ជាតិ
នយោបាយជាតិ
សម្ដេច ហ៊ុន សែន បញ្ជាឱ្យដកហូតយកដីព្រៃលិចទឹក ដែលត្រូវបានកាប់ទន្ទ្រានខុសច្បាប់មកវិញ ជាពិសេសដីពីមន្ត្រី
× ភ្នំពេញ៖ តាមរយៈសារសំឡេងពិសេស ពាក់ព័ន្ធនឹងបញ្ហាបឹងទន្លេសាប នៅថ្ងៃទី២៨ វិច្ឆិកា សម្ដេច ហ៊ុន សែន បានបញ្ជាឱ្យដកហូតយកដីព្រៃលិចទឹក ដែលត្រូវបានអ្នកមានអំណាច និងជនខិលខូច កាប់ទន្ទ្រានខុសច្បាប់យកមកវិញទាំងអស់។
«ទោះបីថ្នាក់ណាក៏ដោយត្រូវប្រមូលយកដីនោះមកវិញទាំងអស់ ហើយដីនោះត្រូវតែជាកម្មវត្ថុនៃការដាំដើមឈើឡើងវិញនៅពេលក្រោយ»។ នេះជាសាររបស់សម្ដេច ហ៊ុន សែន ដែលបានបញ្ជាឱ្យលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយដ្ឋាន និងសំណង់ និងជាប្រធានគណៈកម្មាធិការដោះស្រាយវិវាទដីធ្លី បើកកិច្ចប្រជុំជាបន្ទាន់លើករណីនេះ ជាមួយក្រសួងធនធានទឹក និងឧតុនិយម , ក្រសួងកសិកម្ម រុក្ខាប្រមាញ់ និងនេសាទ , ក្រសួងបរិស្ថាន និងអាជ្ញាធរបឹងទន្លេសាប រួមទាំងអ្នកពាក់ព័ន្ធផ្សេងៗទៀត។ ចំណែកអភិបាលខេត្ត នៅតាមបឹងទន្លេសាបទាំងអស់ ត្រូវពិនិត្យមើល និងទប់ស្កាត់ជាបន្ទាន់ លើករណីទន្ទ្រានដីព្រៃលិចទឹក។
បន្ថែមពីនេះ ប្រមុខរដ្ឋាភិបាល ក៏បានបញ្ជាឱ្យលោក សៅ សុខា មេបញ្ជាការកងរាជអាវុធហត្ថ ដឹកកងកម្លាំងទាំងថ្មើជើងផ្លូវគោក និងប្រើប្រាស់ឧទ្ធម្ភាគចក្រ ជិះល្បាត និងបង្ក្រាបលើករណីទន្ទ្រានដីព្រៃនេះ ព្រមទាំងច្បាប់ខ្លួនជនខិលខូចមកអនុវត្តច្បាប់។ មិនតែប៉ុណ្ណោះ នាយករដ្ឋមន្ត្រី ហ៊ុន សែន ក៏បានបញ្ជាឱ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតលើមន្ត្រីពាក់ព័ន្ធលើករណីកាប់ទន្ទ្រានដីព្រៃលិចទឹកមកដាក់ទោសតាមផ្លូវច្បាប់ រួមទាំងរឹបអូសទ្រព្យសម្បត្តិ ដែលពួកគេរកបានពីការប្រព្រឹត្តិពុករលួយ ពីការកាប់ទន្ទ្រាននេះ។
«ទោះបីជាត្រូវលះបង់អី ដោយតម្លៃណាយើងត្រូវយកដីទាំងនោះ មកវិញឱ្យបាន…។ឯចំពោះអ្នកប្រព្រឹត្តត្រូវតែទទួលខុសត្រូវចំពោះតាមច្បាប់ ដោយខានមិនបាន។ ខ្ញុំបានបញ្ជាក់ហើយ មានតែផ្លូវច្បាប់ប៉ុណ្ណោះ ដែលអាចដោះស្រាយបានបញ្ហាពួកអ្នកទាំងនេះ។ យើងបានអប់រំពួកគេរាប់សិបឆ្នាំមកហើយ អំពីផលវិបាកលើបញ្ហានេះ ហេតុអ្វីក៏នៅមានមន្ត្រីបែបនេះតទៅទៀត»។ នេះជាការបញ្ជាក់របស់ប្រមុខរដ្ឋាភិបាល។
តែយ៉ាងណាសម្ដេច ហ៊ុន សែន ទុកឱកាសឱ្យមន្ត្រីប្រព្រឹត្តខុស ចេញសារភាពមុនគេចាត់វិធានការដែរ។«ខ្ញុំសូមប្រាប់មន្ត្រីទាំងឡាយ ដែលអនុវត្តខុស បើចង់បានការបន្ធូបន្ថយទោស ត្រូវចេញមកសារភាពបន្ទាន់ បើមិនចេញសារភាពជាបន្ទាន់ ខ្ញុំសូមឱ្យអ្នកដែលចេញមកអនុវត្ត ចាត់វិធានការយ៉ាងម៉ឺងមាត់បំផុត គឺការចាប់ខ្លួនតែម្ដង សម្រាប់ផ្ដន្ទាទោសតាមច្បាប់។ ហើយឈានទៅរឹបអូស មិនត្រឹមតែដីធ្លីនៅហ្នឹងកន្លែង ទ្រព្យសម្បត្តិដែលពួកគេមាន ដែលបានមកពីដីធ្លីដែលពួកគេបានបំផ្លាញនេះ ត្រូវតែធ្វើការដកហូត»។ នេះជាការបញ្ជាក់របស់សម្ដេច ហ៊ុន សែន ដែលបានសង្កត់ធ្ងន់ថា អភិបាលខេត្ត និងអភិបាលស្រុក ដែលប្រព្រឹត្តិខុសត្រូវចេញសារភាព ដើម្បីទទួលបានការបន្ធូរបន្ថយទោស ប៉ុន្តែពួកគេនៅជាប់ពិរុទ្ធភាព។
ជាមួយគ្នានេះ លោកនាយករដ្ឋមន្ត្រី ក៏បានបង្ហើបករណីលោក ឈួរ ច័ន្ទឌឿន អតីតអភិបាលខេត្តកំពង់ឆ្នាំង ដែលកាប់ទន្ទ្រានដីព្រៃលិចទឹក ២ពាន់ហិកតា មុនពេលអភិបាលខេត្តរូបនេះ ត្រូវបានផ្លាស់តួនាទីជាអនុរដ្ឋលេខាធិការក្រសួងអភិវឌ្ឍន៍ជនបទ កាលពីខែមិថុនា ឆ្នាំ២០២១កន្លងមក។ សម្ដេច បាននិយាយដូច្នេះ៖«ហើយខ្ញុំចេញបញ្ជាឱ្យដកយកដីត្រឡប់មកវិញទាំងអស់ នូវដីដែលត្រូវបានកាប់ទន្ទ្រានរួចហើយ ដូចជានៅខេត្តកំពង់ឆ្នាំង បើសិនជារបាយការណ៍នេះខុស ក៏ខ្ញុំសូមអធ្យាស្រ័យ។ ឮថាអតីតអភិបាលខេត្ត ដែលទើបចាកចេញពីតំណែង ក្នុងប៉ុន្មានខែមុននេះ បានកាប់បំផ្លាញយកដីប្រមាណជាង២ពាន់ហិកតាឯណោះ។ ដូច្នេះខ្ញុំមិនខ្វល់ថា វាជាដីរបស់អតីតអភិបាលខេត្តទេ ទោះបីថ្នាក់ណាក៏ដោយ ត្រូវតែប្រមូលយកនោះមកវិញទាំងអស់»។
សម្ដេច ហ៊ុន សែន បានប្រកាសមិនអត់ឱនឱ្យមន្ត្រីណា ដែលឆ្លៀតឱកាសប្រព្រឹត្តអំពើលោភលន់ខុសច្បាប់ ខណៈរដ្ឋាភិបាល កំពុងរវល់ប្រឹងប្រែងប្រយុទ្ធ និងទប់ស្កាត់ជំងឺកូវីដ-១៩ នេះទេ។ «អ្នកទាំងនេះ មិនសាកសមធ្វើជាមន្ត្រី តទៅទៀត ពួកគេដេកគុកប្រសើរជាងនៅធ្វើមន្ត្រី។ ហើយសុំកុំនិយាយថា ធ្វើការជួយបក្ស(ប្រជាជនកម្ពុជា) ជូនរដ្ឋយូរហើយ បែរជារដ្ឋ និងគណបក្សគ្មានការយោគយល់។ យើងគ្មានការយោគយល់ណា ចំពោះអំពើទុច្ចរិកបែបនេះ សម្រាប់មន្ត្រីរបស់យើងនោះទេ»។ នេះជាការបញ្ជាក់របស់សម្ដេច ហ៊ុន សែន ដែលនៅតែរក្សាជំហរបញ្ជាឱ្យសមត្ថកិច្ចចេញទៅអនុវត្តច្បាប់ លើករណីទន្ទ្រានដីព្រៃលិចទឹកនេះ ដោយម៉ឹងម៉ាត់ និងគ្មានការលើកលែង៕
© រក្សាសិទ្ធិដោយ thmeythmey.com