ភ្នំពេញ៖ ស្នាដៃសិល្បៈសហសម័យជាច្រើនប្រភេទ ត្រូវបានជ្រើសរើសយ៉ាងហ្មត់ចត់បំផុត ដូចជាស្នាដៃគំនូរ ស្នាដៃរូបថតដែលត្រូវបានរក្សាទុករង្វង់២ទៅ៣រយឆ្នាំ ស្នាដៃគ្រឿងអលង្ការដែលជាប់ពានរង្វាន់ រួមទាំងស្នាដៃសិល្បៈល្បីៗជាច្រើនទៀត របស់សិល្បករអាស៊ី-អឺរ៉ុប នឹងដាក់តាំងពិព័រណ៍នៅសារមន្ទីរជាតិភ្នំពេញ ចាប់ពីថ្ងៃទី២២ ខែវិច្ឆិកា ដល់ថ្ងៃទី៣១ ខែធ្នូ ឆ្នាំ២០២១។
លោក ឯក ប៊ុនថា អគ្គនាយករងនៃអគ្គនាយកដ្ឋានបច្ចេកទេសវប្បធម៌ បានប្រាប់សារព័ត៌មានថ្មីៗថា ការតាំងពិព័រណ៍សិល្បៈសហសម័យនៅសារមន្ទីរ ក្នុងពេលខាងមុខ ត្រូវបានជ្រើសរើសស្នាដៃយ៉ាងហ្មត់ចត់បំផុត។ លោកបន្ថែមថា សិល្បៈសហសម័យទាំងនោះ ត្រូវបានបែងចែកជា៣ប្រភេទធំៗ គឺស្នាដៃជាដៃគូររវាងអាស៊ីនិងអឺរ៉ុប ស្នាដៃវិចិត្រកម្មរបស់សិល្បករបរទេសល្បីៗ នៅក្នុងស្រុកខ្មែរ និងស្នាដៃល្បីៗនៃវិចិត្រករខ្មែរជាង១០រូប ពិសេសស្នាដៃបង្ហាញពីការប្រែប្រួលអាកាសធាតុ ដែលពិភពលោកកំពុងព្រួយបារម្ភ។
មន្រ្តីជាន់ខ្ពស់នៃក្រសួងវប្បធម៌រូបនេះ បានអះអាងថា ស្នាដៃសិល្បៈទាំងនោះ សុទ្ធតែត្រូវបានដាក់តាំងនៅក្នុងសារមន្ទីរ ឬវិចិត្រសាលធំៗ។ លោកថា នេះមិនមែនជារឿងចៃដន្យឡើយ ប៉ុន្តែវាត្រូវបានសម្រិតសម្រាំងស្នាដៃ ដែលមានកេរ្ដិ៍ឈ្មោះ ដោយប្រមូលផ្ដុំគំនិតរបស់សិល្បករនៅអាស៊ីនិងអឺរ៉ុប មកបង្ហាញជូនជាពិសេស។ លោក សង្កត់ធ្ងន់ថា នេះជាទេពកោសល្យរបស់មនុស្ស ក្នុងការបង្កើតទំនាក់ទំនង តាមរយៈស្នាដៃសិល្បៈរបស់ខ្លួន។
លោក ឯក ប៊ុនថា អគ្គនាយករងនៃអគ្គនាយកដ្ឋានបច្ចេកទេសវប្បធម៌ (រូបផ្ដល់ឱ្យ)
លោក ឯក ប៊ុនថា បញ្ជាក់ថា៖«សិល្បៈសហសម័យទាំងនោះ បង្ហាញពីសារសំខាន់នៃការច្នៃប្រឌិត និងគំនិត របស់សិល្បករជំនាញ។ គំនូរទាំងនោះ យើងមិនដឹងតម្លៃទេ ប៉ុន្តែនៅក្នុងនោះ មានគំនូរមួយតម្លៃ១០ម៉ឺនដុល្លារ។ គំនូរខ្លះ ប្រហែលជាអ្នកទាំងអស់គ្នា មិនមានឱកាសមើលផង ប៉ុន្តែពេលនេះ អ្នកអាចមើលបាននៅសារមន្ទីរ។ រូបថតមួយចំនួន ត្រូវបានថែរក្សាទុកមក រហូតប្រហែលជាង២ទៅ៣រយឆ្នាំ ក៏មានដាក់តាំងដែរ។ អ្នកទាំងអស់គ្នានឹងបានមើលឃើញ អក្សរសិល្ប៍ល្អៗនៅលើផ្ទាំងគំនូរទៀតផង។ នេះជាចំណុចដ៏សំខាន់ គួឱ្យចាប់អារម្មណ៍ ដែលអ្នកទាំងអស់គ្នា គួរតែទៅមើលពិព័រណ៍នោះ»។
ចំណែកលោក ឆាយ វិសុទ្ធ ប្រធាននាយកដ្ឋានសារមន្ទីរជាតិភ្នំពេញ ក៏បានប្រាប់សារព័ត៌មានថ្មីៗដែរថា នេះជាលើកទីមួយហើយ ដែលសារមន្ទីរជាតិភ្នំពេញ តាំងពិព័រណ៍សិល្បៈសហសម័យដ៏ធំមិនធ្លាប់មាន។ លោកថា ការរៀបចំពិព័រណ៍នេះ មានលក្ខណៈប្លែក ពីការដាក់តាំងពិព័រណ៍ តាមបែបប្រពៃណីកន្លងទៅ។ មានន័យថាកន្លងមក សារមន្ទីរបានតាំងពិព័រណ៍ តែពីសមុច្ច័យបុរាណ ពិសេសគំនូរសិល្បៈរបស់ខ្មែរសុទ្ធសាធ។ ប៉ុន្តែពេលនេះ គឺតាំងសិល្បៈដែលបង្កើតថ្មី និងមានន័យសម្រាប់ការគិតពិចារណាបែបស៊ីជម្រៅ ដែលសិល្បៈទាំងនោះចង់បង្ហាញ។
ប្រធាននាយកដ្ឋានសារមន្ទីរជាតិភ្នំពេញរូបនេះ សង្កត់ធ្ងន់ថា ថ្វីដ្បិតប្រជាជននៃតំបន់អាស៊ី និងអឺរ៉ុប មានភាសាខុសគ្នា ប៉ុន្តែពួកគេបានយកទេពកោសល្យសិល្បៈ ដែលខ្លួនមាន ទៅច្របាច់បញ្ចូលគ្នា បានជាការឆ្លើយឆ្លងភាសារវាងសិល្បករខ្មែរ អាស៊ី និងសិល្បករអឺរ៉ុប។ លោក វិសុទ្ធ ថាការបង្ហាញគំនិតទៅក្នុងសិល្បៈ គឺជាវិធីនៃការបង្ហាញពីអត្តសញ្ញាណរបស់បណ្ដាប្រទេសនីមួយៗ។
លោក ឆាយ វិសុទ្ធ ប្រធាន នាយក ដ្ឋាន សារមន្ទីរជាតិ ភ្នំពេញ
«ពីមុនមានការតាំងពិព័រណ៍បែបសហសម័យដែរ ប៉ុន្តែក្នុងទ្រុងទ្រាយតូច ហើយមានតែរបស់សិល្បករខ្មែរប៉ុណ្ណោះ។ ប៉ុន្តែពេលនេះមានការដាក់តាំងបង្ហាញសិល្បៈសហសម័យ ដែលមានការចូលរួមពីសិល្បករមកពីបណ្ដាប្រទេសជាច្រើនក្នុងតំបន់អាស៊ីនិងអឺរ៉ុប ដែលមានមិនតិចជាង២០ ទម្រង់សិល្បៈឡើយ ទាំងខ្មែរនិងបរទេស»។ នេះជាការបញ្ជាក់របស់លោក ឆាយ វិសុទ្ធ។
សិល្បៈសហសម័យ ដែលនឹងនាំយកទៅតាំងបង្ហាញនៅសារមន្ទីរជាតិភ្នំពេញ នៅថ្ងៃខាងមុខ ត្រូវបានបែងចែកជា៣ផ្នែកធំៗ រួមមានស្នាដៃជាដៃគូរវាងអាស៊ីនិងអឺរ៉ុប(ស្នាដៃជាបុគ្គល និងស្នាដៃជាក្រុម)។ ទី២ ស្នាដៃវិចិត្រកម្មរបស់សិល្បករបរទេសល្បីៗ នៅក្នុងស្រុកខ្មែរ និងទី៣ ជាស្នាដៃល្បីៗនៃវិចិត្រករខ្មែរជាង១០រូប។ ការតាំងពិព័រណ៍នោះ ក៏នឹងនិយាយអំពីដំណើរដ៏វែងឆ្ងាយ របស់មនុស្ស ដើម្បីរុករកផែនដី ដោយមានប្រហែល១៥ផ្ទាំងផងដែរ។
ប្រធានបទនៃការដាក់តាំងបង្ហាញរួមមាន ពិព័រណ៍ទម្រង់សិល្បៈសូនរូប Sahaka Playground ធ្លាកម្រាន្តសហការ គឺជាបណ្ដុំនៃវិចិត្រកររូបភាព អាស៊ី-អឺរ៉ុប៣រូប ដែលមានមូលដ្ឋាននៅរាជធានីភ្នំពេញ។ ស្នាដៃនេះបង្កើតឡើងរួមគ្នា ដើម្បីចែករំលែកបទពិសោធន៍ទៅវិញទៅមក ឆ្ពោះទៅបង្កើតស្នាដៃសិល្បៈ ដែលល្អឯកមិននឹកស្មានដល់។ វិចិត្រករនីមួយៗ មានសេរីភាពក្នុងការបង្ហាញស្នាដៃរបស់ខ្លួន ដែលជាស្នាដៃសិល្បៈមកពីទ្វីបផ្សេងគ្នា ជាមួយនឹងគំនិត ទស្សនៈ និងមធ្យោបាយផ្សេងៗគ្នាផងដែរ។ សិល្បៈទាំងនេះជារបស់សិល្បករ មកពីប្រទេសកម្ពុជា ម៉ាឡេស៊ី កូរ៉េខាងត្បូង ព័រទុយហ្គាល់ បារាំង និងចក្រភពអង់គ្លេស។
ស្នាដៃសិល្បៈ ដែលនឹងដាក់តាំងពិព័រណ៍ក្នុងសារមន្ទីរជាតិភ្នំពេញ(រូបផ្ដល់ឱ្យ)
HAPPY Heads របាំងមុខរីករាយ ជាទម្រង់រូបថត។ ក្នុងឆ្នាំ២០១៥ Benoit+Bo ដែលជាដៃគូសិល្បករអន្តរជាតិ បានចាប់ផ្ដើមគម្រោងថ្មីមួយ “ថតរូបមុខមនុស្ស នៅក្នុងជីវិតប្រចាំថ្ងៃរបស់ពួកគេ ដោយពាក់របាំងមុខ”។ គំនិតនេះ កើតឡើងបន្ទាប់ពី ការមកដល់របស់សិល្បករទាំងពីររូប ក្នុងប្រទេសបែលហ្ស៊ិក។
ពួកគេបានដឹងថា របាំងមុខដែលប្រើក្នុងពិធីបុណ្យ នៃបណ្ដាប្រទេសនៅអឺរ៉ុបមួយចំនួន និងរបាំមុខដែលប្រើប្រាស់នៅក្នុងប្រទេសអាស៊ីមួយចំនួន មានលក្ខណៈពិសេសមួយចំនួនដូចគ្នា។ ពួកគេទាំងពីរធ្វើតាមប្រតិទិនចន្ទគតិ ប្រើក្នុងពិធីដង្ហែក្បួន ឬពិធីបុណ្យផ្សេងៗ។ ស្នាដៃសិល្បៈនេះ មានទិដ្ឋភាពសង្គម សិល្បៈ និងផ្នែកនរវិទ្យា។ ស្នាដៃទាំងនេះជារបស់សិល្បករ បារាំង និងចិន។
ជំនួបវប្បធម៌ Encountering Culture ជាទម្រង់សិល្បៈសូនរូប ការថតរូប និងដាក់តាំងរូប។ “ជំនួបវប្បធម៌” គឺជាការតាំងពិព័រណ៍ជាក្រុម ដែលប្រមូលផ្ដុំសិល្បករ១៤រូប មកពីអាស៊ីនិងអឺរ៉ុប។ សិល្បករល្បីៗទាំងអស់ រស់នៅក្នុងប្រទេសកម្ពុជា និងចូលរួមយ៉ាងសកម្ម ក្នុងវិស័យសិល្បៈក្នុងស្រុក។ ការតាំងពិព័រណ៍ជាក្រុមនេះ បានទទួលស្គាល់ឥទ្ធិពលរបស់ប្រទេសផ្សេងគ្នា តាមរយៈស្នាដៃសិល្បៈនិងការអនុវត្តជាក់ស្ដែងរបស់ពួកគេ។
ប្រភេទផ្សេងគ្នា នៃសិល្បៈ(ការគូរគំនូរអរូបី រូបថត សិល្បៈឌីជីថល និងចម្លាក់និមិត្ត) បានបង្ហាញនៅក្នុងការតាំងពិព័រណ៍នេះ ដើម្បីអនុញ្ញាតឱ្យមានការផ្លាស់ប្ដូរ ចំណេះដឹង និងសិល្បៈចម្រុះ ព្រមទាំងការចែករំលែក ភាពសម្បូរបែបនៃវប្បធម៌ផងដែរ។ ស្នាដៃទាំងនេះ មានពីអ៊ីតាលី កម្ពុជា អូស្ត្រាលី បារាំង និងជប៉ុន។
ការធ្វើដំណើរដ៏វែងឆ្ងាយបំផុត The Longest Voyage ជាទម្រង់នៃការតាំងរូបសិល្បៈ។ កាលពី៥០០ឆ្នាំមុន នៅទីក្រុងស៊ីវាល(Seville) ការធ្វើដំណើរដ៏វែងឆ្ងាយមួយបានចាប់ផ្ដើមឡើង។ គោលបំណង គឺដើម្បីទៅដល់ អូរីន និងកោះមួយដែលគេនិយាយតគ្នាថា មានគ្រឿងទេសគ្រប់មុខ។ ដើម្បីទៅដល់ទីនោះ គឺតម្រូវឱ្យជិះទូកទៅទិសខាងលិច និងឆ្លងកាត់ផ្នែកដែលមិនទាន់បានរុករកនៃពិភពលោក។
ហ្វើឌីណែន ម៉ាជែលែន បានចាប់ផ្ដើមការធ្វើដំណើរនេះ ក្នុងឆ្នាំ១៥១៩ ហើយការធ្វើដំណើរនោះ នឹងក្លាយជាពេលវេលាធ្វើដំណើរដ៏វែងបំផុតនាសម័យកាលនោះ។ ដំណើរផ្សងព្រេងលើកដំបូង ជុំវិញពិភពលោកមិនត្រឹមតែជាដំណើរផ្សងព្រេងតាមសមុទ្រដ៏អស្ចារ្យបំផុត ដែលមិនធ្លាប់មាននោះទេ ប៉ុន្តែជាព្រឹត្តិការណ៍ដ៏សំខាន់ ក្នុងប្រវត្តិសាស្ត្រផងដែរ។
ស្នាដៃសិល្បៈ ដែលនឹងដាក់តាំងបង្ហាញនៅសារមន្ទីរជាតិ(រូបផ្ដល់ឱ្យ)
វត្ថុដែលអាចរាប់បញ្ចូលគ្នាបាន Things that Count ជាសិល្បៈរូបថត។ Things that Count គឺជាការសហការគ្នាតាមអ៊ីនធឺណិត រវាងនិស្សិតមកពីរាជបណ្ឌិត្យសភាវិចិត្រសិល្បៈ នៅទីក្រុង Antwerp ប្រទេសបែលហ្សិក និងអ្នកថតរូបវ័យក្មេងរបស់វៀតណាម ដោយបង្ហាញពីប្រធានបទ បច្ចុប្បន្នសំខាន់ៗ នៅក្នុងសង្គមសម័យទំនើប ជាមួយនឹងតម្លៃជ្រើសរើសចំនួន១០។ រួមមាន គ្រួសារ សុវត្ថិភាព ភេទ មរតក ការកំប្លែង ភាពស្និទ្ធស្នាល សេរីភាព អំណាច ចំណេះដឹង និងជំនឿ។
ក្នុងបរិបទនៃការអភិវឌ្ឍដ៏ស្មុគស្មាញ នៃការរីករាលដាលនៃជំងឺកូវីដ-១៩ កន្លែងជាច្រើន ត្រូវតែអនុវត្តគម្លាតសង្គម។ ការតាំងពិព័រណ៍រូបថត “វត្ថុដែលរាប់បញ្ចូលគ្នាបាន” មានគោលបំណងបង្ហាញសារវិជ្ជមាន ដោយបង្កើតបណ្ដាញអន្តរជាតិ ក្នុងចំណោមអ្នកថតរូបវ័យក្មេង ដើម្បីឆ្លុះបញ្ចាំងពីបញ្ហាដ៏មានអត្ថន័យ ក្នុងពេលនេះ និងយុគ្គសម័យនេះ។ ស្នាដៃទាំងនេះ មានការចូលរួមពីសិល្បករ អាល្លឺម៉ង់ រ៉ូម៉ានី បែលហ្សិក អេស្ពាញ ស្លូវ៉ាគី និងវៀតណាម។
គំនូរព្រាងនៃក្ដីសង្ឃឹម Il Nodo កើតចេញពីគំនិតដើម្បីចូលរួមបណ្ដាញមិត្តភ័ក្ដិដ៏ធំទូលាយ ដូចជាស្ថាបត្យករ សិល្បករ និងអ្នករចនា- នៅក្នុងសាលា Bottega dell’Arte សាលា Il Nodo Social Design ក្នុងប្រទេសកម្ពុជា។
គំនូរព្រាងរចនាគ្រឿងអលង្ការ ដែលធ្វើដោយដៃរបស់សិស្សសាលា នៅរាជធានីភ្នំពេញ ដោយមានការចូលរួមរចនាពីសិស្សជាង៨០នាក់ ជាសំណុំដ៏សំបូរបែប នៃគំនិតច្នៃប្រឌិតផ្សេងៗគ្នារបស់សិស្ស។ បណ្ដុំនៃវត្ថុបុរាណបានកើតឡើង ដោយបន្ថែមពីលើតម្លៃអប់រំសាលា តំណាងឱ្យការរួមផ្សំគ្នារវាងវប្បធម៌ផ្សេងគ្នា ដូចជាជនជាតិអ៊ីតាលី និងខ្មែរ ហើយលើសពីនេះទៅទៀត រវាងភាសានៃការរចនា និងសិប្បកម្ម។
ទន្លេមេគង្គដោយ Marta Laudani និង Marco Romanelli ជាប្រភពទឹក យកជាលំនាំផលិតជាបន្តោង បានទទួលពានរង្វាន់ផ្នែករចនា ហើយត្រូវបានដាក់តាំងបង្ហាញនៅក្នុងសារមន្ទីរគ្រឿងអលង្ការ Vicenza៕