ការអប់រំតាមប្រព័ន្ធអនឡាញ ជាឱកាសល្អផងនិងជាបញ្ហាប្រឈមផង

ជាតិ

សង្គមជាតិ

ការអប់រំតាមប្រព័ន្ធអនឡាញ ជាឱកាសល្អផងនិងជាបញ្ហាប្រឈមផង

28, Nov 2021 , 11:42 am

រូបភាព

ដោយ: ឈួន ឈីវអុីង

ការអប់រំតាមប្រព័ន្ធអនឡាញ ពិតជាមិនអាចជំនួសការបង្រៀនដោយផ្ទាល់ទល់មុខគ្នាបានឡើយនៅ ក្នុងប្រព័ន្ធអប់រំថ្នាក់ឧត្តមសិក្សា ប៉ុន្តែវាក៏មិនអាចខ្វះបានផងដែរ។ ការបង្រៀនតាមប្រព័ន្ធអនឡាញ គឺ ជាឱកាសល្អផង ហើយក៏ជាបញ្ហាប្រឈមផងដែរ។ ដូច្នេះ នាពេលអនាគត ការអប់រំគួរតែស្ថិតក្នុង ទម្រង់លាយបញ្ចូលគ្នា ដែលមានន័យថាសិស្សត្រូវរៀនផ្ទាល់ក្នុងថ្នាក់ផង និងរៀនតាមប្រព័ន្ធអនឡាញផង។

ដោយសារជំងឺរាតត្បាតកូវីដ-១៩ ក្នុងរយៈពេលពីរឆ្នាំកន្លងមកនេះ ពិភពលោកត្រូវបានអនុវត្តវិធានការបិទខ្ទប់ ដែលធ្វើឱ្យប៉ះពាល់យ៉ាងខ្លាំងដល់ទំនាក់ទំនងរវាងបុគ្គល ពិសេសក្នុងវិស័យអប់រំ។ ការបង្រៀនតាមប្រព័ន្ធអនឡាញត្រូវបានបង្ហាញខ្លួនឡើង ខណៈវិធីបង្រៀនបែបនេះមិនដែលធ្លាប់មានពីមុនឡើយ។ ផលវិបាកជាច្រើនត្រូវបានកើតឡើង ពីក្រោយការអប់រំតាមប្រព័ន្ធអនឡាយ។ ប៉ុន្តែវាក៏ត្រូវបានអ្នកស្រាវជ្រាវអះអាងថា មានសារសំខាន់មិនអាចខ្វះបានក្នុងការអប់រំផងដែរ។

ការសិក្សាតាមប្រព័ន្ធអនឡាយបានក្លាយជាបញ្ហាប្រឈម ដោយវាតម្រូវឱ្យសាស្ត្រាចារ្យផ្លាស់ប្តូរ និងរៀបចំវិធីសាស្ត្របង្រៀនឡើងវិញក្នុងរយៈពេលដ៏ខ្លី។ មួយវិញទៀត បញ្ហាអ៊ីនធឺណិតមិនរលូន ភាពលំបាកក្នុងការអនុវត្តសកម្មភាពបច្ចេកទេស និងកង្វះការផ្លាស់ប្តូរយោបល់រវាងគ្នានិងគ្នា បានធ្វើឱ្យការផ្ទេរចំណេះដឹងនិងការបង្រៀនមិនសូវមានប្រសិទ្ធភាព។

លើសពីនោះ ការរៀនតាមប្រព័ន្ធអនឡាញបានធ្វើឱ្យបាត់បង់ភាពជិតស្និទ្ធរវាងគ្រូនិងសិស្សយ៉ាងខ្លាំង។ មួយវិញទៀត សិស្សទាំងអស់មិនមានឱកាសទទួលបានការអប់រំស្មើគ្នាឡើយ បើពួកគេមិនបានទៅសាលារៀន។ វាពិតជាទាមទារឱ្យសិស្សមានវិន័យផ្ទាល់ខ្លួន និងការតាំងចិត្តខ្ពស់ ដែលជាបញ្ហាពិបាកមួយដែរសម្រាប់សិស្ស។ នេះបើតាមការចុះផ្សាយលើទំព័រ ScienceDaily។

យ៉ាងណាមិញ ការបង្រៀនតាមអនឡាញក៏បានផ្តល់ឱកាស និងបទពិសោធថ្មីៗជាច្រើនឱ្យសិស្ស ក៏ដូចជាសាស្ត្រាចារ្យដែរ។ វាបានផ្តល់ភាពងាយស្រួលដែលអាចឱ្យសិស្ស និងគ្រូបត់បែនការងារបានតាមពេលវេលាទំនេរ និងមានពេលច្រើនសម្រាប់រៀបចំការងារដោយសារកាត់បន្ថយពេលវេលាធ្វើដំណើរទៅសាលា។ មិនត្រឹមតែពេលវេលាប៉ុណ្ណោះទេ ការកាត់បន្ថយការធ្វើដំណើរក៏ជួយសន្សំសំចៃការចំណាយលើថ្លៃសាំងជាដើម។

សម្រាប់សិស្ស ការរៀនតាមប្រព័ន្ធអនឡាញបានជួយសម្រួលឱ្យពួកគេមានឱកាសរៀនដោយខ្លួនឯងឡើងវិញច្រើនដងចំពោះចំនុចដែលមិនទាន់យល់ព្រោះពួកគេអាចមើលវីដេអូបង្រៀនរបស់គ្រូដែលបានថតទុក។

តែទោះយ៉ាងណា ការអប់រំតាមប្រព័ន្ធអនឡាញនៅតែមិនអាចជំនួសការអប់រំនៅសាលារៀនដោយផ្ទាល់បានទេ។ ដូច្នេះ នាពេលអនាគត ការអប់រំគួរតែស្ថិតក្នុងទម្រង់លាយបញ្ចូលគ្នា ដែលមានន័យថាសិស្សត្រូវរៀនផ្ទាល់ក្នុងថ្នាក់ផង និងរៀនតាមប្រព័ន្ធអនឡាញផង។ ការរៀនក្នុងថ្នាក់នឹងបង្កើនទំនាក់ទំនងជិតស្និទ្ធរវាងគ្រូនិងសិស្ស និងការផ្លាស់ប្ដូរយោបល់ផ្សេងៗ ខណៈការរៀនអនឡាញបានផ្តល់ភាពងាយស្រួលដែលអាចរៀនបាននៅគ្រប់ទីកន្លែង គ្រប់ពេលវេលា៕