បណ្តាខេត្តជាប់ព្រំដែនថៃចំនួន៥ គឺបន្ទាយមានជ័យ បាត់ដំបង សៀមរាប ឧត្តរមានជ័យ និងកោះកុង បានរកឃើញករណីឆ្លងកូវីដ-១៩ សរុប៤៨០នាក់ នៅថ្ងៃទី២ សីហា។ ក្រៅពីខេត្តទាំង៥នេះ ខេត្តមួយចំនួនទៀតមានព្រៃវែង ត្បូងឃ្មុំ កំពង់ចាម កំពង់ធំ កំពង់ស្ពឺ និងខេត្តកណ្តាល ក៏បន្តរកឃើញអ្នកវិជ្ជមានសរុប ២៧៥នាក់បន្ថែមដែរ។ សរុបករណីថ្មីទាំង១១ខេត្តនេះ គឺ ៧៥៧នាក់ ខណៈខេត្តមួយចំនួនទៀត ក៏ប្រកាសជាបន្តបន្ទាប់ ពីករណីវិជ្ជមាននៅក្នុងខេត្តខ្លួនដែរ។ យ៉ាងណាក៏ដោយ ក្រសួងសុខាភិបាលបានប្រកាសថា កាលពីថ្ងៃទី២ ខែសីហា គឺមានអ្នកវិជ្ជមានកូវីដ-១៩ សរុបតែ ៥៧៧នាក់ប៉ុណ្ណោះ។
បន្ទាយមានជ័យ៖ រកឃើញអ្នកវិជ្ជមានកូវីដ-១៩ ចំនួន ១៦៥នាក់ទៀត ក្នុងនោះជាង៥០នាក់កើតលើពលករដែលកំពុងធ្វើចត្តាឡីស័ក។ អ្នកវិជ្ជមានភាគច្រើន ជាអ្នករស់នៅក្រុងប៉ោយប៉ែត និងក្រុងសិរីសោភ័ណ ហើយក្រៅពីនេះមានអ្នកស្រុកអូរជ្រៅ, មង្គលបូរី, ម៉ាឡៃ, ថ្មពួក, ភ្នំស្រុក, ស្វាយចេក និងស្រុកព្រះនេត្រព្រះ។ អ្នកឆ្លងថ្មីមួយចំនួនទៀតជាអ្នកខេត្តកោះកុង ពោធិ៍សាត់ បាត់ដំបង ត្បូងឃ្មុំ កំពង់ចាម កំពង់ធំ សៀមរាប និងខេត្តព្រះវិហារ។
បាត់ដំបង៖ បន្តកឃើញអ្នកវិជ្ជមានកូវីដ-១៩ចំនួន ១០៥នាក់ ខណៈអ្នកជាសះស្បើយមានចំនួន១៧នាក់បន្ថែម និង២នាក់បានស្លាប់។ គិតត្រឹមថ្ងៃទី២ សីហា ខេត្តបាត់ដំបង មានអ្នកឆ្លងកូវីដ-១៩ ចំនួន ៣.៥៩២នាក់ ក្នុងនោះ២.១០៣នាក់បានជាសះស្បើយ, ៤៥នាក់ស្លាប់ និង ១.៤៤៤នាក់កំពុងព្យាបាល។
សៀមរាប៖ បន្តរកឃើញអ្នកវិជ្ជមានកូវីដ-១៩ ចំនួន៩៧នាក់ទៀត ខណៈអ្នកជាសះស្បើយមាន៩០នាក់ និងស្លាប់១នាក់ បន្ថែម។ ក្នុងចំណោមអ្នកវិជ្ជមាននោះ មាន៤៦នាក់ នាំចូលពីប្រទេសថៃ ហើយករណីឆ្លងក្នុងសហគមន៍មានប្រភពចម្លងចេញពីផ្សារចារឈូក, ផ្សារលើធំថ្មី និងផ្សារកំពង់ឃ្លាំង។ ចំណពោះករណីស្លាប់ គឺជាស្ត្រីវ័យ ៦៤ឆ្នាំ រស់នៅភូមិត្រពាំងត្រែង សង្កាត់សាលាកំរើក ក្រុងសៀមរាប។ គិតត្រឹមថ្ងៃទី២ សីហា ខេត្តសៀមរាប មានអ្នកវិជ្ជមានកូវីដ-១៩ ចំនួន៤.៦២៥នាក់ ក្នុងនោះ២.៤០៦នាក់បានជាសះស្បើយ, ៤៩នាក់ស្លាប់និង២.២១៩នាក់ទៀត កំពុងសម្រាកព្យាបាល។
ព្រៃវែង៖ បន្តរកឃើញអ្នកឆ្លងកូវីដ-១៩ ចំនួន៧៩នាក់បន្ថែម ហើយអ្នកដែលជាសះស្បើយមាន៣៣នាក់ដែរ។ អ្នកវិជ្ជមាន៤នាក់បន្ថែម បានស្លាប់ ដែលធ្វើឱ្យករណីស្លាប់សរុប ក្នុងខេត្តនេះ មាន៨០នាក់។ ក្នុងចំណោមអ្នកដែលវិជ្ជមានទាំងនោះ មានអ្នករស់នៅក្រុងព្រៃវែង, ស្រុកព្រះសេ្ដច, កំចាយមារ, ពាមជរ, កំពង់ត្របែក, មេសាង, ស្វាយអន្ទរ, ពាមរក៍, បាភ្នំ, កញ្ជ្រៀច, ស៊ីធរកណ្ដាល, ពារាំង និងស្រុកពោធិ៍រៀង។
ករណីស្លាប់ទាំង៤នាក់ មានបុរសវ័យ ៥៧ឆ្នាំរស់នៅភូមិពោធិ៍ទី ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង។ ស្ត្រីវ័យ ៣៩ឆ្នាំ រស់នៅភូមិធ្លក ឃុំជាខ្លាង ស្រុកស្វាយអន្ទរ ខេត្តព្រៃវែង។ ស្ត្រីវ័យ ៦៧ឆ្នាំ រស់នៅភូមិក្រាំងស្លា ឃុំរោងដំរី ស្រុកបាភ្នំ ខេត្តព្រៃវែង និងស្ត្រីវ័យ ៦៤ឆ្នាំ រស់នៅភូមិសំរោងវាល ឃុំជីផុច ស្រុកមេសាង ខេត្តព្រៃវែង។ បច្ចុប្បន្ន ខេត្តព្រៃវែង មានអ្នកឆ្លងកូវីដ-១៩ សរុប ៤.៤៦៨នាក់ ក្នុងនោះ៣.២៤៥នាក់ បានជាសះស្បើយ ៨០នាក់ស្លាប់ និង១.១៤៣នាក់កំពុងព្យាបាល។
ឧត្តរមានជ័យ៖ មាន៧៩ករណីថ្មី ដែលភាគច្រើនជាករណីឆ្លងក្នុងសហគមន៍ ខណៈ៧នាក់ ជាពលករដែលធ្វើចត្តាឡីស័ក ក្រោយត្រឡប់មកពីប្រទេសថៃ។ ជាមួយគ្នានេះ ក៏មានអ្នកជំងឺ៥៥នាក់បានជាសះស្បើយ។ ក្នុងចំណោមអ្នកទើបវិជ្ជមាននោះ មានបុគ្គលិកសុខាភិបាល ៣នាក់ និងទាហាន៤នាក់ផងដែរ។ សូមជម្រាបថា គិតត្រឹមថ្ងៃទី២ ខែសីហា ខេត្តឧត្តរមានជ័យ រកឃើញអ្នកឆ្លងកូវីដ-១៩ ចំនួន ៤.៩២៥នាក់ ក្នុងនោះ ៤,៤៦១នាក់ ជាករណីនាំចូល។ អ្នកជាសះស្បើយសរុបមាន ៩៨៣នាក់ ស្លាប់៨នាក់ និង៣.៩១៣៤នាក់ទៀតកំពុងសម្រាកព្យាបាល។
កំពង់ចាម៖ មនុស្សចំនួន ៥៥នាក់ទៀត មានតេស្តវិជ្ជមានកូវីដ-១៩ ខណៈ៦៨នាក់បានជាសះស្បើយ និងម្នាក់បានស្លាប់។ អ្នកដែលទើបវិជ្ជមានទាំង ៥៥នាក់នោះ មានពលរដ្ឋក្រុងកំពង់ចាម, ស្រុកកំពង់សៀម, កងមាស,ចំការលើ, ជើងព្រៃ, បាធាយ, ព្រៃឈរ, ស្ទឹងត្រង់ និងស្រុកស្រីសន្ធរ។ អ្នកវិជ្ជមាន ៣នាក់ជាអ្នកខេត្តត្បូងឃ្មុំ។ ចំណែកករណីស្លាប់ គឺជាស្ត្រីវ័យ៦៨ឆ្នាំ រស់នៅភូមិគីឡូ៣ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។ បច្ចុប្បន្ន ខេត្តកំពង់ចាមនៅសល់អ្នកជំងឺកូវីដ-១៩ ដែលកំពុងសម្រាកព្យាបាលចំនួន ៨២៩នាក់ ខណៈអ្នកដែលបានជះសះស្បើយមានចំនួន ៣.១៣៣នាក់។
កណ្តាល៖ មានអ្នកវិជ្ជមានថ្មីចំនួន ៤៦នាក់ ជាសះស្បើយ ៨៨នាក់បន្ថែម និងមានស្លាប់២នាក់ទៀតដែរ។ គិតត្រឹមថ្ងៃទី ២ ខែសីហា ខេត្តកណ្តាល បានរកឃើញអ្នកឆ្លងកូវីដ-១៩ សរុប ៩.៦៥៧នាក់ ក្នុងនោះ ៨.៦៩៤នាក់បានជាសះស្បើយ។ អ្នកស្លាប់សរុបមាន ១៣៦នាក់។
កំពង់ធំ៖ បន្តរកឃើញអ្នកវិជ្ជមាន ចំនួន៤៤នាក់បន្ថែមទៀត និងជាសះស្បើយ៤នាក់។ អាជ្ញាធរ ក៏រកឃើញករណីវិជ្ជមានកូវីដ-១៩ លើសពបុរសម្នាក់ ដែលរស់នៅឃុំតាំងក្រសាំង ស្រុកសន្ទុកផងដែរ។ ក្នុងចំណោមករណីឆ្លងថ្មីទាំង៤៤នាក់នោះ មាន ៧នាក់ជាពលរដ្ឋរស់នៅក្រុងស្ទឹងសែន, ២នាក់ នៅស្រុកប្រាសាទបាល្ល័ង្គ, ៧នាក់ នៅស្រុកសន្ទុក, ១៥នាក់នៅស្រុកបារាយណ៍, ១២នាក់នៅស្រុកស្ទោង និង១នាក់នៅស្រុកតាំងគោក។ គិតត្រឹមថ្ងៃទី២ សីហា ខេត្តកំពង់ធំមានអ្នកវិជ្ជមានកូវីដ-១៩ ចំនួន ២.០៧០នាក់ ក្នុងនោះ១.២៧០នាក់ បានជាសះស្បើយ, ៥៣នាក់ស្លាប់ និង៧៤៧នាក់ទៀតកំពុងសម្រាកព្យាបាល។
កោះកុង៖ មានអ្នកវិជ្ជមាន ៣៦នាក់ទៀត ខណៈអ្នកជាសះស្បើយមាន ៦៤នាក់។ អ្នកវិជ្ជមានថ្មី គឺជាពលរដ្ឋនៅក្រុងខេមរភូមិន្ទ, ស្រុកមណ្ឌលសីមា,ស្រុកកោះកុង, ស្រុកបូទុមសាគរ, ស្រុកគិរីសាគរ និងស្រុកស្រែអំបិល។
កំពង់ស្ពឺ៖ រកឃើញករណីថ្មីចំនួន ២៧នាក់ ខណៈអ្នកសះស្បើយមានដល់ទៅ ៧០នាក់។ ខេត្តកំពង់ស្ពឺ នៅសល់អ្នកជំងឺដែលកំពុងព្យាបាលតែ ២៧៩នាក់ប៉ុណ្ណោះ។ គិតត្រឹមថ្ងៃទី ២ ខែសីហា ខេត្តនេះ មានអ្នកឆ្លងកូវីដ-១៩ ចំនួន ៤.០៣៩នាក់ ក្នុងនោះ៣.៦៤៧នាក់ហើយបានជាសះស្បើយ ហើយអ្នកស្លាប់មាន៩៦នាក់។
ត្បូងឃ្មុំ៖ បន្តរកឃើញអ្នកឆ្លងថ្មីចំនួន ២៤នាក់ ដែលភាគច្រើនជាសិស្ស ខណៈអ្នកជាសះស្បើយបន្ថែម ៨២នាក់ និងស្លាប់១នាក់។ ក្នុងចំណោមអ្នកឆ្លងថ្មីនោះមាន ៨នាក់ជាពលរដ្ឋរស់នៅក្រុងសួង, ១០នាក់ ជាអ្នកស្រុកពញាក្រែក, ៥នាក់ជាអ្នកស្រុកត្បូងឃ្មុំ និង១នាក់ជាអ្នកស្រុកក្រូចឆ្មារ។
ករណីទូទាំងប្រទេស៖ មនុស្ស ៥៧៧នាក់ទៀតតេស្តវិជ្ជមានកូវីដ-១៩ ក្នុងនោះ ២២៤នាក់ជាករណីនាំចូល។ អ្នកជាសះស្បើយ មាន៦២៨នាក់បន្ថែម និងអ្នកស្លាប់មាន២៩នាក់ទៀត។ នេះបើតាមសេចក្តីប្រកាសព័ត៌មាន របស់ក្រសួងសុខាភិបាល នៅថ្ងៃទី៣ ខែសីហានេះ។
មកទល់ពេលនេះ កម្ពុជាមានអ្នកឆ្លងកូវីដ-១៩ សរុប ៧៩.០៥១នាក់ ក្នុងនោះ ១១.១៩៥នាក់ ជាករណីនាំចូល។ អ្នកជាសះស្បើយមាន ៧២.១៤៥នាក់ និងស្លាប់សរុប ១.៤៧១នាក់៕