Pele ដែលជួយប្រេស៊ីលលើកពាន World Cup បីលើក អះអាងថាជំងឺដុំសាច់របស់លោកមិនធ្ងន់ធ្ងរនោះទេ ហើយលោកនៅមានអារម្មណ៍ល្អ។ យ៉ាងណាក៏ដោយ បើតាមការផ្សាយរបស់ទីភ្នាក់ងារព័ត៌មាន Reuters ក្រុមគ្រូពេទ្យប្រេស៊ីលនិយាយថាជំងឺដុំសាច់របស់អតីតកីឡាករ Santos និង New York Cosmos គឺកាចសាហាវ។
 

ស្ថិតក្នុងមន្ទីរពេទ្យ​ Albert Einstein ក្នុងក្រុង Sao Paulo វីរបុរសបាល់ទាត់រូបនេះបានសរសេរលើបណ្តាញសង្គមហ្វេសប៊ុកថាកាលពីថ្ងៃសៅរ៍សប្តាហ៍មុនលោកបានវះកាត់ដើម្បីយកដំបៅចេញពីក្នុងពោះវៀនធំខាងស្តាំ។ ដុំសាច់ត្រូវបានកំណត់រោគសញ្ញា អំឡុងពេលធ្វើតេស្តសុខភាពប្រចាំឆ្នាំសប្តាហ៍មុន។
 

 

«សំណាងហើយដែលខ្ញុំធ្លាប់អបអរជ័យជម្នះធំៗ ជាមួយអ្នក។ ខ្ញុំប្រឈមមុខនឹងការប្រកួតនេះ [វះកាត់] ដោយស្នាមញញឹម និងហ៊ុំព័ទ្ធដោយក្តីស្រឡាញ់ពីគ្រួសារនិងមិត្តភក្តិរបស់ខ្ញុំ»។ នេះជាសំណេររបស់ Pele ក្រោយវះកាត់។
 

អ្នកជំនាញនៅឯមន្ទីរពេទ្យ Albert Einstein បានអះអាងក្នុងសេចក្តីថ្លែងការណ៍មួយរបស់ខ្លួនថា ពួកគេកំពុងតាមដានស្ថានភាពអាការ Pele និងថែទាំយ៉ាងយកចិត្តទុកដាក់ ខណៈដុំសាច់ដែលបានវះចេញត្រូវបានបញ្ជូនទៅធ្វើតេស្តជាថ្មីទៀត ដ្បិតជាដុំសាច់ដែរគួរបារម្ភខ្លាំង៕