កីឡាជាតិ
ជាតិ
ប៉េតង់កម្ពុជាមិនទាន់រកមេដាយមាសបានឡើយ ខណៈវាយគូនារីបានមេដាយប្រាក់ កីឡាការិនី អ៊ុក ស្រីមុំ និងឌុច សោភ័ណ្ឌ។ រូបថត Ken Gadaffi
× កីឡាប៉េតង់ជម្រើសជាតិកម្ពុជា មិនទាន់ទទួលបានមេដាយមាសឡើយពីព្រឹត្តិការណ៍ប្រកួតកីឡាស៊ីហ្គេមលើកទី២៧នៅទីលាននៃកីឡដ្ឋាន Wunna Theikdi ទីក្រុងយ៉ាំងហ្គោន ប្រទេសមីយ៉ាន់ម៉ា។ នៅរសៀលថ្ងៃអាទិត្យនេះ កីឡាការិនី អ៊ុក ស្រីមុំ និង ឌុច សោភ័ណ្ឌ ទទួលបានត្រឹមមេដាយប្រាក់ បន្ទាប់ពីពួកគេបានប្រកួតចាញ់ កីឡាការិនីថៃ Thammakord Thongsy និង Wongchuvej Phantipha ក្នុងលទ្ធផល ៤-១៣ នៅវគ្គផ្តាច់ព្រ័ត្រ។
កម្ពុជាបានប្រកួត៤វិញ្ញាសារួចមកហើយនៅក្នុងប្រភេទកីឡាប៉េតង់ ដោយវិញ្ញាសាវាយទោលនារី វាយគូបុរស និងវាយគូនារី សុទ្ធតែធ្វើមិនបានល្អនៅវគ្គផ្តាច់ព្រ័ត្រ ដែលធ្វើឲ្យកម្ពុជាបានមេដាយប្រាក់៣ពីកីឡាប៉េតង់ ខណៈវិញ្ញាសាវាយទោលបុរស បានមេដាយសំរិទ្ធ។
សម្រាប់វិញ្ញាសាវាយគូនារី ក្រុមថៃ បានឈ្នះមេដាយមាស កម្ពុជាបានមេដាយប្រាក់ ខណៈក្រុមកីឡាការិនីម៉ាឡេស៊ី និងវៀតណាម បានមេដាយសំរិទ្ធស្ទួន៕ © រក្សាសិទ្ធិដោយ thmeythmey.com