នៅទីក្រុងប៉ារីស ក្នុងខែតុលា ឆ្នាំ១៩៦១ ប្រធានប៉ូលិសក្រុងប៉ារីសលោក Maurice Papon បានបញ្ជាឱ្យបង្ក្រាបក្រុមអ្នកតវ៉ាចំនួន ២៥០០០នាក់ ដែលជារណសិរ្សរំដោះជាតិ (FLN) របស់ជនជាតិអាល់ហ្សេរី ដែលធ្វើបាតុកម្មនឹងបម្រាមគោចរលើជនជាតិអាល់ហ្សេរី ក្នុងឆ្នាំនោះ។ តាមការចុះផ្សាយរបស់ទីភ្នាក់ងារព័ត៌មាន Reuters ការបង្រ្កាបនោះ បានឈានដល់ការបង្ហូរឈាម ខណៈសាកសពមនុស្សជាច្រើន ត្រូវបានបោះចោលទៅក្នុងទន្លេ Seine។

 

ក្នុងសេចក្តីថ្លែងការណ៍មួយនៅថ្ងៃទី១៦ ខែតុលា ឆ្នាំ២០២១ ប្រធានាធិបតីបារាំង បានចាត់ទុកការបង្រ្កាបនៅក្នុងឆ្នាំ១៩៦១​ គឺប្រកបដោយហិង្សា និងបង្ហូរឈាម ព្រោះជនជាតិអាល់ហ្សេរីជាង ១ម៉ឺននាក់ ត្រូវបានចាប់ខ្លួន ស្របពេលមនុស្សជាច្រើនផ្សេងទៀត របួស និងបាត់បង់ជីវិត។ 

 

«ប្រធានាធិបតីបារាំង បានទទួលស្គាល់ថា បទឧក្រិដ្ឋ ដែលប្រព្រឹត្តនៅពេលរាត្រី...គឺមិនអាចអត់ឱនបានសម្រាប់សាធារណៈ»។ វិមាន Elysee បានសង្កត់ធ្ងន់បែបនេះ។ 

 

សូមបញ្ជាក់ថា មកទល់ពេលនេះ បារាំងមិនទាន់បានបង្ហាញចំនួនអ្នកស្លាប់ក្នុងឆ្នាំ ១៩៦១ នោះឡើយ ប៉ុន្តែអ្នកប្រវត្តិសាស្រ្តមួយចំនួន បានបញ្ជាក់ថា ចំនួនអ្នកស្លាប់មានច្រើនជាង ២០០នាក់៕