ស្ថានទូតចិនប្រចាំនៅកម្ពុជា បានចេញផ្សាយលើទំព័រហ្វេសប៊ុកកាលពីថ្ងៃទី២ ធ្នូថា គិតចាប់ពីខែមករាដល់ខែតុលា ក្នុងឆ្នាំនេះ ទំហំពាណិជ្ជកម្មទ្វេភាគីរវាងកម្ពុជានិងចិន កើនដល់ ៨៩៣១លានដុល្លារ។ ក្នុងនោះ ទំហំនៃការនាំចេញរបស់កម្ពុជាទៅកាន់ប្រទេសចិនមានប្រមាណ ១២២២លានដុល្លារ គឺមានកំណើន៤៩ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។ ចំណែក ទំហំនៃការនាំចូលពីប្រទេសចិនមកកាន់កម្ពុជាវិញ មានប្រមាណ ៧៧០៩លានដុល្លារ គឺមានកំណើន ៣៧ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។
 

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានបង្ហាញថា ពាណិជ្ជកម្មទ្វេភាគីរវាងកម្ពុជា-ចិននៅតែមានកំណើនកើនឡើង ទោះបីជាស្ថិតក្នុងបរិបទជំងឺកូវីដ១៩ក៏ដោយ។ លោកបន្ថែមថា៖«ការកើនឡើងនេះ បង្ហាញឱ្យឃើញពីភាពខ្លាំងក្លា និងឥទ្ធិពលនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ»។  
 

សូមជម្រាបថា កម្ពុជានិង​ចិន បាន​ចុះកិច្ចព្រមព្រៀង​ពាណិជ្ជកម្មសេរី (ATF) ​កាលពី​ថ្ងៃទី១២តុលា ឆ្នាំ២០២០ ហើយនឹងចូលជា​ធរមាន​នៅ​ខែមករា ឆ្នាំ២០២២៕