ជាស្ត្រីខ្មែរកម្ពុជាក្រោម ដែលឈប់រៀនត្រឹមថ្នាក់ទី១២ ទាំងមិនទាន់បានប្រឡងផង កញ្ញា ឆន ស្រីណេត មានសេចក្ដីក្លាហាន ដាក់ពាក្យប្រកួតប្រជែកក្នុងកម្មវិធី Miss Universe Cambodia ដែលជាកម្មវិធីលំដាប់ថ្នាក់ជាតិនិងអន្តរជាតិ។ បើទោះបីជាបានសិក្សាក្នុងសាលាត្រឹមកម្រិតវិទ្យាល័យក្ដី ប៉ុន្តែនារីវ័យ២៤ឆ្នាំរូបនេះ នៅតែប្រឹងប្រែងស្វ័យសិក្សាដោយខ្លួនឯង និងបន្តពង្រឹងភាសាបរទេសជានិច្ច។ 
 

តាមពិតទៅ គ្រូបង្ហាត់ប្រាណរូបនេះ ខកខានការប្រឡងបញ្ចប់ថ្នាក់វិទ្យាល័យរបស់ខ្លួន ក៏ព្រោះតែជំងឺរបេងខួរឆ្អឹងជើង។ នាងត្រូវរស់នៅជាមួយនឹងជំងឺប្រមាណ៤ឆ្នាំ ដោយត្រូវទៅព្យាបាលនៅប្រទេសវៀតណាម និងប្រទេសថៃផង។


 

កញ្ញា ឆន ស្រីណេត បញ្ជាក់៖«ដំបូងពេទ្យនៅវៀតណាមឱ្យខ្ញុំកាត់ជើង តែខ្ញុំមិនកាត់ទេ ខ្ញុំសុខចិត្តស្លាប់ បន្ទាប់មកគេឱ្យខ្ញុំទៅព្យាបាលនៅប្រទេសថៃ។ កាលនោះខ្ញុំមិនចង់ទៅទេ ព្រោះខ្ញុំអត់មានប្រាក់ ប៉ុន្តែបងប្អូនខ្មែរគាត់ជួយអំពាវនាវតាមហ្វេសប៊ុក ខ្ញុំក៏ទទួលបានជំនួយពីបងប្អូនខ្មែរទាំងក្នុងស្រុកនិងក្រៅប្រទេស។ ហើយម៉ែរបស់ខ្ញុំគាត់លក់ដីខ្លះផង ខ្ញុំក៏បានទៅព្យាបាល។ ព្យាបាលនៅថៃជិត៣ឆ្នាំ ខ្ញុំចំណាយប្រហែល៥ម៉ឺនដុល្លារ»។ 
 

ត្រឡប់ទៅចាប់អារម្មណ៍អំពីការដាក់ពាក្យក្នុងកម្មវិធី Miss Universe Cambodia របស់កញ្ញា ឆន ស្រីណេត វិញ។ នារីខ្មែរកម្ពុជាក្រោមដែលកើតក្នុងគ្រួសារកសិករមានជីវភាពមធ្យមរូបនេះ ថាគោលបំណងសំខាន់ដែលនាង ដាក់ពាក្យប្រកួតក្នុងកម្មវិធី Miss Universe Cambodia គឺដើម្បីផ្ដល់ជាគំរូសម្រាប់ស្រ្តីខ្មែរកម្ពុជាក្រោមដទៃទៀត ឱ្យមានសេចក្ដីក្លាហានដែរ។

បន្ថែមពីនោះ នាងចង់ឆ្លៀតឱកាសនេះ ដើម្បីបង្ហាញពិភពលោកថា ខ្មែរកម្ពុជាក្រោមគឺជាខ្មែរ ដែលនៅរក្សាវប្បធម៌ ប្រពៃណី ទំនៀមទម្លាប់និងភាសារបស់ខ្លួនបានយ៉ាងខ្ជាប់ខ្ជួន។