បន្ទាប់ពីដាក់សំណើនៅខែវិច្ឆិកា ឆ្នាំ២០២០ មក អាស៊ាន ទទួលអង់គ្លេសធ្វើជាដៃគូសន្ទនារបស់ខ្លួនហើយ។ «យើងឯកភាពក្នុងការផ្តល់ឱ្យចក្រភពអង់គ្លេសជាដៃគូសន្ទនាអាស៊ាន»។ សេចក្តីថ្លែងការណ៍រួមរបស់អាស៊ាន បានបញ្ជាក់បែបនេះ នៅក្នុងកិច្ចប្រជុំចុងក្រោយរបស់ខ្លួន។ 

 

ពេលនេះ អង់គ្លេស ជាប្រទេសទី១១ ដែលបានក្លាយដៃគូសន្ទនាអាស៊ាន។ ប្រទេសចំនួន ១០ ផ្សេងទៀត ដែលជាដៃគូសន្ទនាអាស៊ានមានដូចជា អូស្រ្តាលី, កាណាដា, ចិន, សហភាពអឺរ៉ុប, ឥណ្ឌា ជប៉ុន, កូរ៉េខាងត្បូង, នូវែលសេឡង់, រុស្ស៊ី និងអាមេរិក។ 

 

ក្នុងនាមជាដៃគូពិភាក្សានេះ អង់គ្លេសនឹងអាចបង្កើនកិច្ចសហប្រតិបត្តិការជាមួយអាស៊ានបន្ថែមទៀត លើស្ថិរភាពនៅក្នុងតំបន់ និងបម្រែបម្រួលអាកាសធាតុជាដើម។ ការពង្រីកដែនឥទ្ធិពលរបស់អង់គ្លេសមកក្នុងតំបន់អាស៊ីអាគ្នេយ៍បែបនេះ ធ្វើឡើងស្របពេលចិន កំពុងពង្រឹងដែនអំណាចរបស់ខ្លួននៅក្នុងតំបន់។ 

 

សូមបញ្ជាក់ថា ក្រៅពីអាស៊ាន អង់គ្លេស ក៏បានស្នើសុំចូលកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពនៃភាពជាដៃគូអន្តរប៉ាស៊ីហ្វិក (CPTPP) ផងដែរ។ នេះគឺជាគោលនយោបាលមួយរបស់អង់គ្លេស បន្ទាប់ពីដើរចេញពីសហភាពអឺរ៉ុប៕