ជាតិ
សេដ្ឋកិច្ច
គិតត្រឹមឆមាសទី១ឆ្នាំនេះ កម្ពុជា ទទួលបានការវិនិយោគផ្ទាល់ពីបរទេសសរុប ៣៩ប៊ីលានដុល្លារ
×
ភ្នំពេញ៖ គិតត្រឹមចុងឆមាសទីមួយ ឆ្នាំ២០២១ កម្ពុជាទទួលបានការវិនិយោគផ្ទាល់ពីបរទេស(FDI) សរុប ៣៩ប៊ីលានដុល្លារ។ ទំហំវិនិយោគទាំងនេះ ផ្ដោតលើវិស័យហិរញ្ញវត្ថុ អចលនទ្រព្យ កសិកម្ម កម្មន្តសាល និងសណ្ឋាគារ និងជាដើម។ នេះបើយោងតាមរបាយការណ៍របស់ធនាគារជាតិនៃកម្ពុជា(NBC)។
ធនាគារជាតិនៃកម្ពុជា ចេញផ្សាយលើទំព័រហ្វេសប៊ុករបស់ខ្លួន នាថ្ងៃទី២៧វិច្ឆិកា ថា ការវិនិយោគផ្ទាល់ពីបរទេសនៅកម្ពុជា មានក្នុងទំហំទឹកប្រាក់ ៣៩ប៊ីលានដុល្លារ។ ធនាគារជាតិ បានបញ្ជាក់ថា តួលេខនេះ គឺគិតត្រឹមចុងឆមាសទីមួយ ឆ្នាំ២០២១។ បើតាមធនាគារជាតិ ទំំហំទឹកប្រាក់ទាំងនេះ បានពីការវិនិយោគរបស់ប្រទេសចិន កូរ៉េខាងត្បូង វៀតណាម សិង្ហបុរី ជប៉ុន ម៉ាឡេស៊ី ថៃ អង់គ្លេស និងកាណាដា។
លំហូរវិនិយោគនេះគ្របដណ្តប់លើវិស័យកសិកម្ម កម្មន្តសាល ហិរញ្ញវត្ថុ សណ្ឋាគារនិងរមណីយដ្ឋាន សំណង់ វារីអគ្គិសនី និងអចលនទ្រព្យ ជាដើម។ សម្រាប់ផ្នែកហិរញ្ញវត្ថុមានការវិនិយោគប្រមាណ២១ភាគរយ កម្មន្តសាល២០ភាគរយ អចលនទ្រព្យ១២ភាគរយ សណ្ឋាគារ១១ភាគរយ និងកសិកម្ម១០ភាគរយ។
សូមជម្រាបថា កម្ពុជាទទួលបានការវិនិយោគផ្ទាល់ពីបរទេស ចាប់តាំងពីឆ្នាំ១៩៩៣មក។ ការវិនិយោគនោះ មានកំណើនជាលំដាប់ពីមួយឆ្នាំទៅមួយឆ្នាំ។ បើតាមរបាយការណ៍របស់ធនាគារជាតិ ក្នុងឆ្នាំ២០១៨ កម្ពុជា ទទួលបានការវិនិយោគផ្ទាល់ពីបរទេស ក្នុងទំហំទឹក ៣ ២១២លានដុល្លារ, ឆ្នាំ២០១៩ ទទួលបាន ៣ ៥៨៨លានដុល្លារ
និងឆ្នាំ២០២០ ទទួលបាន ប្រមាណ ៣ ៥០០ លានដុល្លារ ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរូបនេះ បានបញ្ជាក់ថា ទោះបីជាកម្ពុជាកំពុងប្រឈមនឹងជំងឺកូវីដ-១៩ និងបន្តសម្របខ្លួនទៅនឹងប្រក្រតីភាពថ្មីក្តី ក៏ប៉ុន្តែវិស័យអចលនទ្រព្យនេះ គឺនៅមានសក្កានុពលក្នុងការវិនិយោគ។ លោក អូន ព័ន្ធមុនីរ័ត្នថា៖«អត្រានេះ គឺបានដោយសារការកើនឡើងសន្សឹមៗនៃលំហូរទុនវិនិយោគពីបរទេស ខណៈការវិនិយោគនិងតម្រូវការស្រុកលើវិស័យអចលនវត្ថុដែលមានតម្លៃទាបនិងមធ្យម នឹងបន្តរក្សាកំណើនល្អប្រសើរ»។
© រក្សាសិទ្ធិដោយ thmeythmey.com