បើតាមអ្នកនាំពាក្យអាមេរិក ជំនួយទាំងនោះ នឹងផ្តល់ឱ្យតាមរយៈអង្គការមិនមែនរដ្ឋាភិបាល និងអង្គការអន្តរជាតិ ដែលជាដៃគូរបស់រដ្ឋាភិបាលអាមេរិក ដើម្បីផ្តល់ជំនួយអាហារបន្ទាន់, ជម្រក, សម្ភារសុខាភិបាល, ទឹក និងសម្ភារផ្សេងទៀត។ 
 

«យើងជំរុញឱ្យម្ចាស់ជំនួយផ្សេងទៀត ផ្តល់ជំនួយដល់ប្រជាជនមីយ៉ាន់ម៉ា»។ អ្នកនាំពាក្យរដ្ឋាភិបាលអាមេរិក បានសង្កត់ធ្ងន់បែបនេះ។ សេចក្តីថ្លែងការណ៍ដដែលនោះ ក៏បានលើកឡើងពីរដ្ឋប្រហារយោធានៅដើមខែកុម្ភៈ កន្លងទៅ ដែលធ្វើឱ្យប្រជាជនជាច្រើននាក់ចាកចេញពីផ្ទះ ដោយសារអំពើហិង្សារវាងយោធា និងក្រុមប្រដាប់អាវុធជនជាតិភាគតិច។ 
 

ជំនួយមនុស្សធម៌នេះ ផ្តល់ឱ្យស្របពេលមីយ៉ាន់ម៉ា កំពុងផ្ទុះករណីឆ្លងជំងឺកូវីដ-១៩ នៅក្នុងប្រទេស។ នៅថ្ងៃទី៩ ខែសីហា មីយ៉ាន់ម៉ា មានករណីឆ្លងចំនួន ៣៦១១ករណី និងអ្នកស្លាប់មានចំនួន ២៣៨នាក់។ ករណីឆ្លងសរុបមានចំនួនជាង ៣៣ម៉ឺនករណី និងអ្នកស្លាប់មានជាង ១ម៉ឺននាក់។ 
 

គួររំលឹកថា កន្លងអាមេរិក បានដាក់ទណ្ឌកម្មជាច្រើនលើរបបសឹកមីយ៉ាន់ម៉ា និងក្រុមហ៊ុនមួយចំនួន ដើម្បីទាមទារឱ្យដោះលែងអ្នកនយោបាយ និងបាតុករមួយចំនួន ដែលកំពុងជាប់ឃុំ។ 
 

ជាមួយគ្នានេះ អាមេរិក ក៏ផ្តល់ជំនួយ៥លានដុល្លារទៅថៃផងដែរ។ ការផ្ដល់ជំនួយនេះ ធ្វើឡើងកំពុងអំឡុងពេលទស្សនកិច្ចរបស់អគ្គរដ្ឋទូតអាមេរិកប្រចាំនៅអង្គការសហប្រជាជាតិ លោកស្រី Linda Thomas-Greenfield នៅថៃ៕