សង្គមអន្តរជាតិ
អន្តរជាតិ
កូវីដ-១៩៖ ឡាវ បន្តបិទខ្ទប់ប្រទេស ស្របពេលករណីនាំចូលមានចំនួនច្រើន រូបភាព៖ Xinhua
× ឡាវ នៅថ្ងៃទី១៩ ខែសីហា បានបន្តបិទខ្ទប់ប្រទេសរហូតដល់ថ្ងៃទី២ ខែកញ្ញា ស្របពេលករណីឆ្លងជំងឺកូវីដ-១៩ នាំចូលពីបរទេសជិតខាង មានចំនួនច្រើន។ ឡាវ បានអនុវត្តវិធានការបិទខ្ទប់ តាំងពីខែមេសាមកម្ល៉េះ។
ស្ថានភាពជំងឺកូវីដ-១៩ នៅឡាវ មិនមានសភាពធ្ងន់ធ្ងរឡើយ បើធៀបនឹងប្រទេសជិតខាងដូចជាថៃ និងវៀតណាម។ រដ្ឋាភិបាលក្រុងវៀងចន្ទន៍ នៅថ្ងៃទី១៩ សីហា បានរាយការណ៍ ករណីឆ្លងចំនួន ២៨៤ករណី។ ក្នុងនោះករណីឆ្លងជាសហគមន៍មានចំនួន ១៩ករណី និងករណីជំងឺកូវីដ-១៩ នាំចូលមានចំនួន ២៦៥ករណី។ មកទល់ពេលនេះ ឡាវមានករណីឆ្លងសរុបចំនួន ១១៣១៣ករណី និងអ្នកស្លាប់មានចំនួន ៩នាក់។
ដោយបារម្ភពីករណីឆ្លងជំងឺកូវីដ-១៩ នៅប្រទេសជិតខាង និងករណីនាំចូលមានចំនួនច្រើន ឡាវបានបន្តការបិទខ្ទប់ប្រទេសរហូតដល់ថ្ងៃទី២ ខែកញ្ញា តាមបញ្ជារបស់នាយករដ្ឋមន្ត្រី។ អ្នកស្រី Madame Thippakone អ្នកនាំពាក្យរដ្ឋាភិបាលឡាវ បានបញ្ជាក់បែបនេះ នៅក្នុងសន្និសីទសារព័ត៌មានមួយនៅថ្ងៃទី១៩ ខែសីហា។ នេះបើតាមការចុះផ្សាយរបស់សារព័ត៌មាន The Laotian Times។
ស្របគ្នានេះ វិធានការមួយចំនួន ដែលអនុវត្តក្នុងពេលបិទខ្ទប់ ត្រូវរក្សាទុកនៅដដែល ដូចជាការបិទព្រំដែន, អាជីវកម្ម ដែលស្ថិតក្នុងតំបន់មានហានិភ័យខ្ពស់ ក៏ត្រូវបិទផងដែរ។ មន្ត្រីទូត និងអ្នកតំណាងអង្គការអន្តរជាតិ ត្រូវធ្វើចត្តាឡីស័ករយៈពេល ១៤ថ្ងៃ នៅនិវេសដ្ឋានរបស់ខ្លួន ខណៈបុគ្គលិកអង្គការទាំងនោះ ត្រូវធ្វើចត្តាឡីស័កនៅសណ្ឋាគារ ដែលរដ្ឋាភិបាលបានកំណត់។
គួររំលឹកថា ឡាវ បានដាក់ចេញវិធានបិទខ្ទប់នៅខែមេសាមកម្លេះ បន្ទាប់ពីករណីឆ្លងកូវីដ-១៩ ក្នុងក្រុងវៀងចន្ទន៍ បានហក់ឡើងខ្ពស់៕
© រក្សាសិទ្ធិដោយ thmeythmey.com