COVID-19
សង្គមអន្តរជាតិ
ឡាវ បន្តបិទខ្ទប់រហូតដល់ថ្ងៃទី១៨ ខែសីហា ស្របពេលករណីឆ្លងហក់ឡើង ប្រជាជនឡាវ មកចុះឈ្មោះទទួលវ៉ាក់សាំងបង្ការជំងឺកូវីដ-១៩។រូបភាព៖Xinhua
× រដ្ឋាភិបាលឡាវ បានបន្តបិទខ្ទប់ប្រទេសរហូតដល់ថ្ងៃទី១៨ ខែសីហា ដោយសារករណីឆ្លងជំងឺកូវីដ-១៩ នៅប្រទេសជិតខាង និងករណីនាំចូលមានចំនួនច្រើន។ អាជីវកម្មមិនចាំបាច់ជាច្រើន ដែលស្ថិតក្នុងតំបន់មានហានិភ័យខ្ពស់ នៅតែបន្តបិទដដែល។
ឡាវ នៅថ្ងៃទី៣ខែសីហា បានរាយការណ៍ករណីឆ្លងកូវីដ-១៩ ចំនួន២៥០ករណី ដែលជាតួលេខដ៏ខ្ពស់មួយ។ ក្នុងចំណោមករណីឆ្លងជំងឺកូវីដ-១៩ ប្រចាំថ្ងៃទាំងនេះ ឡាវ មានករណីឆ្លងចំនួន១៣ប៉ុណ្ណោះ ដែលឆ្លងនៅក្នុងសហគមន៍ ខណៈករណីនាំចូលមានរហូតដល់ ២៣៧ ករណីឯណោះ។ ករណីឆ្លងសរុបនៅឡាវមានចំនួនជាង ៧ពាន់ករណី និងអ្នកស្លាប់មានចំនួន ៧នាក់។
ទាក់ទិននឹងបញ្ហាខាងលើ ឡាវ បានសម្រេច បន្តបិទប្រទេសរហូតដល់ថ្ងៃទី១៨ ខែសីហា។ ថ្លែងក្នុងសន្និសីទសារព័ត៌មានមួយ អ្នកនាំពាក្យរដ្ឋាភិបាលឡាវ លោកស្រី Thippakone Chanthavongsa បានអះអាងថា ការបន្តរយៈពេលបិទខ្ទប់នេះ ដោយសារតែស្ថានការណ៍ជំងឺកូវីដ-១៩ នៅប្រទេសជិតខាងមិនទាន់ធូរស្រាល ខណៈចំនួនពលករឡាវត្រលប់ចូលប្រទេសមានចំនួនច្រើន។ នេះបើតាមការចុះផ្សាយរបស់សារព័ត៌មាន Laotian Times។
ស្របគ្នានេះ អាជ្ញាធរឡាវនឹងពង្រឹងសន្តិសុខតាមព្រំដែន រួមទាំងវាស់កម្តៅតាមច្រកព្រំដែនជាដើម។ មិនតែប៉ុណ្ណោះ ឡាវក៏បានពង្រីកមណ្ឌលចត្តាឡីស័ក និងមន្ទីរពេទ្យសម្រាប់ដាក់ពលករត្រលប់ចូលមកក្នុងប្រទេសវិញផងដែរ។
សូមបញ្ជាក់ថា ប្រទេសជិតខាងឡាវ ដូចជាថៃ កម្ពុជា វៀតណាម មានករណីឆ្លងជំងឺកូវីដ-១៩ ជាច្រើនករណី។ នៅថ្ងៃទី៣ ខែសីហា ថៃមានករណីឆ្លងចំនួន ១៨៩០១ករណី, កម្ពុជាមាន ៥៧៧ករណី និងវៀតណាមមានចំនួន ៣៥៧៨ករណី៕
© រក្សាសិទ្ធិដោយ thmeythmey.com