អន្តរជាតិ
នយោបាយអន្តរជាតិ
កោះ Woody ដែលថតដោយផ្កាយរណប។ រូបភាព៖ មជ្ឈមណ្ឌលយុទ្ធសាស្រ្ត និងសិក្សាអន្តរជាតិ
×![]()
ដោយ: ធៀន ភារិន្ទ
វៀតណាម នៅថ្ងៃទី៥ ខែសីហា បានស្នើឱ្យចិនបញ្ឈប់សមយុទ្ធយោធានៅប្រជុំកោះប៉ារ៉ាសែល ដោយអះអាងថា សកម្មភាពបែបនោះ ជាការបំពានដែនអធិបតេយ្យវៀតណាម និងមិនគោរពស្មារតីនៃសេចក្តីថ្លែងការណ៍ក្រមប្រតិបត្តិបណ្តាភាគីសមុទ្រចិនខាងត្បូង (DOC)។ នេះមិនមែនជាលើកទីមួយឡើយ ដែលក្រុងហាណូយ តវ៉ាជាមួយក្រុងប៉េកាំង ទាក់ទិននឹងបញ្ហានៅក្នុងសមុទ្រចិនខាងត្បូង។ 
រដ្ឋបាលសន្តិសុខដែនសមុទ្រខេត្តហៃណានចិន នៅថ្ងៃទី៥ ខែសីហា បានប្រកាសថា កងទ័ពចិន នឹងធ្វើសមយុទ្ធយោធានៅប្រជុំកោះប៉ារ៉ាសែល និងតំបន់ភាគអាគ្នេយ៍នៃកោះហៃណាន ចាប់ពីថ្ងៃទី៦ ដល់ថ្ងៃទី១០ ខែសីហា។
ជាការឆ្លើយតប ក្រសួងការបរទេសវៀតណាម បានដាក់ការតវ៉ា និងទាមទារឱ្យចិន បញ្ឈប់សមយុទ្ធយោធា។ «សមយុទ្ធយោធាចិននៅប្រជុំកោះប៉ារ៉ាសែល គឺជាការបំពានអធិបតេយ្យវៀតណាម និងស្មារតីនៃសេចក្តីថ្លែងការណ៍ក្រមប្រតិបត្តិបណ្តាភាគីសមុទ្រចិនខាងត្បូង»។ អ្នកនាំពាក្យវៀតណាម លោកស្រី Le Thi Thu Hang បានសង្កត់ធ្ងន់បែបនេះ ដោយបន្ថែមថា សកម្មភាពយោធារបស់ចិន ធ្វើឱ្យមានការស្មុគស្មាញនៅក្នុងតំបន់ និងមិនផ្តល់ប្រយោជន៍អ្វីឡើយសម្រាប់ ចិន និងអាស៊ាន ក្នុងការចរចាក្រមប្រតិបត្តិសមុទ្រចិនខាងត្បូង (COC) ក៏ដូចជាថែរក្សាសន្តិភាព, ស្ថិរភាព និងកិច្ចសហប្រតិបត្តិការនៅក្នុងដែនទឹកមួយនេះ។
បើតាមអ្នកនាំពាក្យក្រសួងការបរទេសវៀតណាម មានមូលដ្ឋានច្បាប់ និងភស្តុតាងប្រវត្តិសាស្ត្រ ក្នុងការការពារអធិបតេយ្យរបស់ខ្លួនលើប្រជុំការស្ពាតលី (Spratly) និងប៉ារ៉ាសែល (Paracel)។ នេះបើតាមការចុះផ្សាយរបស់សារព័ត៌មាន Vietnam Express។
ក្នុងន័យនេះ រដ្ឋាភិបាកក្រុងហាណូយ បានទទូចឱ្យក្រុងប៉េកាំង គោរពអធិបតេយ្យខ្លួន និងបញ្ឈប់សកម្មភាពលើដែនទឹកទាំងនោះ ដើម្បីបញ្ចប់ភាពស្មុគស្មាញនៅក្នុងសមុទ្រចិនខាងត្បូង។
សូមបញ្ជាក់ថា វៀតណាម តែងតែដាក់ការតវ៉ាជាមួយចិនជាច្រើនលើកលើសមយុទ្ធយោធានៅក្នុងសមុទ្រចិនខាងត្បូង។ បើទោះមានការតវ៉ាពីវៀតណាមក្តី ចិន មិនបានបញ្ឈប់សកម្មភាពយោធារបស់ខ្លួន ឡើយ៕
Tag:
ចិន
វៀតណាម
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
