កីឡាជាតិ
ជាតិ
ប៉េតង់ពិភពលោក៖ កម្ពុជាធ្លាក់ត្រឹមវគ្គ១/៨ ក្រោយចាញ់ថៃ ១៣-១២
× ក្រុមកីឡាករប៉េតង់ជម្រើសជាតិកម្ពុជា បានធ្លាក់ចេញពីព្រឹត្តិការណ៍ប្រកួតកីឡាប៉េតង់ពិភពលោកលើវិញ្ញាសា៣ទល់៣ នៅក្រុង Santa Susanna ប្រទេសអេស្ប៉ាញ។ នៅវគ្គ១/៨ផ្តាច់ព្រ័ត្រ កម្ពុជាដែលមានកីឡាករ សុខ ចាន់មាន, ថោង ឈឿន, ញ៉ែម បូរ៉ា និង ស៊ីន វង់ បានចាញ់ក្រុមថៃ ១៣-១២។
ក្រោមការដឹកនាំបង្វឹករបស់លោក អ៊ឹម ផាត កម្ពុជាបានឆ្លងកាត់វគ្គជម្រុះបញ្ចប់ចំណាត់ថ្នាក់ទី១៤ក្នុងចំណោម៤៧ក្រុម។ ចាប់ផ្តើមដោយចាញ់ទុយនីស៊ី ១៣-៧ បន្ទាប់មកឈ្នះអេស្តូនី ១៣-៤, ឈ្នះម៉ាឡេស៊ី ១៣-៣, ឈ្នះសេណេហ្គាល់ ១៣-៤ និងចាញ់ម៉ារ៉ុក ១២-១០។
ជាមួយនឹងលទ្ធផលសរុប ៥៦-៣៦ កម្ពុជាស្ថិតក្នុងចំណោមដែលឈានទៅកាន់វគ្គចាប់ពូល ដោយស្ថិតក្នុងពូល C ជាមួយកោះម៉ូរីស និងទុយនីស៊ី។ ពេលប៉ះកោះម៉ូរីស កម្ពុជា បានចាញ់ ១៣-១២ ប៉ុន្តែបានសងសឹកទុយនីស៊ី ១៣-១១ វិញ ដើម្បីបញ្ចប់ក្នុងចំណាត់ថ្នាក់លេខ២ក្នុងពូល។
ការបញ្ចប់ចំណាត់ថ្នាក់លេខ២ក្នុងពូល C នាំឲ្យកម្ពុជា ត្រូវប៉ះថៃ ដែលជាលេខ១ពូល D។ ជាលទ្ធផលក្រុមកម្ពុជា បានចាញ់ថៃទាំងប្រផុតប្រផើយក្នុងលទ្ធផល ១៣-១២ ហើយខកឱកាសទៅកាន់វគ្គបន្ត។
ទោះបីជាយ៉ាងណាក៏ដោយ កម្ពុជានៅតែមានឈ្មោះក្នុងកំណត់ត្រានៃព្រឹត្តិការណ៍ Petanque World Championships នេះ ដោយទទួលបានមេដាយមាស១ក្នុងចំណោម៤វិញ្ញាសាដែលចូលរួមប្រកួតប្រជែង។ កីឡាការិនី អ៊ុក ស្រីមុំ បានឈ្នះមេដាយមាសលើវិញ្ញាសាវាយយកពិន្ទុ និងជាមេដាយមាស៥លើកជាប់គ្នា បន្ទាប់ពីវីរកីឡាការិនី កែ ឡេង ឈ្នះទាំង៤លើកកន្លងមក។ សម្រាប់វិញ្ញាសាវាយយកពិន្ទុផ្នែកបុរស ដែលមានកីឡាករ សុខ ចាន់មាន និងវិញ្ញាសា៣ទល់៣ផ្នែកនារី មិនបានឈានដល់វគ្គខ្វែងឡើយ ប៉ុន្តែលទ្ធផលក៏មិនអាក្រក់ពេកនោះដែរ៕
© រក្សាសិទ្ធិដោយ thmeythmey.com