សង្គមស៊ីវិល អាចជួបជុំគ្នាប្រារព្ធទិវាសិទ្ធិមនុស្សអន្តរជាតិ តែមិនត្រូវឲ្យលើស២០០នាក់ឡើយ

ច្បាប់ / សិទិ្ធមនុស្ស / តុលាការ

ជាតិ

សង្គមស៊ីវិល អាចជួបជុំគ្នាប្រារព្ធទិវាសិទ្ធិមនុស្សអន្តរជាតិ តែមិនត្រូវឲ្យលើស២០០នាក់ឡើយ

03, Dec 2021 , 4:21 pm

រូបភាព

កិច្ចប្រជុំរវាងអាជ្ញាធរសាលារាជធានីភ្នំពេញ និង តំណាងអង្គការស៊ីវិល (រូបពីអង្គការអាដហុក)

ដោយ: ថ្មីៗ

អាជ្ញាធររាជធានីភ្នំពេញ អនុញ្ញាតឲ្យអង្គការសង្គមស៊ីវិល ប្រមូលផ្តុំគ្នាប្រារព្ធទិវាសិទ្ធិមនុស្សអន្តរជាតិលើក៧៣ នៅថ្ងៃទី១០ ខែធ្នូ ឆ្នាំ២០២១។ ការអនុញ្ញាតនេះ ធ្វើឡើងបន្ទាប់អាជ្ញាធររាជធានីភ្នំពេញ បានជួបពិភាក្សាគ្នាជាមួយតំណាងអង្គការស៊ីវិល នៅថ្ងៃទី៣ ខែធ្នូ ឆ្នាំ២០២១។ អង្គការសង្គមស៊ីវិល បានដាក់សំណើទៅកាន់សាលារាជធានីភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០២១ ស្តីពីការសុំរៀបចំទិវាសិទ្ធិមនុស្សអន្តរជាតិនេះ។

ទិវាសិទ្ធិមនុស្សអន្តរជាតិលើកទី៧៣ នឹងត្រូវរៀបចំឡើងនៅទីលានប្រជាធិបតេយ្យ ស្ថិតនៅសង្កាត់ឫស្សីកែវ ខណ្ឌឬស្សីកែវ។ អង្គការអាដហុក ផ្សាយលើគេហទំព័ររបស់ខ្លួនថា អ្នកចូលរួមក្នុងពិធីនេះ គឺមានត្រឹម២០០នាក់ប៉ុណ្ណោះ។

អង្គការអាដហុក លើកឡើងថា មុនដំបូង ក្រុមអង្គការសង្គមស៊ីវិល គ្រោងរៀបចំអ្នកចូលរួមចំនួន៥០០នាក់ ប៉ុន្តែដោយសារទីតាំងទីលានប្រជាធិបតេយ្យ ត្រូវបានទីភ្នាក់ងារសហប្រតិបត្តិការអន្តរជាតិជប៉ុន (អង្គការ JICA) ស្នើសុំមួយផ្នែក ដើម្បីដាក់ការដ្ឋាន ដែលមិនអាចដាក់អ្នកចូលរួមដល់៥០០នាក់បាន ហើយរួមទាំងការបារម្ភពីបញ្ហារីករាលដាលនៃជំងឺឆ្លងកូវីដ-១៩ផងនោះ ទើបអង្គការសង្គមស៊ីវិល យល់ព្រមតាមការលើកឡើងរបស់សាលារាជធានីភ្នំពេញ ដោយអនុញ្ញាតឲ្យមានអ្នកចូលរួមត្រឹមតែ២០០នាក់។

បើតាមអង្គការអាដហុកដដែល ការប្រារព្ធទិវាសិទ្ធិមនុស្សអន្តរជាតិ នឹងត្រូវដំណើរការទៅក្រោមការគោរពតាមគោលការណ៍ណែនាំរបស់ក្រសួងសុខាភិបាល ក្នុងការទប់ស្កាត់ជំងឺកូវីដ-១៩ និងមានការជួយការពារសន្តិសុខ ពីសំណាក់អាជ្ញាធរ៕