ជាតិ
ក្រសួងសុខាភិបាល នឹងអនុញ្ញាតឱ្យមន្ទីរពេទ្យឯកជន ផ្តល់វ៉ាក់សាំងកូវីដ-១៩ ដល់អតិថិជន
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល
×![]()
ភ្នំពេញ៖ ក្រសួងសុខាភិបាល នឹងអនុញ្ញាតឱ្យមូលដ្ឋានសេវាសុខាភិបាលឯកជន ផ្តល់វ៉ាក់សាំងបង្ការជំងឺកូវីដ-១៩ ដល់អតិថិជន ដែលមានការទទួលស្គាល់ពីអង្គការសុខភាពពិភពលោក(WHO)។ នេះបើយោងតាមលិខិតរបស់លោកស្រី ឱ វណ្ឌឌីន រដ្ឋលេខាធិការក្រសួងសុខាភិបាល នាថ្ងៃទី២៩ កក្កដា ដោយបានបញ្ជាក់ថា មូលដ្ឋានសេវាសុខាភិបាលឯកជនទាំងឡាយ ដើម្បីទទួលបានអនុញ្ញាតពីក្រសួងសុខាភិបាលក្នុងការផ្តល់វ៉ាក់សាំងបង្ការជំងឺកូវីដ-១៩ឱ្យអតិថិជន គឺត្រូវមាននិងគោរពតាមលក្ខខណ្ឌមួយចំនួន។ 
បើតាមលោកស្រី ឱ វណ្ណឌីន មូលដ្ឋានសេវាសុខាភិបាលឯកជន រួមមាន មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ពព ដើម្បីទទួលបានការអនុញ្ញាតពីក្រសួងសុខាភិបាល ក្នុងការផ្តល់វ៉ាក់សាំងបង្ការជំងឺកូវីដ-១៩ដល់អតិថិជននោះ គឺត្រូវមានកន្លែងនិងបុគ្គលិកឈរត្រួតពិនិត្យ(Screening) នៅក្រៅបរិវេណអគារផ្នែកខាងមុខ។ លោកស្រី បានបញ្ជាក់ថា ក្រៅពីនេះ នៅតាមមូលដ្ឋានសេវាសុខាភិបាលឯកជននីមួយៗ ក៏ត្រូវមានគ្រូពេទ្យដែលមានបទពិសោធន៍ ឬផ្នែកឯកទេសសង្គ្រោះបន្ទាន់យ៉ាងតិច១រូប សម្រាប់ជួយសង្គ្រោះបន្ទាន់ នៅពេលមានហានិភ័យក្រោយការផ្តល់វ៉ាក់សាំងដល់អតិថិជន។
ជាមួយគ្នានេះ លោកស្រី ឱ វណ្ណឌីន ក៏តម្រូវឱ្យមូលដ្ឋានសេវាសុខាភិបាលឯកជន ត្រូវមានបន្ទប់សង្គ្រោះបន្ទន់(ICU) ដែលមានបំពាក់ឧបករណ៍បរិក្ខាសម្រាប់សង្គ្រោះបន្ទន់សមស្រប, ត្រូវមានប្រព័ន្ធត្រជាក់ក្នុងការរក្សាទុកវ៉ាក់សាំងឱ្យបានសមស្រប រួមទាំងត្រូវមានប្រព័ន្ធគ្រប់គ្រងការបង្ការ និងការត្រួតពិនិត្យការចម្លងមេរោគ ដោយអនុវត្តទៅតាមគោលការណ៍ណែនាំរបស់ក្រសួងសុខាភិបាល។ លើសពីនេះ មូលដ្ឋានសេវាសុខាភិបាលឯកជន ដែលមានបំណងសុំការអនុញ្ញាតពីក្រសួងសុខាភិបាល ក្នុងការផ្តល់វ៉ាក់សាំងបង្ការជំងឺកូវីដ-១៩ ដល់អតិថិជន ក៏ត្រូវមានប្រព័ន្ធគ្រប់គ្រងសំណល់វេជ្ជសាស្ត្រ ផងដែរ។ នេះបើតាមការរៀបរាប់របស់លោកស្រី ឱ វណ្ណឌីន នៅក្នុងលិខិតរបស់ខ្លួន នាថ្ងៃទី២៩កក្កដា។
សូមបញ្ជាក់ថា បច្ចុប្បន្ន វ៉ាក់សាំងបង្ការជំងឺកូវីដ-១៩ ដែលមានការទទួលស្គាល់ពីអង្គការសុខភាពពិភពលោកនោះ មាន វ៉ាក់សាំងរបស់ក្រុមហ៊ុន AstraZeneca, វ៉ាក់សាំងSinopharm, វ៉ាក់សាំងSinovac, វ៉ាក់សាំង Pfizer-BioNTech, វ៉ាក់សាំង Johnson & Johnson និងវ៉ាក់សាំង Moderna ជាដើម៕
Tag:
COVID-19
លោកស្រី ឱ វណ្ណឌីន
© រក្សាសិទ្ធិដោយ thmeythmey.com
