នៅក្នុងឆ្នាំ២០១៩ ថៃ បានទទួលភ្ញៀវទេសចរចំនួន ៤០លាននាក់។ ប៉ុន្តែចំនួននេះ បានធ្លាក់ចុះយ៉ាងគំហុក ហើយប្រទេសអាស៊ីអាគ្នេយ៍មួយនេះ បានដាក់គោលដៅទទួលភ្ញៀវទេសចរត្រឹមតែ ១លាននាក់ប៉ុណ្ណោះ នៅក្នុងឆ្នាំ២០២១។ ទន្ទឹមនេះ ថៃក៏បានពន្យារពេលទទួលភ្ញៀវទេសចរបរទេសមកក្រុងបាងកក ក្រុងឈៀងម៉ៃ និងក្រុងផ្សេងទៀត។  

 

យ៉ាងណាមិញ ថៃបានស្វះស្វែងបន្ថយរយៈពេលធ្វើចត្តាឡីស័ក ដើម្បីទទួលអ្នកដំណើរបរទេសដែរ។ «ការកាត់បន្ថយរយៈពេលចត្តាឡីស័ក មិនត្រឹមជួយវិស័យទេសចរណ៍ប៉ុណ្ណោះទេ ប៉ុន្តែវានឹងជួយដល់ការធ្វើដំណើរ និងនិស្សិតបរទេសផងដែរ»។ អគ្គនាយកគ្រប់គ្រងជំងឺឆ្លង លោកOpas Karnkawinpong បានប្រាប់សន្និសីទសារព័ត៌មាននៅថ្ងៃទី២៣ ខែកញ្ញាបែបនេះ។ 

 

ក្រោមសំណើរដែលនឹងត្រូវដាក់ទៅរដ្ឋាភិបាលនៅថ្ងៃខាងមុខ អ្នកដំណើរដែលមិនមានការបញ្ជាក់ថាបានទទួលវ៉ាក់សាំងបង្ការជំងឺកូវីដ-១៩ នឹងត្រូវធ្វើចត្តាឡីស័ករយៈពេល ១០ថ្ងៃ ប្រសិនបើធ្វើដំណើរតាមផ្លូវអាកាស និងផ្លូវគោក មានរយៈពេល ១៤ថ្ងៃ។ ចំណែកអ្នកដំណើរមានប័ណ្ណចាក់វ៉ាក់សាំងពេញលេញ ត្រូវធ្វើចត្តាឡីស័ករយៈពេល ៧ថ្ងៃ និងធ្វើតេស្ត RT-PCR។ អ្នកដំណើរដែលមានទាន់ទទួលបានវ៉ាក់សាំងបង្ការជំងឺកូវីដ-១៩ ពេញលេញ នឹងត្រូវធ្វើចត្តាឡីស័ក ១៤ថ្ងៃ។ 

 

វិធានការខាងលើ នឹងអនុវត្តគ្រប់បណ្តាប្រទេសទាំងអស់ ប៉ុន្តែប្រទេសដែលមានហានិភ័យជំងឺកូវីដ-១៩ ទាប នឹងត្រូវកាត់បន្ថយរយៈពេលធ្វើចត្តាឡីស័កទៅតាមនោះដែរ។ មកទល់ពេលនេះ ថៃបានផ្តល់វ៉ាក់សាំងយ៉ាងហោចណាស់ ៤៤,៧លានដូសដល់ប្រជាជនខ្លួន ហើយប្រជាជនប្រមាណ ១៥,១លាននាក់ បានទទួលវ៉ាក់សាំងពេញលេញ៕