សហភាពសហព័ន្ធយុវជនកម្ពុជា ដែលមានឈ្មោះកំណើតជា សមាគមយុវជនសាមគ្គីសង្គ្រោះជាតិកម្ពុជាបានប្រារព្ធខួបកំណើតលើកទី៤៣របស់ខ្លួននៅថ្ងៃនេះ នៅអគារខេមរានីដែលជាទីស្នាក់ការសហភាពសហព័ន្ធយុវជនកម្ពុជារាជធានីភ្នំពេញ។ «ស.ស.យ.ក. ត្រៀមខ្លួនគ្រប់កាលៈទេសៈដើម្បីចូលរួមក្នុងបុព្វហេតុជាតិមាតុភូមិ ហើយបន្តប្តេជ្ញាថែរក្សា ជាតិ មាតុភូមិ ហើយបន្តប្តេជ្ញាថែរក្សា ជាតិ សាសនា ព្រះមហាក្សត្រនៃព្រះរាជាណាចក្រកម្ពុជាឱ្យបានគង់វង្សស្ថិតស្ថេរជាដរាបរៀងទៅ» គឺជាប្រធានបទនៃព្រឹត្តិការណ៍ប្រារព្ធខួបនៃការបង្កើតចលនាយុវជនដ៏ធំនេះ។
១៩ម៉ឺននាក់ គឺជាចំនួនសមាជិកសមាជិការបច្ចុប្បន្នរបស់សហភាពសហព័ន្ធយុវជនកម្ពុជា ដែលសាធារណជនស្គាល់ជាពាក្យកាត់ថា យុវជន ស.ស.យ.ក.។ តាមរយៈសេចក្តីថ្លែងការណ៍របស់ប្រធានរបស់ពួកគេ គឺលោក ហ៊ុន ម៉ានី ពួកគេបានយកវេទិកានៃខួបកំណើតនៃចលនាយុវជនដ៏ធំជាងគេនេះ ប្រកាសការពារថែរក្សាសន្តិភាពនៅលើទឹកដីមាតុភូមិរបស់ពួកគេ។
«យើងទាំងអស់គ្នា គឺជាសំឡេង និងជាកម្លាំងចលករមួយផ្នែកដ៏ខ្លាំងក្លារបស់ប្រជាជាតិកម្ពុជា។ សំឡេងយើងទាំងអស់គ្នា ជាសំឡេងដែលបង្ហាញពីការជឿជាក់លើភាពវិជ្ជាមាន ការជឿជាក់លើអនាគតកម្ពុជា និងការជឿជាក់លើសក្ដានុពលរបស់យុវជនកម្ពុជា ក្រោមការដឹកនាំរបស់រាជរដ្ឋាភិបាលនាពេលបច្ចុប្បន្ននេះ និងតទៅអនាគតទៀត។»។ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានប្រកាសយ៉ាងនេះតាមរយៈសុន្ទរកថារបស់លោក នៅចំពោះមុខសមាជិកសមាជិការជាន់ខ្ពស់ ស.ស.យ.ក.។
សហភាពសហព័ន្ធយុវជនកម្ពុជា ត្រូវបានប្តូរឈ្មោះពី សមាគមយុវជនកម្ពុជានៅឆ្នាំ២០១២ ដែលមានឋានៈជាអង្គការក្រៅរដ្ឋាភិបាលមួយ។ តាមពិត សមាគមយុវជនកម្ពុជា មានឈ្មោះដើមជា សមាគមយុវជនសង្គ្រោះជាតិកម្ពុជាដែលត្រូវបានបង្កើតឡើងទន្ទឹមគ្នានឹងរណសិរ្សសាមគ្គីសង្គ្រោះជាតិកម្ពុជានៅថ្ងៃទី២ខែធ្នូឆ្នាំ១៩៧៨។ កាលណោះ សមមិត្ត ហ៊ុន សែន ដែលជាស្ថាបនិកមួយរូបនៃរណៈសិរ្ស គឺជាប្រធានអ្នកដឹកនាំសមាគមយុវជនរបស់រណសិរ្សនោះ។
នៅឆ្នាំ២០១២ នៅក្នុងមហាសន្និបាតលើកទី៣ នាថ្ងៃទី២-៣ ខែវិច្ឆិកា លោក ហ៊ុន ម៉ានី ដែលមុននេះមានតួនាទីជាអនុប្រធានសមាគមយុវជនកម្ពុជាហើយនោះ ត្រូវបានបោះឆ្នោតជាប្រធានសមាគមដែលត្រូវបានផ្លាស់ប្តូរឈ្មោះមកជាសហភាពសហព័ន្ធយុវជនកម្ពុជានៅក្នុងមហាសន្និបាតនោះ។
នាឱកាសខួបឆ្នាំទី៤៣នេះ ថ្នាក់ដឹកនាំ ស.ស.យ.ក. បានប្រកាសបន្តវេនស្មារតីនៃថ្ងៃប្រវត្តិសាស្ត្រ២ធ្នូឆ្នាំ១៩៧៨។ ពោលគឺ យុវជន និងអ្នកស្នេហាជាតិនិងប្រជាជនមួយក្រុមបានដាក់ជីវិតធ្វើដើមទុន ហើយរួមគ្នាជាកម្លាំងសាមគ្គីមួយដើម្បីរំដោះប្រទេសចេញពីរបបប្រល័យពូជសាសន៍ ប៉ុល ពត។
លោក ហ៊ុន ម៉ានី បានថ្លែងយ៉ាងដូច្នេះ៖«យើងត្រៀមខ្លួនចូលរួមជាមួយរដ្ឋាភិបាល ក្នុងកាលៈទេសៈតម្រូវ ជាពិសេសស្ថានភាពដែលអាចផ្ដល់ផលប៉ះពាល់ដល់សុខសន្តិភាព ស្ថិរភាព សន្តិសុខ និងសុខដុមនីយកម្មរបស់សង្គមជាតិ ជាអាទិ៍ ការប៉ុនប៉ងធ្វើបដិវត្តពណ៌ ទោះក្នុងរូបភាពណាក៏ដោយ ឬក្នុងបរិបទនៃជំងឺកូវីដ-១៩ ជាដើម។ យើងត្រូវ ត្រៀមចូលរួមតាមគ្រប់រូបភាពក្នុងការរក្សាសន្តិភាពឱ្យបានដាច់ខាត។ ដើម្បីជាតិ និងប្រជាជន យើងអាចធ្វើបាន ហើយយើងនឹងធ្វើបាន។»។
មិនត្រឹមតែការពារសន្តិភាពប៉ុណ្ណោះទេ លោក ហ៊ុន ម៉ានី ដែលតំណាងឱ្យសមាជិកសមាជិការរបស់លោក ក៏បានប្រកាសប្តេជ្ញាចិត្តអភិវឌ្ឍកម្ពុជាតាមរយៈ «ការចូលរួមអនុវត្តឱ្យបានសម្រេចនូវទស្សនៈវិស័យកម្ពុជា ២០៣០ និង ២០៥០របស់រដ្ឋាភិបាល ដោយត្រូវពង្រឹងគោលជំហរ និងបង្កើនសមត្ថភាពឱ្យក្លាយជាពលរដ្ឋពោរពេញដោយមោទនភាព ដោយសមត្ថភាព និងដោយធម៌។»។
គួររំឭកផងដែរថា រាប់ចាប់ពីឆ្នាំ២០១២មក សហភាពសហព័ន្ធយុវជនកម្ពុជា ដែលដឹកនាំដោយ លោក ហ៊ុន ម៉ានី ត្រូវបានស្គាល់ថាជាចលនាយុវជនដែលចូលរួមធ្វើកិច្ចការសង្គម និងមនុស្សធម៌យ៉ាងច្រើន និងយ៉ាងផុលផុស ដើម្បីទ្រទ្រង់ការអភិវឌ្ឍសេដ្ឋកិច្ច និងសង្គមកម្ពុជា។ មិនតែប៉ុណ្ណោះ សហភាពនេះក៏បានបង្កើតព្រឹត្តិការណ៍វប្បធម៌ជាតិធំៗដើម្បីលើកទឹកចិត្តសាមគ្គីភាពរបស់ប្រជាពលរដ្ឋខ្មែរ និងបាននាំទង់ជាតិខ្មែរទៅកាន់ឆាកអន្តរជាតិជាច្រើនផងដែរ។
ស.ស.យ.ក. បានរៀបចំព្រឹត្តិការណ៍អង្គរសង្ក្រាន្តយ៉ាងល្បីល្បាញរយៈពេល៦ឆ្នាំជាប់គ្នា បានរៀបចំ ព្រឹត្តិការណ៍បំបែកឯតទគ្គកម្មពិភពលោកមួយចំនួនដូចជា អន្សមយក្ស រាំម៉ាឌីហ្សុន ទូក ង វែងជាងគេ និងក្រមាវែងជាងគេ។ រយៈពេល៩ឆ្នាំកន្លងមកនេះ សកម្មភាពមនុស្សធម៌នៃយុវជនអាវផ្ទៃមេឃបានដក់ជាប់ក្នុងអារម្មណ៍របស់មហាជនកម្ពុជាហើយ ពិសេសប្រជាជននៅតាមជនបទ។ អំឡុងពេលនៃការឆ្លងរាលដាលជំងឺកូវីដ-១៩ យុវជន ស.ស.យ.ក. ទូទាំងប្រទេសបានចូលរួមផ្សព្វផ្សាយបញ្ជ្រាបការយល់ដឹងដល់ពលរដ្ឋនៅតាមភូមិ ចូលរួមក្នុងយុទ្ធនាការចាក់វ៉ាក់សាំង និងបានកៀរគរមូលនិធិចែកជូនពលរដ្ឋនៅតាមសហគមន៍ដែលត្រូវបានបិទខ្ទប់ដោយសារការឆ្លងរាលដាលជំងឺកូវីដ-១៩៕