អន្តរជាតិ
នូវែលសេឡង់ គ្រោងចេញច្បាប់ហាមឃាត់លក់បារីឱ្យយុវជន
× រដ្ឋាភិបាលនូវែលសេឡង់ គ្រោងនឹងស្នើច្បាប់ហាមឃាត់មិនឱ្យលក់បារីជារៀងរហូតទៅដល់យុវជន។ នេះបើយោងតាមសេចក្ដីថ្លែងការណ៍មួយចេញនៅថ្ងៃទី៩ ខែធ្នូ។ រដ្ឋាភិបាលប្រទេសតំបន់អូសេអានីមួយនេះ អះអាងថា ការដាក់ស្នើច្បាប់នេះ ក៏ព្រោះវិធានការផ្សេងទៀតពិបាកនឹងសម្រេចបានគោលដៅបញ្ឃប់ការជក់បារី។
«យើងចង់ធ្វើឱ្យប្រាកដថា យុវជននឹងមិនចាប់ផ្ដើមជក់បារី ដូច្នេះយើងនឹងហាមឃាត់ការលក់ ឬការផ្គត់ផ្គង់ផលិតផលថ្នាំជក់ដល់ក្រុមយុវជំនាន់ថ្មី»។ អនុរដ្ឋមន្ត្រីក្រសួងសុខាភិបាលនូវែលសេឡង់ Ayesha Verrall បានថ្លែងបែបនេះនៅក្នុងសេចក្តីថ្លែងការណ៍ថ្ងៃទី៩ ខែធ្នូ។
ទន្ទឹមនេះ រដ្ឋាភិបាលក៏នឹងដាក់កម្រិតចំពោះទីកន្លែងណាដែលអាចនៅលក់បារី ហើយនឹងកាត់បន្ថយហាងលក់បារីឱ្យយ៉ាងតិចបំផុតឱ្យនៅក្រោម៥០០ហាងតែប៉ុណ្ណោះ។ លើសពីនេះកម្រិតជាតិនីកូទីននៅក្នុងបារីទាំងអស់ដែលដាក់លក់នឹងត្រូវកាត់បន្ថយផងដែរ។
ជុំវិញច្បាប់នេះ រដ្ឋាភិបាលនឹងពិគ្រោះជាមួយក្រុមការងារសុខាភិបាលជនជាតិ Maori នៅប៉ុន្មានខែ ខាងមុខមុនពេលបញ្ជូនច្បាប់ទៅសភាក្នុងខែមិថុនា ឆ្នាំ២០២២ ហើយមានគោលបំណងបង្កើតច្បាប់នេះឱ្យបាននៅចុងឆ្នាំ២០២២ផងដែរ។ ក្រោមច្បាប់នេះ ប្រជាជននូវែលសេឡង់ដែលកើតក្រោយឆ្នាំ ២០០៨ នឹងមិនអាចទិញបារី ឬផលិតផលថ្នាំជក់ពេញមួយជីវិតរបស់ពួកគេ។ ការណ៍នេះធ្វើឱ្យឧស្សាហកម្មថ្នាំជក់ និងការលក់រាយនៅនូវែលសេឡង់រងការរឹតបន្តឹងយ៉ាងធ្ងន់ធ្ងរ។
បច្ចុប្បន្ន រដ្ឋាភិបាលនូវែលសេឡង់ បានអនុវត្តវិធានការដែលមានស្រាប់ដូចជាការវេចខ្ចប់កញ្ចប់បារីដោយបង្ហាញពីផលវិបាកនៃការជក់បារី និងការយកពន្ធលើការលក់បារីជាដើម៕
© រក្សាសិទ្ធិដោយ thmeythmey.com