ភ្នំពេញ៖ សម្ដេច ហ៊ុន សែន បានលបស្ដាប់កិច្ចប្រជុំផ្ទៃក្នុងរបស់មន្ត្រីអតីតគណបក្សសង្គ្រោះជាតិ ដែលដឹកនាំដោយលោក ឡុង រី ពីសហរដ្ឋអាមេរិក ជាមួយក្រុមការងារខ្លួន តាមរយៈប្រព័ន្ធវីដេអូ Zoom កាលពីថ្ងៃទី៩ កញ្ញា។ ក្នុងគ្រានោះ សម្ដេច បានចូលទៅបកស្រាយប្រាប់លោក ឡុង រី ពីបំណងដែលសម្ដេចប្រឹងរក្សាវប្បធម៌សន្ទនាជាមួយមេដឹកនាំបក្សប្រឆាំង។ ប៉ុន្តែលោក សម រង្ស៊ី តបវិញថា មេដឹកនាំកម្ពុជារូបនេះ ជាមនុស្សម្នាក់ ដែលពិបាកធ្វើការងារជាមួយគ្នា។

ក្រោយស្ដាប់កិច្ចសន្ទនារវាងលោក ឡុង រី ជាមួយក្រុមការងារអតីតគណបក្សសង្គ្រោះជាតិហើយ សម្ដេច ហ៊ុន សែន ក៏បានចូលទៅនិយាយក្នុងកិច្ចប្រជុំនោះថា មេដឹកនាំ និងមនុស្សមួយចំនួននៃអតីតCNRP គឺគ្មានគុណធម៌ ដោយប្រើសម្តីជេរប្រមាថអាយុជីវិតសម្ដេច ។ សម្ដេច ដែលអះអាងថាបានដឹងគ្រប់កិច្ចប្រជុំផ្ទៃក្នុងក្រុមប្រឆាំងទាំងនោះ បានប្រាប់ឱ្យពួកគេបញ្ឈប់សកម្មភាពជេរប្រមាថ និងលាបពណ៌មកលើការដឹកនាំរបស់រដ្ឋបាលសម្ដេច។

«ខ្ញុំសូមជម្រាបជូនថា ការធ្វើនយោបាយ បើសិនជាអាចធ្វើទៅរួច បញ្ឈប់ការជេរគ្នាទៅ ព្រោះអស់លោកជេរហ្នឹង វាជេរច្រើនពេកហើយ ហើយអាវប្បធម៌លាបពណ៌ដល់ពេលណា?»។ នេះជាការលើកឡើងរបស់ប្រមុខរដ្ឋាភិបាល។
 
ភ្លាមៗនោះ លោក ឡុង រី ក៏បានកាត់សម្តីសម្ដេច ហ៊ុន សែន វិញ ដោយបានបញ្ជាក់ថា មេដឹកនាំបក្សប្រឆាំង មិនដែលបណ្ដុះគំនិតមនោគមន៍វិជ្ជា ជេរ និងលាបពណ៌នោះទេ ។ លោក ឡុង រី បានអះអាងថា មេដឹកនាំតែងតែហាមប្រាម និងណែនាំពួកគេពីបញ្ហានេះ ដោយត្រូវអនុវត្តលើគោលការណ៍ប្រកួតប្រជែងត្រឹមត្រូវ។ តែយ៉ាងណាមន្ត្រីអតីតCNRPរូបនេះ ហាក់ទទួលស្គាល់ថា ការគ្រប់គ្រងមនុស្សគឺពិបាកណាស់ ដូច្នេះទោះមានការណែនាំពួកគេយ៉ាងណាក្តី ក៏នៅតែមានករណីជេរប្រមាថនេះកើតឡើងដែរ។