ព័ត៌មានពិស្ដារ សូមស្ដាប់បទសម្ភាសរវាង អ្នកនាង អ៊ីសា រ៉ហានី អ្នកសារព័ត៌មានថ្មីៗ  ជាមួយព្រះមហាវិមលធម្ម ពិន សែម ដូចតទៅនេះ៖ 

ដោយហទ័យស្រឡាញ់ ចូលចិត្តធម្មជាតិ ព្រះមហាវិមលធម្ម ពិន សែម បានស្វះស្វែងរករុក្ខជាតិជាច្រើនប្រភេទ មកដាំក្នុងបរិវេណវត្តរាជបូណ៌​​​។ រុក្ខជា​​តិទាំងនោះ ខ្លះជាពូជរុក្ខជាតិកម្រ ដែលខ្លះសឹងលែងមានអ្នកស្គាល់ផង ដូចជាដើមព្នៅ ដើមពកុល កន្តួតព្រៃ ដើមចារ ដើមសូរភី ដើមដង្កោ ដើមសណ្ដាន់ជាដើម។ល។

 

ក្នុងបទសម្ភាសជាមួយសារព័ត៌មានថ្មីៗ ព្រះអង្គ ពិន សែម មានសង្ឃដីកាថា ព្រះអង្គរៀបចំដាំដើមឈើនេះជាង៣០ឆ្នាំមកហើយ តាំងពីស្រុកទេសលែងមានសង្រ្គោម។ ព្រះមហា រៀបរាប់ពីបំណងនៃការរៀបចំនេះថា ក្នុងមួយឆាកជីវិត ព្រះអង្គមានចិត្តស្រឡាញ់ ចូលចិត្ត ពេញចិត្ត រុក្ខជាតិជាខ្លាំង មិនថាពពួកបន្លែ ផ្កា ដើមឈើហូបផ្លែ និងរុក្ខជាតិជាឱសថផង ដ្បិតថារុក្ខជាតិផ្តល់សារប្រយោជន៍ដល់មនុស្សច្រើនលើសលប់ ជាម្លប់ ផ្តល់សោភ័ណភាពស្រស់ស្អាត និងត្រជាក់ភ្នែក។ល។ ចៅអធិការវត្តរាជបូណ៌ យល់ថា គ្រប់រុក្ខជាតិទាំងអស់ សុទ្ធតែផ្តល់សារប្រយោជន៍ដល់មនុស្សលោក​។

 

ក្រៅពីលម្អសោភ័ណភាពវត្ត ការដាំរុក្ខជាតិទាំងនេះ ផ្តល់ភាពរីករាយដល់បុព្វជិតខ្លះ ដែលមានទុក្ខព្រួយពីចម្ងាយ។ ទុក្ខទាំងនោះរលាយអស់ ពេលបានឃើញសោភ័ណ នៃដើមរុក្ខជាតិទាំងឡាយ ក្នុងវត្ត។ នេះជាសង្ឃដីការរបស់ព្រះមហា ពិន សែម។ 

 

ក្រៅពីរៀបចំក្នុងបរិវេណវត្តរាជបូណ៌ ក្នុងនោះ ព្រះអង្គ ពិន សែម ក៏បានផ្តល់ឱវាទ ទៅវត្តឯទៀត ឱ្យរៀបចំដាំលម្អពពួករុក្ខជាតិផងដែរ។ ចំណែកសាធារណជន ព្រះអង្គយល់ថា បច្ចុប្បន្នពួកគេ មានការយល់ដឹងច្រើន និងចូលរួមដាំរុក្ខជាតិទាំងពួងនៅតាមផ្ទះ សណ្ឋាគារ ដែលសុទ្ធសឹងមានសារប្រយោជន៍សម្រាប់បរិស្ថាន៕