ប៉ុន្មានខែចុងក្រោយនេះ ករណីឆ្លងជំងឺកូវីដ-១៩ បានធ្លាក់ចុះជាបន្តបន្ទាប់ ស្របពេលរដ្ឋាភិបាលវៀតណាម បានដាក់ចេញវិធានការយ៉ាងតឹងរ៉ឹង។ ដោយសារតែចំណាត់ការបែបនេះ វៀតណាមមានករណីឆ្លងតែ ២៩៣៩ករណីប៉ុណ្ណោះ នៅថ្ងៃទី១២ ខែតុលា។ ទីក្រុងហូជីមិញ មានករណីឆ្លងច្រើនជាងគេ ដោយមានចំនួន ជាង ១ពាន់ករណី ខណៈខេត្ត Dong Nai មានករណីឆ្លង ៥០១ករណី។ 

 

ទន្ទឹមនេះ អ្នកស្លាប់ដោយសារកូវីដ-១៩ មានចំនួន ៩៣ នាក់។ មកទល់ពេលនេះ ករណីឆ្លងនៅវៀតណាមសរុប មានចំនួនជាង ៨៤ម៉ឺនករណី និងអ្នកស្លាប់មានជាង ២ម៉ឺននាក់។ ចំណែកអ្នកជាសះស្បើយមានចំនួនជាង ៧៨ម៉ឺននាក់។ ប្រជាជនវៀតណាម យ៉ាងហោចណាស់ ៥៥,២ លាននាក់ បានទទួលវ៉ាក់សាំងយ៉ាងហោចណាស់មួយដូស ស្របពេលមនុស្សជាង ១៦លាននាក់ ទទួលបានវ៉ាក់សាំងពេញលេញ។ 

 

មិនតែប៉ុណ្ណោះ ក្រសួងសុខាភិបាលវៀតណាម ក៏រំពឹងចេញវិធានណែនាំផ្តល់វ៉ាក់សាំងបង្ការជំងឺកូវីដ-១៩ ពី ១២ឆ្នាំ ដល់ ១៧ឆ្នាំ។ ការផ្តល់វ៉ាក់សាំងដល់ក្មេងៗបែបនេះ ដោយសារវៀតណាម គ្រោងនឹងបើកសាលារៀនឡើងវិញ៕