ជាតិ
នយោបាយជាតិ
សម្ដេចក្រុមព្រះ សោយទិវង្គត ក្នុងព្រះជន្ម៧៧វស្សា នៅប្រទេសបារាំង
× សម្ដេចក្រុមព្រះ នរោត្តម រណឫទ្ធិ បានសោយទិវង្គត ដោយរោគាពាធ ក្នុងព្រះជន្ម៧៧វស្សា នៅប្រទេសបារាំង នាព្រឹកម៉ោង១០ព្រឹក (ត្រូវម៉ោង៤រសៀល ម៉ោងនៅកម្ពុជា) នៅថ្ងៃទី២៨ វិច្ឆិកា។ នេះបើតាមលោក ចាប ញ៉ាលីវុធ ប្អូនប្រុសឪពុកទីទៃរបស់សម្ដេចក្រុមព្រះ។
លោក ចាប ញ៉ាលីវុធ បានប្រាប់សារព័ត៌មានថ្មីៗថា៖«ខ្ញុំទើបបានព័ត៌មានពីខាងស្រុកបារាំងថា ព្រះអង្គសោយទីវង្គតមែន »។ បើតាមលោក ចាប ញ៉ាលីវុធ សម្ដេចក្រុមព្រះធ្លាក់ព្រះកាយឈឺ ចាប់តាំងពីជួបគ្រោះថ្នាក់ចរាចរណ៍មក។ «តាំងពីគ្រោះថ្នាក់ចរាចរណ៍លើកមុនមក លោក(សម្ដេចក្រុមព្រះ)បានទៅពេទ្យព្យាបាលនៅថៃ ព្យាបាលចុះឡើងបានមកស្រុកខ្មែរយើង ហើយលោកគិតពីសុខភាពថា មិនល្អ ក៏ទៅព្យាបាលនៅបារាំងរហូតមក»។ នេះបើតាមលោក ចាប ញ៉ាលីវុធ។
ចាប់តាំងជួបគ្រោះថ្នាក់ចរាចរណ៍លើកទី២នេះមក សម្ដេចក្រុមព្រះ ក៏ផ្អាកពីសកម្មភាពនយោបាយ រហូតមកដែរ ដោយសារមានបញ្ហាសុខភាព និងផ្លូវអារម្មណ៍ ក្រោយជួបគ្រោះផ្ទួនៗ។
កាលពីថ្ងៃទី១៧ ខែមិថុនា ២០១៨ សម្ដេចក្រុមព្រះ នរោត្ដម រណឫទ្ធិ ដែលជាប្រធានគណបក្សហ្វ៊ុនស៊ិនប៉ិច បានជួបគ្រោះថ្នាក់ចរាចរណ៍ជាលើកទី២ នៅលើផ្លូវជាតិលេខ ៤ ស្ថិតក្នុងស្រុកព្រៃនប់ ខេត្តព្រះសីហនុ នៅពេលកំពុងធ្វើដំណើរចុះជួបអ្នកគាំទ្រគណបក្ស។ ព្រះអង្គត្រូវបានបញ្ជូនទៅសង្គ្រោះនៅឯមន្ទីរពេទ្យជាបន្ទាន់ ចំណែកជាយារបស់ព្រះអង្គ គឺអ្នកម្នាង អ៊ុក ផល្លា បាត់បង់ជីជីវិតក្នុងគ្រោះថ្នាក់ចរាចរណ៍នេះ។ គ្រោះថ្នាក់ចរាចរណ៍នេះ កើតឡើងក្រោយពេលរថយន្ដតាក់ស៊ី បានបើកជែងរថយន្ដមួយគ្រឿងទៀត ហើយបានរេចង្កូតទៅផ្លូវម្ខាងទៀតនៃក្បួនរថរថយន្តសម្ដេចក្រុមព្រះ។ កាលពីឆ្នាំ២០១៥ សម្ដេចក្រុមព្រះ និងអ្នកម្នាង អ៊ុក ផល្លា ក៏ធ្លាប់ជួបប្រទះគ្រោះថ្នាក់ចរាចរណ៍កម្រិតធ្ងន់ម្ដង អំឡុងពេលធ្វើដំណើរត្រឡប់មកពីជួបអ្នកគាំទ្រគណបក្សនៅឯខេត្តកំពង់ចាម ដោយមានរថយន្តធុនធំមួយគ្រឿង បើកចូលក្បួនរថយន្តព្រះអង្គ។
សម្តេចក្រុមព្រះ នរោត្តម រណឫទ្ធិ បានប្រឡូកនយោបាយ នៅឆ្នាំ១៩៨៩ ក្នុងតួនាទីអគ្គលេខាធិការគណបក្សហ្វ៊ុនស៊ិនប៉ិច មុននឹងឡើងជាប្រធានបក្សនៅឆ្នាំ១៩៩២ ។ ក្រោយគណបក្សហ្វ៊ុនស៊ិនប៉ិចឈ្នះឆ្នោត ព្រះអង្គក្លាយជានាយករដ្ឋមន្ត្រីទីមួយនៃកម្ពុជា ពីឆ្នាំ១៩៩៣ រហូតដល់ឆ្នាំ១៩៩៧ ។ ព្រះអង្គ ក៏ធ្លាប់ធ្វើជាប្រធានរដ្ឋសភាចន្លោះឆ្នាំ១៩៩៨ ដល់ងឆ្នាំ២០០៦ដែរ។
សម្តេចក្រុមព្រះបានលាលែងពីតំណែងប្រធានរដ្ឋសភា នៅខែមីនា ២០០៦ ហើយបន្តធ្វើនយោបាយនៅគណបក្សហ្វ៊ុនស៊ិនប៉ិច រហូតដល់ខែតុលា ឆ្នាំ២០០៦ ព្រះអង្គត្រូវបានបណ្តេញចេញប្រធានគណបក្ស។ មួយខែក្រោយមក ព្រះអង្គបានបង្កើតគណបក្សនរោត្តម រណឫទ្ធិ (គនរ)។ ព្រះអង្គក៏ធ្លាប់រងការចោទប្រកាន់និងការផ្តន្ទាទោសព្រះអង្គពីបទកេងបន្លំលួច (ប្រាក់) ដែលធ្វើឱ្យព្រះអង្គនិរទេសទៅក្រៅប្រទេស រហូតដល់ខែកញ្ញា ឆ្នាំ២០០៨ ទើបព្រះអង្គបានចូលស្រុកវិញ ក្រោយទទួលបានការលើកលែងទោសនិងចូលប្រឡូកការងារនយោបាយវិញ។ ភាពមិនចុះសម្រុងក្នុងបក្ស បានធ្វើឱ្យព្រះអង្គត្រូវចេញទៅ បង្កើតគណបក្សតូចមួយឈ្មោះថា គណបក្សសង្គមរាស្ត្ររាជាធិបតេយ្យនៅឆ្នាំ២០១៤ មុនពេលបង្រួមចូលជាមួយហ្វ៊ុនស៊ិនប៉ិចម្តងទៀត ក្នុងខែមករា ឆ្នាំ២០១៥។ ព្រះអង្គក៏ត្រូវគេបោះឆ្នោតជ្រើសរើសជាប្រធានគណបក្សហ្វ៊ុនស៊ិនប៉ិចវិញ។
ព្រះអង្គម្ចាស់ នរោត្ត រណឫទ្ធិ ប្រសូតនៅថ្ងៃទី២ មករា ឆ្នាំ១៩៤៤។ ព្រះអង្គបានបញ្ចប់បរិញ្ញាបត្រនិងបរិញ្ញាបត្រជាន់ខ្ពស់ និងថ្នាក់បណ្ឌិតផ្នែកច្បាប់សាធារណៈ នៅក្នុងឆ្នាំ១៩៦៨ ឆ្នាំ១៩៦៩ នៅឆ្នាំ១៩៧៥ ពីសកលវិទ្យាល័យប្រូវេន (Provence) ប្រទេសបារាំង។ ព្រះអង្គក៏ធ្លាប់ធ្វើជាសាស្ត្រាចារ្យរងបង្រៀនមុខវិជ្ជាច្បាប់រដ្ឋធម្មនុញ្ញនិងសង្គមនយោបាយ នៅទីនោះផងដែរ។
ព្រះអង្គម្ចាស់ រណឫទ្ធិ មានបងប្អូនសរុប ១២ នាក់ដែលមកពីមាតាផ្សេងៗគ្នា ជាមួយសម្ដេចនរោត្តម សីហនុ ព្រះបរមរតនកោដ្ឋ។ មានតែនរោត្តម បុប្ផាទេវី(ចូលទីវង្គត កាលពីខែវិច្ឆិកា ឆ្នាំ២០១៩)ទេ ដែលជាបងបង្កើតតែមួយគត់របស់ព្រះអង្គ ចេញពីឧទរអ្នកម្នាង ផាត់ កាញ៉ុល និងសម្ដេចព្រះនរោត្តម សីហនុ ព្រះបរមរតនកោដ្ឋ។
ព្រះអង្គ រណឫទ្ធិ បានរៀបអភិសេភជាមួយអ្នកម្នាង អេង ម៉ារី ដែលជាភរិយាដំបូងរបស់ព្រះអង្គនៅដើមឆ្នាំ១៩៦៨។ ព្រះអង្គ និងអ្នកម្នាង អេង ម៉ារី មានបុត្របីអង្គ ព្រះនាម ចក្រាវុឌ្ឍ (ប្រសូតឆ្នាំ១៩៧០), សីហឫទ្ធិ (ប្រសូតឆ្នាំ១៩៧២) និងរតនាទេវី (ប្រសូតឆ្នាំ១៩៧៤)។ ព្រះអង្គក៏មានបុត្រាពីរអង្គទៀត ជាមួយអ្នកម្នាង អ៊ុក ផល្លា (មរណភាពនៅឆ្នាំ២០១៨) ដែរ ព្រះនាម សុធារិទ្ធ (ប្រសូតឆ្នាំ២០០៣) និងរ៉ាណាវង្ស (ប្រសូតឆ្នាំ២០១១)៕
© រក្សាសិទ្ធិដោយ thmeythmey.com