អន្តរជាតិ
បន្ទុះភ្នំភ្លើង Semeru ៖ អ្នកស្លាប់កើនដល់៣៤នាក់ ឯលោក វីដូដូ ប្ដេជ្ញាសាងសង់ហេដ្ឋារចនាសម្ព័ន្ធឡើងវិញឱ្យលឿន ប្រជាជនឥណ្ឌូណេស៊ី រស់រានពីហេតុការណ៍ផ្ទុះភ្នំភ្លើង Semeru ។ រូបថត AFP
× បន្ទុះភ្នំភ្លើង Semeru ចាប់ពីថ្ងៃទី៤ ខែធ្នូមក បណ្ដាលឱ្យមនុស្សស្លាប់កើនដល់៣៤នាក់ហើយ ខណៈប្រជាជនរាប់ពាន់នាក់ទៀតបានបាត់បង់ផ្ទះសម្បែង។ ប្រធានាធិបតីឥណ្ឌូណេស៊ី ចូកូ វីដូដូ បានទៅត្រួតពិនិត្យនៅតំបន់រងគ្រោះដោយផ្ទាល់ ហើយបានសន្យា សាងសង់តំបន់នេះឡើងវិញយ៉ាងរហ័សបំផុត។
ភ្នំភ្លើង Semeru ដែលជាភ្នំដែលខ្ពស់ជាងគេបង្អស់នៅកោះជ្វា បានផ្ទុះចេញកម្អែ និងផេះផង់យ៉ាងច្រើនចាប់ពីនៅថ្ងៃទី៤ ខែធ្នូ ហើយកំទេចកំទីចេញពីភ្នំភ្លើងបានគ្រប់ដណ្ដប់ភូមិក្បែរនោះ ដែលនៅភាគខាងកើតខេត្តជ្វា។ ហេតុការណ៍ការផ្ទុះនេះ បានបំផ្លាញស្ពានសំខាន់មួយដែលតភ្ជាប់តំបន់ពីរនៅក្នុងស្រុក Lumajang ក្បែរនោះជាមួយទីក្រុង Malang។ អគារ និងផ្ទះសម្បែងនៅតំបន់នោះក៏ត្រូវបានបំផ្លាញផងដែរ។
ប្រធានាធិបតីលោក ចូកូ វីដូដូ នៅថ្ងៃទី៧ ខែធ្នូ បានទៅពិនិត្យតំបន់ដែលប៉ះពាល់ដោយបន្ទុះ ភ្នំភ្លើងដែលស្ថិតនៅស្រុក Lumajang ភាគខាងកើតនៃខេត្តជ្វា ដើម្បីធានាថា រដ្ឋាភិបាលធ្វើការជាបន្ទាន់ក្នុងការជួយសង្គ្រោះប្រជាជនដែលត្រូវការជំនួយ។
ពេលទៅសួរសុខទុក្ខប្រជាជនដែលត្រូវបានជម្លៀសចេញពីតំបន់មានគ្រោះថ្នាក់ ហើយមកស្នាក់នៅលើទីលានបាល់ទាត់ដែលមានសុវត្ថិភាព លោក វីដូដូ បានសន្យាថា រដ្ឋាភិបាលនឹងសាងសង់ហេដ្ឋារចនាសម្ព័ន្ធតំបន់ខាងលើឡើងវិញរួមមានស្ពានដ៏សំខាន់ដែលតភ្ជាប់តំបន់ Lumajang ទៅកាន់ទីក្រុងផ្សេងទៀត ព្រមទាំងសាងសង់ផ្ទះប្រហែលជាង២៩៧០ខ្នងនៅតំបន់មានសុវត្ថិភាព។
បើតាមមន្ត្រីឥណ្ឌូណេស៊ី ពលរដ្ឋនៅក្នុងតំបន់ដែលរងគ្រោះខ្លាំងបំផុតនឹង ត្រូវផ្លាស់ប្តូរទីលំនៅក្នុងរយៈពេលប្រាំមួយខែខាងមុខ។ គ្រួសារនីមួយៗដែលនឹងត្រូវរង់ចាំផ្ទះថ្មី នឹងទទួលបានប្រាក់ចំនួនជាង៣៥ ដុល្លារក្នុងមួយខែ។
ជុំវិញមហន្តរាយនេះ មន្រ្តីទីភ្នាក់ងារកាត់បន្ថយគ្រោះមហន្តរាយឥណ្ឌូណេស៊ីលោក Abdul Muhari បញ្ជាក់ថា មនុស្សជាង១០០នាក់ត្រូវបានបញ្ជូនទៅមន្ទីរពេទ្យបន្ទាប់ ហើយ២២នាក់ក្នុងចំណោមនោះ រងរបួសធ្ងន់ធ្ងរដែលភាគច្រើនរលាកភ្លើង។ បន្ថែមពីនេះ ក្រុមអ្នកជួយសង្គ្រោះកំពុងបន្តស្វែងរកអ្នកភូមិចំនួន២២នាក់ដែលកំពុងបាត់ខ្លួន។ លោកបន្តថា ផ្ទះជិត៣ពាន់ខ្នង និងសាលារៀន៣៨ខ្នងត្រូវបានរងការខូចខាត ។
គិតត្រឹមថ្ងៃទី៧ ខែធ្នូ មនុស្សចំនួន៣៤នាក់បានស្លាប់ដោយសារការផ្ទុះភ្នំភ្លើងនេះ។
ទន្ទឹមនេះលោក Andris Rufianto Putro អ្នកសម្របសម្រួលក្នុងការឆ្លើយតបបន្ទាន់នៅកាកបាទក្រហមឥណ្ឌូណេស៊ីបានអះអាងថា ចំនួនអ្នកស្លាប់ និងបាត់ខ្លួន ត្រូវបានរំពឹងថា នឹងកើនឡើងដោយសារតំបន់នេះភាគច្រើនជាភ្នំ និងពិបាកក្នុងការស្វែងរក៕
© រក្សាសិទ្ធិដោយ thmeythmey.com