តាមការអះអាងរបស់អ្នកនាំពាក្យរដ្ឋាភិបាលរង លោកស្រីRatchada Thanadirek នៅថ្ងៃទី១១ ខែសីហាវ៉ាក់សាំងចំនួនពីរ ដែលជាប្រភេទថ្នាំបាញ់តាមច្រមុះ ត្រូវបានអភិវឌ្ឍដោយមជ្ឈមណ្ឌលជាតិGenetic Engineering និងBiotechnology ដោយផ្នែកលើវីរុសដែលបង្កជាជំងឺផ្លូវដង្ហើម និងផ្តាសាយធំ។ 

 

បន្ទាប់ពីទទួលបានលទ្ធផលល្អ ក្នុងការពិសោធន៍លើសត្វកណ្តុរ ការសាកល្បងវ៉ាក់សាំងលើកដំបូងលើមនុស្ស នឹងចាប់ផ្តើមនៅចុងឆ្នាំ២០២១។ ការធ្វើតេស្តលើកដំបូងនេះ ត្រូវរង់ចាំការអនុម័តពីនិយ័តករថ្នាំ និងអាហារថៃ។ 

 

អ្នកនាំពាក្យរងរូបនេះ បានបន្តថា ការធ្វើតេស្ត ក៏នឹងសាកល្បងលើវីរុសបង្កជាជំងឺកូវីដ-១៩ ទម្រង់ដែលតា នៅក្នុងដំណាក់កាលពីរ ក្នុងខែមីនា ឆ្នាំ២០២២ ផងដែរ។ ការប្រើប្រាស់វ៉ាក់សាំងប្រភេទបាញ់តាមច្រមុះក្នុងទ្រង់ទ្រាយធំ អាចនឹងធ្វើឡើងនៅពាក់កណ្តាលឆ្នាំ២០២២ ប្រសិនបើទទួលបានលទ្ធផលល្អ។ 

 

ក្រៅពីវ៉ាក់សាំងប្រភេទបាញ់តាមច្រមុះនេះ ថៃក៏បានអភិវឌ្ឍវ៉ាក់សាំងបង្ការជំងឺកូវីដ-១៩ ផ្សេងទៀតផងដែរ ដូចជាវ៉ាក់សាំងប្រើប្រាស់បច្ចេកវិទ្យានាំសារ mRNA របស់សកលវិទ្យាល័យជូឡាឡុងកន និងវ៉ាក់សាំង ដែលអភិវឌ្ឍដោយសកលវិទ្យាល័យMahidol។ វ៉ាក់សាំងទាំងពីរ អាចផ្តើមសាកល្បងលើមនុស្សក្នុងដំណាក់កាលទីពីរ នៅខែក្រោយ។

 

ក្នុងកម្មវិធីចាក់វ៉ាក់សាំងថ្នាក់ជាតិកន្លងមក ថៃបានផ្អែកលើវ៉ាក់សាំងក្រុមហ៊ុន AstraZeneca ក្រុមហ៊ុន Sinovac ក្រុមហ៊ុន Pfizer និងក្រុមហ៊ុន Sinopharm។ មកទល់ពេលនេះ ថៃ បានផ្តល់វ៉ាក់សាំងបង្ការជំងឺកូវីដ-១៩ យ៉ាងហោចណាស់ ២១,២លានដូស ដល់ប្រជាជនខ្លួន ដោយមនុស្សចំនួន ៤,៥៧លាននាក់ បានទទួលវ៉ាក់សាំងពេញលេញ។ 

 

ករណីឆ្លងកូវីដ-១៩ សរុបរបស់ថៃ បានកើនដល់ជាង ៨១ម៉ឺនករណី និងអ្នកស្លាប់មានចំនួនជាង ៦ពាន់នាក់។ អ្នកជាសះស្បើយមានចំនួនជាង ៦០ម៉ឺននាក់៕