ជាតិ
សេដ្ឋកិច្ច
លោក ចម ប្រសិទ្ធ សម្រេចដាក់ឱ្យដំណើរការគេហទំព័រ Khmer SME ដើម្បីជំរុញអាជីវកម្មនៅកម្ពុជា លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ រូបថត៖ ក្រសួងឧស្សាហកម្ម
× ភ្នំពេញ៖ លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សម្រេចដាក់ឱ្យដំណើរការនូវគេហទំព័រ KhmerSME ដើម្បីជំរុញដល់ការចាប់ផ្តើមធ្វើអាជីវកម្មថ្មី។ KhmerSME ជាថ្នាលព័ត៌មានឌីជីថលជាតិសម្រាប់សហគ្រាសធុនមីក្រូ តូច និងមធ្យម(SMEs)ក្នុងការទទួលបានព័ត៌មានអាជីវកម្មយ៉ាងទូលាយ និងសម្បូរបែបពីសហគ្រាសធុនមីក្រូ តូច និងមធ្យមនៅកម្ពុជា។
គេហទំព័រ KhmerSME ត្រូវបានប្រកាសដាក់ឱ្យដំណើរការជាផ្លូវការ នៅថ្ងៃទី២៨តុលា ឆ្នាំ២០២១ តាមប្រព័ន្ធអនឡាញដោយ លោក ចម ប្រសិទ្ធ ក្រោមកិច្ចសហការជាមួយទីភ្នាក់ងារសហប្រតិបត្តិការអន្តរជាតិអាល្លឺម៉ង់(GIZ) ស្តីពីការអភិវឌ្ឍវិស័យសហគ្រាសធុនតូច និង មធ្យម(SMEs)។ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រូបនេះ បានបញ្ជាក់ថា គេហទំព័រ KhmerSME ជាថ្នាលព័ត៌មានឌីជីថល (Digital Information Platform) ដែលផ្តល់ឱកាសឱ្យSMEsនៅកម្ពុជាទាំងអស់ទទួលបានព័ត៌មាននៅនឹងកន្លែងតែម្តង ដើម្បីអភិវឌ្ឍអាជីវកម្មឬធុរកិច្ចថ្មី។
បើតាមលោក ចម ប្រសិទ្ធ ថ្នាលព័ត៌មានឌីជីថលនៃ KhmerSME នោះ គឺមានការផ្តល់ព័ត៌មានផ្នែកច្បាប់ លិខិតបទដ្ឋានគតិយុត្តិ ការបណ្តុះបណ្តាលបច្ចេកទេស ការផ្ទេរបច្ចេកវិទ្យា ផ្នែកហិរញ្ញប្បទាន និងទីផ្សារ រួមទាំងការចាប់ផ្តើមអាជីវកម្មថ្មីនិងការលើកទឹកចិត្តដល់SMEs សម្រាប់ការធ្វើធុរកិច្ចឱ្យកាន់តែមានប្រសិទ្ធភាពខ្ពស់ ដែឡមានភាពប្រកួតប្រជែងប្រកបដោយបរិយាប័ន្ន។តាមរយៈ KhmerSME ក្រុមហ៊ុន/សហគ្រាស នឹងអាចពង្រឹងសមត្ថភាពខ្លួន និងពង្រីកធុរកិច្ចរបស់ខ្លួនក្នុងការផលិត និងផ្តល់សេវាកម្មប្រកបដោយការប្រកួតប្រជែង។
គេហទំព័រ KhmerSME នឹងតភ្ជាប់ទៅ ASEAN Access ដែលជាគេហទំព័រមួយសម្រាប់សហគ្រាសធុនតូច និងមធ្យមក្នុងតំបន់អាស៊ាន ដែលបានដាក់ឱ្យដំណើរការជាផ្លូវកាលពីថ្ងទី១៦មិថុនា ឆ្នាំ ២០២១មក។ នេះបើតាមការចុះរបស់ក្រសួងឧស្សាហកម្ម ដោយបានបញ្ជាក់ថា បច្ចុប្បន្នកម្ពុជាមានសហគ្រាសធុនតូចនិងមធ្យម ជាង៥០ម៉ឺនមូលដ្ឋាននៅទូទាំងប្រទេស៕
© រក្សាសិទ្ធិដោយ thmeythmey.com