បទ ពាក្យ៧
 

មាន់ជល់ភ្នាល់ចាញ់ម្ចាស់ខ្នាញ់ខឹង មាន់ជល់ម្ជូរថ្នឹងស្ងោរអាំងឆា

មាន់ជល់ច្បាស់ជាគេក្លែមស្រា មាន់ជល់សង្ខារមិនវែងអី។
 

មាន់ជល់ៗឈ្នះម្ចាស់ត្រេកអរ មាន់ជល់ពូជល្អអ្នកផងល្បី

មាន់ជល់ការពិតគ្មានបានអ្វី មាន់ជល់ឈ្នះល្បីបានទៅម្ចាស់។
 

មាន់ជល់ៗឈ្នះបានត្រឹមរស់ មាន់ជល់គ្មានយសយើងឃើញច្បាស់

មាន់ជល់កុំអួតថាខ្លួនណាស់ មាន់ជល់ជើងចាស់ដូចជើងថ្មី។
 

មិត្តអើយបើអាចសូមកុំត្រាប់ តាមមាន់ស្មេរប្រាប់ដោយភក្តី

ជល់ឈ្នះឬចាញ់គ្មានបានអី បានត្រឹមដេកដីឆីក្នុងទ្រុង។
 

កុំជល់កុំចាក់តាមគេចង់ គិតឲ្យត្រឹមត្រង់បានគ្រប់ជ្រុង

មេឃធំកុំស្មានស្មើជើងមុង រួមគ្នាវេញធ្លុងទើបមិនធ្លោយ៕