជម្នះ ២-១ លើ Atalanta បាននិយាយរៀបរាប់ប្រាប់ទូរទស្សន៍ RAI ក្រោយឈ្នះពាន Coppa Italia។

 

Gianluigi Buffon ជាអ្នកចាំទីដ៏ជោគជ័យនៅក្នុងប្រវត្តិសាស្ត្របាល់ទាត់អ៊ីតាលី ដោយឈ្នះ World Cup ជាមួយក្រុមជម្រើសជាតិកាលពីឆ្នាំ២០០៦ និងបានពានរង្វាន់ជាច្រើនក្នុងលីគអាជីព ដោយចាប់ផ្តើមជាមួយក្លិប Parma ហើយបន្តលេងឲ្យ Juventus បានជាង៦៥០ប្រកួត ក្នុងនោះ៥០៩ប្រកួតក្នុង Serie A មុននឹងផ្លាស់ទៅ Paris Saint-Germain។

 

Buffon បានវិលត្រឡប់ទៅកាន់ Juventus សារជាថ្មីនៅឆ្នាំ២០១៩ ដោយបានឈ្នះពាន Serie A កាលពីរដូវកាលមុន ហើយមានឱកាសលើកពាន Coppa Italia ជាលើកទី៦នារដូវកាលនេះ ដោយ១លើកជាមួយ Parma និង៥លើកជាមួយ Juventus។

 

Federico Chiesa បានលើកឡើងថា កីឡាករទាំងអស់នឹងមានការនឹករលឹក Buffon យ៉ាងខ្លាំង បន្ទាប់ពីវីរបុរសរូបនេះ បានប្រកាសពីការចាកចេញពីក្លិបនៅចុងរដូវកាល៕