អនុរដ្ឋមន្រ្តីការបរទេសចិន សៀ ហ្វឹង បានជួបជាមួយសមភាគីអាមេរិក វិនឌី ស៊ើមែន ក្នុងទីក្រុងធានជីនក្បែររដ្ឋធានីប៉េកាំង។ មន្រ្តីទូតចិន បានប្រាប់ភាគីអាមេរិកថា សណ្តាប់ធ្នាប់អន្តរជាតិរបស់អាមេរិក និងប្រទេសអឺរ៉ុបមួយក្រុមតូច ធ្វើឡើងក្នុងគោលបំណងបង្កើតច្បាប់ព្រៃ និងដើម្បីសម្លុតប្រទេសតូចៗប៉ុណ្ណោះ។

 

អង្គការសហប្រជាជាតិ បានអះអាងថា ជនស៊ីវិលអាហ្វហ្គានីស្ថានប្រមាណ២៤០០នាក់បានស្លាប់ ឬរងរបួសចន្លោះខែឧសភា និងខែមិថុនា។ តួលេខដ៏ខ្ពស់នេះ ត្រូវបានកត់ត្រា ខណៈការប្រយុទ្ធរវាងក្រុមឧទ្ទាមតាលីបង់ និងកងកម្លាំងសន្តិសុខអាហ្វហ្គានីបានកើនឡើងខ្លាំង ស្របពេលអាមេរិកដកទ័ព។

 

 

កូរ៉េខាងត្បូង និងកូរ៉េខាងជើង ប្រកាសភ្ជាប់បណ្ដាញទំនាក់ទំនងទាំងអស់ឡើងវិញ បន្ទាប់ពីត្រូវបានកាត់ផ្ដាច់ជាឯកតោភាគីដោយទីក្រុងព្យុងយ៉ាងអស់ពេលជាង១ឆ្នាំមកហើយ។ បើតាមកូរ៉េខាងត្បូង ការភ្ជាប់ប្រព័ន្ធទំនាក់ទំនងឡើងវិញនេះ ជាជំហានដំបូងក្នុងការស្ដារទំនាក់ទំនងអន្តរកូរ៉េដែលជាប់គាំងនាពេលកន្លងមក។

 

រដ្ឋមន្រ្តីការពារជាតិសិង្ហបុរី និងអាមេរិក នៅថ្ងៃទី២៧ ខែកក្កដា បានបញ្ជាក់រួមគ្នាថា វត្តមានអាមេរិកនៅក្នុងតំបន់ គឺពិតជាសំខាន់ណាស់សម្រាប់សន្តិភាព វិបុលភាព និងស្ថិរភាពរបស់ខ្លួន។

 

ប្រមុខយោធាមីយ៉ាន់ម៉ា លោក មីន អ៊ុនឡាំង បានប្រកាសស្វែងរកកិច្ចសហប្រតិបតិ្តការកាន់តែខ្លាំងជាមួយសហគមន៍អន្តរជាតិដើម្បីទប់ទល់វិបត្តិជំងឺកូវីដ-១៩ ។ មីយ៉ាន់ម៉ា កំពុងរងគ្រោះខ្លាំងដោយសាររលកឆ្លងជំងឺកូវីដ-១៩ ស្របពេលប្រព័ន្ធសុខាភិបាលស្ទើរតែដួលរលំដោយសារបុគ្គលិកភាគច្រើនចូលរួមយុទ្ធនាការប្រឆាំងរដ្ឋប្រហារ។

 

អគ្គរដ្ឋទូតចិនប្រចាំនៅអាមេរិកថ្មី លោក ឈីន កាង បានបង្ហាញសារជាវិជ្ជមានទៅភាគីអាមេរិកពេលទៅដល់ក្រុងវ៉ាស៊ីនតោនដើម្បីកាន់តំណែង។ បើតាមអ្នកការទូតចិនរូបនេះ ច្រកទ្វារទំនាក់ទំនងរវាងប្រទេសទាំងពីរមិនទាន់បិទឡើយ ហើយថែមទាំងមានឱកាស និងសក្តានុពលជាច្រើនថែមទៀត។

 

 

រដ្ឋមន្រ្តីការពារជាតិអាមេរិក លោកឡយ អូស្ទីន បានស្វែងរកការពង្រឹងកិច្ចសហប្រតិបត្តិការសន្តិសុខបន្ថែមជាមួយវៀតណាម និងដោះស្រាយបញ្ហាជំងឺកូវីដ-១៩។ ទស្សនកិច្ចរបស់ប្រមុខការពារជាតិអាមេរិក ធ្វើឡើងស្របពេលប្រទេសអាស៊ីអាគ្នេយ៍មួយនេះ កំពុងមានទំនាស់ជាមួយចិន នៅក្នុងសមុទ្រចិនខាងត្បូង។

 

ក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UNSC)  អង់គ្លេសបានព្រមានថា ពាក់កណ្តាលនៃប្រជាជនមីយ៉ាន់ម៉ាទាំង៥៤លាននាក់ អាចនឹងឆ្លងជំងឺកូវីដ-១៩ ត្រឹមរយៈពេល២សប្តាហ៍ខាងមុខប៉ុណ្ណោះ ប្រសិនបើស្ថានការណ៍ក្នុងប្រទេសនេះនៅតែអាក្រក់ដូចបច្ចុប្បន្ន។ អង់គ្លេស បានជំរុញឱ្យក្រុមប្រឹក្សសន្តិសុខ គិតគូរពីបញ្ហានៅមីយ៉ាន់ម៉ា។

 

 

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានអនុម័តដាក់វិធានការបិទខ្ទប់រដ្ឋធានីម៉ានីល និងតំបន់ជុំវិញរយៈពេល២សប្តាហ៍ក្នុងគោលបំណងទប់ស្កាត់ការរីករាលដាលវីរុសបំប្លែងខ្លួនថ្មីទម្រង់ដែលតា និងដើម្បីការពារប្រព័ន្ធសុខាភិបាលក្នុងប្រទេសកុំឱ្យដួលរលំ។

 

នាយករដ្ឋមន្រ្តីថៃ ប្រាយុទ្ធ ចន្ទអូចា ប្រកាសជំហរមិនលាលែងពីតំណែង ឬរំលាយសភាមុនអាណត្តិឡើយ ខណៈលោកកំពុងរងសម្ពាធខ្លាំងដោយសារវិបត្តិកូវីដ-១៩ ដែលមិនធូរស្រាល។ លោក ប្រាយុទ្ធ ត្រូវបានបាតុករទាមទារឱ្យចុះចេញពីតំណែងទៅ ព្រោះអសមត្ថភាពដោះស្រាយវិបត្តិនេះឱ្យបានល្អ។

 

 

គណៈកម្មការសុខាភិបាលចិន បានប្រកាសថា​ ចិន កំពុងប្រឈមមុខរលកឆ្លងជំងឺកូវីដ-១៩ ដ៏អាក្រក់មិនធ្លាប់មានក្រោយការផ្ទុះដំបូងនៅវូហាន បន្ទាប់ករណីឆ្លងថ្មី បានរាលដាលដល់តំបន់ធំពីរទៀត។

 

នាយករដ្ឋមន្ត្រី​វៀតណាម ផាម មិញ​ឈិ​ញ សម្រេច​បន្ត​វិធាន​ការបិទ​ខ្ទប់​តំបន់​ភាគ​ត្បូង​ចំនួន​២​សប្ដាហ៍​ទៀត ដើម្បី​ទប់ស្កាត់​ការ​រាលដាល​ជំងឺ​កូ​វីដ​-១៩ ដែល​នៅតែ​ធ្ងន់ធ្ងរ​។ លោក ផាម ក៏​ណែ​នាំឱ្យ​អាជ្ញាធរ​ក្នុង​តំបន់​បិទ​ខ្ទប់​រឹតបន្តឹង​វិធានការ​ឱ្យបាន​ម៉ឺងម៉ាត់ ហើយ​បង្កើនល្បឿន​ចាក់​វ៉ាក់សាំង​ឱ្យ​ប្រជាជន​នៅ​តំបន់​មាន​ហានិភ័យ​៕