នៅព្រឹកថ្ងៃទី២២ ខែឧសភា ឆ្នាំ២០២១នេះ សមត្ថកិច្ចបញ្ជូនសំណុំរឿង ម្ចាស់ក្លិបនិងបុគ្គលិជនជាតិចិន១១នាក់ទៅតុលាការ ក្រោយកម្លាំងសមត្ថកិច្ចបានចុះបង្ក្រាបកាលពីយប់ថ្ងៃទី១៨ឧសភា នៅខណ្ឌបឹងកេងកង រាជធានីភ្នំពេញ។ ការចុះបង្ក្រាបនេះ គឺឃាត់បានមនុស្ស៤៥នាក់ ក្នុងនោះមានភ្ញៀវ៣៤នាក់ ដែលភាគច្រើន ជាជនជាតិចិន វៀណាម ខ្មែរ ហើយមានម្ចាស់ក្លិបជនជាតិចិនម្នាក់ រួមទាំងបុគ្គលិកចិន១០នាក់។ សមត្ថកិច្ចក៏រកឃើញសារធាតុញៀនមួយចំនួនផងដែរ។ 
 

សូមជម្រាប់ថា អាជ្ញាធរសម្រេចផ្អាកដំណើរការអាជីវកម្មក្លិបកម្សាន្ត កន្លែងម៉ាស្សា ក្លិបហាត់ប្រាណ ជាដើម ចាប់តាំងពីមានការរីករាលដាលកូវីដ-១៩នៃព្រឹត្តិការណ៍២០កុម្ភៈមក ដើម្បីទប់ស្កាត់ឆ្លងរាលដាល។ លើសពីនេះ កាលពីថ្ងៃទី២១ឧសភា រដ្ឋបាលរាជធានីភ្នំពេញ ក៏សម្រេចមិនទាន់អនុញ្ញាតឲ្យអាជីវកម្មប្រភេទទាំងនេះ ដំណើរការរឡើងវិញនៅឡើយទេ បើទោះបីបំរាមគោចរត្រូវបានបិទបញ្ចប់ក៏ដោយ។ 
 

លោក ឃួង ស្រេង អភិបាលរាជធានីភ្នំពេញបានបញ្ជាក់ថា អាជ្ញាធរបានបិទបញ្ចប់បំរាមគោចរអនុញ្ញាតឲ្យបើកភោជនីយដ្ឋាន និងអនុញ្ញាតឲ្យលក់គ្រឿងស្រវឹងឡើងវិញ ហើយអ្វីដែលមិនមានចែងនៅក្នុងសេចក្តីសម្រេចនេះ គឺនៅបន្តហាមឃាត់ដដែល។ លោកសង្កត់ថា អាជីវកម្មក្លិបកម្សាន្ដគ្រប់ប្រភេទ មានអាជីវកម្មម៉ាស្សា កាស៊ីណូ រោងភាពយន្ត រោងសម្តែងសិល្បៈ សារមន្ទីរ ក្លឹបហាត់ប្រាណ និងមជ្ឈមណ្ឌលកីឡា ព្រមទាំងអាជីវកម្ម-សេវាកម្មផ្សេងទៀត មិនទាន់មានគោលការណ៍អនុញ្ញាតឲ្យបើកដំណើរការឡើងវិញនោះទេ៕