COVID-19
ជាតិ
កម្ពុជា ពិចារណាផលិតវ៉ាក់សាំងបង្ការកូវីដ-១៩ដោយខ្លួនឯង លោក ម៉ម ប៊ុនហេង រដ្ឋមន្ត្រីក្រសួងសុខាភិបាលថ្លែងក្នុងសន្និសីទសារព័ត៌មានកន្លងមក។ ថតដោយ ប៉ាន់ បូនី
× ក្រសួងសុខាភិបាលកម្ពុជា កំពុងសិក្សាពីលទ្ធភាពនៃការបង្កើតមជ្ឈមណ្ឌលផលិតវ៉ាក់សាំងបង្ការជំងឺកូវីដ-១៩ដោយខ្លួនឯង។ លោក ហេង សុខគង់ អ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍ អះអាងថា នេះជាសម្តីរបស់លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ដែលនិយាយក្នុងកិច្ចប្រជុំ នៅព្រឹកថ្ងៃ៨ ខែកក្កដា ឆ្នាំ២០២១នេះ។
លោក ហេង សុខគង់ ដែលបានចូលរួមក្នុងកិច្ចប្រជុំនោះដែរ បានប្រាប់សារព័ត៌មានថ្មីៗថា៖«ព័ត៌មានហ្នឹង ពិត។ ព្រឹកមិញ ក្នុងកិច្ចប្រជុំក្រុមប្រឹក្សាជាតិវិទ្យាសាស្ត្រ បច្ចេកទេស និង នវានុវត្តន៍ ឯកឧត្តមសាស្រ្តាចារ្យ ម៉ម ប៊ុនហេង ជាអ្នកមានប្រសាសន៍។ តែយើង រង់ចាំក្រសួងសុខាភិបាល ប្រកាសផ្លូវការសិនទៅ»។
លោក ម៉ម ប៊ុនហេង មានប្រសាសន៍ជាមួយសារព័ត៌មានថ្មីៗថា មានប្រភេទវ៉ាក់សាំងជាច្រើនមុខ ដែលកម្ពុជា អាចពិចារណាជ្រើសរើសយកមកផលិត។ តែចំពោះព័ត៌មានច្បាស់លាស់ថា កម្ពុជា អាចផលិតវ៉ាក់សាំងបង្ការជំងឺកូវីដ-១៩នៅពេលណា វ៉ាក់សាំងប្រភេទអ្វី និង មានឈ្មោះអ្វីនោះ លោក មិនអាចបញ្ជាក់បាននោះទេ។
លោករដ្ឋមន្រ្តីសុខាភិបាល ថ្លែងថា៖«សំខាន់បំផុត គឺប្រមូលធនធានមនុស្ស [មក] សិក្សាពីបញ្ហាហ្នឹង។ យើង សិក្សាសិនទេ។ [ឯកឧត្តម ចម ប្រសិទ្ធ] គាត់ថា ប្រមូលធនធានសិន មិនមែនផលិតភ្លាមឥឡូវទេ ទៅអនាគតទេ»។
លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បដិសេធមិនធ្វើអត្ថាធិប្បាយពីរឿងនេះ ដោយលោក លើកហេតុផលថា លោក មិនមានទម្លាប់ផ្តល់បទសម្ភាសតាមទូរស័ព្ទឡើយ។
លោក ហេង សុខគង់ មិនទាន់អាចបញ្ជាក់បានដូចគ្នាថា កម្ពុជា អាចចាប់ផ្តើមបង្កើតមជ្ឈមណ្ឌលផលិតវ៉ាក់សាំងបង្ការជំងឺកូវីដ-១៩នៅពេលណា និង ទទួលការជួយជ្រោមជ្រែងពីប្រទេសណា។ លោក គ្រាន់តែអះអាងថា ដើម្បីអាចផលិតវ៉ាក់សាំងបង្ការជំងឺកូវីដ-១៩ដោយខ្លួនឯងបាន កម្ពុជា ត្រូវការកត្តាជាច្រើន រួមមាន វត្ថុធាតុដើម សម្ភារ ធនធានមនុស្ស និង ថវិកា ជាដើម។ លោក សង្កត់ធ្ងន់ថា៖«សំខាន់ គឺការចូលរួមចំណែកទាំងអស់គ្នា គឺអាចទៅរួចហើយ»។
លោកវេជ្ជបណ្ឌិត ហុក គឹមចេង អ្នកនាំពាក្យក្រសួងសុខាភិបាល មិនផ្តល់ព័ត៌មាននេះឡើយ ដោយលោក រុញឲ្យទៅសួរអ្នកស្រីវេជ្ជបណ្ឌិត ឱ វណ្ណឌីន ដែលជាអ្នកនាំពាក្យក្រសួងសុខាភិបាលដែរ។ ប៉ុន្តែ អ្នកស្រី ឱ វណ្ណឌីន ប្រាប់ថា អ្នកស្រី មិនទាន់បានទទួលព័ត៌មាននេះទេ៕
© រក្សាសិទ្ធិដោយ thmeythmey.com