ជាតិ
នយោបាយជាតិ
×![]()
ភ្នំពេញ៖ លោក កឹម សុខា ប្រាប់ឱ្យលោក សម រង្ស៊ី និងសហការីផ្សេងទៀត ឈប់បន្តយកឈ្មោះខ្លួន ទៅផ្សារភ្ជាប់ជាមួយសកម្មភាពនយោបាយ និងចលនាផ្សេងៗនៅក្រៅប្រទេស ដែលប៉ះពាល់សិទ្ធិ និងជំហររបស់លោក។ សាររបស់លោក កឹម សុខា ពេលនេះ ហាក់បង្ហាញថា លោក កឹម សុខា និងលោក សម រង្ស៊ី លែងជាមនុស្សតែមួយទៀតហើយ។
«ខ្ញុំសង្កេតឃើញថា រហូតមកដល់ពេលនេះ លោក សម រង្ស៊ី និង សហការីនៅតែបន្តយកឈ្មោះ និងរូបថតខ្ញុំទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញតិ ឬ គាំទ្រពីខ្ញុំ»។ នេះជាលើកដំបូងហើយ ដែលលោក កឹម សុខា សរសេរសារប្រាប់ទៅលោក សម រង្ស៊ី មេដឹកនាំ និងជាដៃគូនយោបាយ នៅក្នុងអតីតគណបក្សសង្គ្រោះជាតិ មួយអាណត្តិ មុនពេលគណបក្សនេះ ត្រូវបានរំលាយ កាលពីចុងឆ្នាំ២០១៧។
អមជាមួយសារទាំងនេះ លោក កឹម សុខា ដែលកំពុងជាប់រឿងក្តីក្ដាំជាង៤ឆ្នាំមកនេះ បានរៀបរាប់ទៀតថា លោក សម រង្ស៊ីនិងសហការីបានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយផ្សេងៗ និងមុខតំណែងខ្លួនឯង។ ជាពិសេសថ្មីៗនេះ គឺការត្រឡប់ទៅគាំទ្រដោយចំហរឬ នៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន។ សម្រាប់លោក កឹម សុខា ទង្វើរបស់ពួកគេទាំងនោះ បានបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះ មិនមានការគាំទ្រ ឬ ជាជំហររបស់ខ្លួនឡើយ។
«អាស្រ័យហេតុនេះ ខ្ញុំសូមអំពាវនាវឱ្យលោក សម រង្ស៊ី និង ក្រុមខាងលើ ឈប់បំពានមកលើរូបខ្ញុំដោយការយកឈ្មោះ និងរូបថតខ្ញុំ ទៅប្រើប្រាសភ្ជាប់ជាមួយសកម្មភាពមហិច្ឆិតានយោបាយរបស់ខ្លួន ដែលធ្វើឱ្យសាធារណមតិជាតិ និង អន្តរជាតិមានការភ័ន្តច្រឡំ។ ខ្ញុំសូមបញ្ជាក់ផងដែរថា ខ្ញុំមិនពាក់ព័ន្ធ និងមិនទទួលខុសត្រូវចំពោះសកម្មភាពរបស់លោក សម រង្ស៊ី និង ក្រុមនោះឡើយ»។ នេះជាការបញ្ជាក់របស់លោក កឹម សុខា ដែលសរសេរលើហ្វេសប៊ុកផ្លូវការខ្លួន នៅថ្ងៃទី២៨ វិច្ឆិកា។
សារព័ត៌មានថ្មីៗ មិនទាន់អាចទាក់លោក ចាន់ ចេន ដែលជាប្រធានក្រុមមេធាវី និងជាប្រធានក្រុមអ្នកនាំពាក្យផ្ទាល់ខ្លួនលោក កឹម សុខា ដើម្បីសាកសួរពីមូលហេតុ នៃការបញ្ចេញសារបែបនេះឡើយ។
តែយ៉ាងណាលោក ចាន់ ចេន ប្រធានក្រុមអ្នកនាំពាក្យលោក កឹម សុខា បានសរសេរអត្ថាធិប្បាយឆ្លើយតបអ្នកប្រើប្រាស់បណ្ដាញសង្គម សួរនាំករណីនេះថា ទង្វើរបស់លោកសម រង្ស៊ី និងបក្ខពួក បានធ្វើទង្វើក្បត់និងម្ចាស់ឆ្នោតពាក់កណ្តាលនគរ ដែលបោះឱ្យអតីតគណបក្សសង្គ្រោះជាតិកន្លងមក ហើយក៏ជាទង្វើក្បត់លោក កឹម សុខា និងសមាជិកសមាជិការហើយ ។
ប្រធានក្រុមមេធាវីការពារក្តីឱ្យលោក កឹម សុខា រូបនេះ បានសរសេរតបដូច្នេះថា៖«លោកប្រធាន កឹម សុខា សុខចិត្តទទួលយកការឈឺចាប់ សុខចិត្តជាប់គុកដោយស្មោះត្រង់និងជាតិ សាសនា ព្រះមហាក្សត្រ ពិសេសម្ចាស់ឆ្នោត ។ ផ្ទុយទៅវិញលោកសម រង្សី និងក្រុមគាត់ដោយមហិច្ឆិតាផ្ទាល់ខ្លួន ក្រុមខ្លួនដើរចេញពីសម្ព័ន្ធភាព ទៅគាំទ្រឲ្យបក្សភ្លើងទៀនរបស់លោក សម រង្ស៊ី ឲ្យដំណើរការឡើងវិញ ខណៈបក្សសិទ្ធិមនុស្សសុំរំលាយដោយខ្លួនឯង ដើម្បីបញ្ជាក់ពីភាពស្មោះត្រង់និងដៃគូនយោបាយ »។
គួរបញ្ជាក់ថា គណបក្សសង្គ្រោះជាតិ ត្រូវបានរំលាយតាមអំណាចសាលក្រមរបស់តុលាការកំពូល ជុំវិញសំណុំរឿងក្បត់ជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧។ មិនត្រឹមតែរំលាយគណបក្សនេះទេ សូម្បីមន្ត្រី១១៨រូប (ស្លាប់១នាក់) ក៏ត្រូវបានហាមឃាត់សកម្មភាពនយោបាយ៥ឆ្នាំ។
គិតមកដល់ពេលនេះ មន្ត្រីអតីតគណបក្សសង្គ្រោះជាតិជាង២០រូបហើយ ដែលបានស្នើសុំសិទ្ធិធ្វើនយោបាយឡើងវិញ ក្រោមហេតុថា ចង់ជួយសង្គម តាមរយៈសកម្មភាពនយោបាយ។ ពួកគេទាំងនោះ មានអ្នកខ្លះទៅបង្កើតគណបក្សខ្លួនឯង និងអ្នកខ្លះទៀតរួមជីវភាពនយោបាយ ជាគណបក្សប្រជាជនកម្ពុជា និងគណបក្សដទៃផ្សេងទៀត៕
Tag:
កឹម សុខា
សម រង្ស៊ី
នយោបាយ
© រក្សាសិទ្ធិដោយ thmeythmey.com
