ជាតិ
សង្គមជាតិ
អ្នកធ្វើដំណើរក្រៅប្រទេស ចូលមកកម្ពុជា ត្រូវកក់សណ្ឋាគារធ្វើចត្តាឡីស័កឲ្យបាន២ថ្ងៃមុន
× ភ្នំពេញ៖ ក្រសួងសុខាភិបាល បានណែនាំដល់ពលរដ្ឋ និងជនបរទេស ដែលធ្វើដំណើរមកកម្ពុជា តាមច្រកអាកាសយានដ្ឋានអន្តរជាតិភ្នំពេញ ត្រូវកក់សណ្ឋាគារធ្វើចត្តាឡីស័ក ឲ្យបាន២ថ្ងៃមុនចេញដំណើរ ដើម្បីផ្តល់ភាពងាយស្រួល។
ដើម្បីមានភាពងាយស្រួលដល់អ្នកធ្វើដំណើរកមកម្ពុជា ប្រកបដោយសុវត្ថិភាព គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានសម្រេចដាក់ដំណើរការសេវាកក់សណ្ឋាគារនៅក្នុងរាជធានីភ្នំពេញ សម្រាប់ឲ្យភ្ញៀវជ្រើសរើស ជាកន្លែងសម្រាប់ធ្វើចត្តាឡីស័ក។ ក្នុងនោះគឺមានសណ្ឋាគារសុខាភ្នំពេញ និងរ៉េស៊ីដង់ និងសណ្ឋាគារខថយ៉ាដម៉ារីយ៉ុតភ្នំពេញ។
នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។
បើតាមក្រសួងសុខាភិបាលដដែល នៅពេលអ្នកដំណើរមកដល់ព្រលានយន្តហោះភ្នំពេញ គឺត្រូវបង្ហាញឯកសារមួយចំនួន ដូចជាទិដ្ឋាការដែលមានសុពលភាព និងចេញដោយស្ថានទូតកម្ពុជា ឬពីស្ថានកុងស៊ុលកម្ពុជានៃប្រទេសសាមី វិញ្ញាបនបត្របញ្ជាក់សុខភាពបញ្ជាក់ពីការគ្មានជំងឺកូវីដ-១៩ ដែលចេញដោយរដ្ឋាភិបាលប្រទេសសាមីក្នុងរយៈពេល៧២ម៉ោង។ ក្រៅពីនេះក៏ត្រូវមានលិខិតបញ្ជាក់លើការទិញសេវាធានារ៉ាប់រងសុខភាព និងឯកសារចម្លងបញ្ជាក់ថា បានកក់បន្ទប់ស្នាក់នៅសម្រាប់ធ្វើចត្តាឡីស័ក។
ក្នុងករណីអ្នកដំណើរមានហានិភ័យខ្ពស់ អ្នកដំណើរត្រូវតែធ្វើចត្តាឡីស័ក ទៅតាមការរៀបចំរបស់អាជ្ញាធរមានសមត្ថកិច្ច។ សម្រាប់ប្រាក់ដែលកក់សណ្ឋាគាររួចហើយ ក្រសួងនឹងប្រគល់ជូនភ្ញៀវវិញ។ ប៉ុន្តែអ្នកដំណើរក៏ត្រូវតម្កល់ប្រាក់ចំនួន២ពាន់ដុល្លារ។ នេះជាការបញ្ជាក់របស់ក្រសួងសុខាភិបាល។
ក្រសួងសុខាភិបាលណែនាំដល់ម្ចាស់សណ្ឋាគារ ត្រូវតែត្រៀមរៀបចំទុកជាមុន នូវមធ្យោបាយដឹកជញ្ជូនអ្នកដំណើរពីអាកាសយានដ្ឋានអន្តរជាតិភ្នំពេញ ទៅទីតាំងរបស់ខ្លួន តាមវិធានការសុវត្ថិភាពខ្ពស់។
ក្រោយពីអ្នកដំណើរ បានបញ្ចប់ចត្តាឡីស័ក១៤ថ្ងៃរួចហើយ ក្រសួងសុខាភិបាល ប្រាប់ដល់ម្ចាស់សណ្ឋាគារ ត្រូវតែទូទាត់ចំណាយរបស់រដ្ឋ ពាក់ព័ន្ធការអនុវត្តវិធានការសុខាភិបាល អំឡុងពេលធ្វើចត្តាឡីស័ក។
ចំណែកអ្នកធ្វើដំណើរ ដែលមិនប្រើប្រាស់សេវាកក់សណ្ឋាគារខាងលើនោះទេ ត្រូវតែតម្កល់ប្រាក់ចំនួន២ពាន់ដុល្លារ សម្រាប់ធានាចំណាយក្នុងដំណើរការធ្វើចត្តាឡីស័ក និងត្រូវធ្វើទៅតាមទីតាំង ដែលកំណត់ដោយអាជ្ញាធរមានសមត្ថកិច្ច។
Tag:
សណ្ឋាគារ
ចត្តាឡីស័ក
ដំណើរ
© រក្សាសិទ្ធិដោយ thmeythmey.com