Ericksen បានដួលសន្លប់ដោយសារគាំងបេះដូង អំឡុងការប្រកួតរវាងអាណឺម៉ាក និងហ្វាំងឡង់ កាលពីខែមិថុនា ក្នុងពានរង្វាន់ទ្វីបអឺរ៉ុប។ អតីតកីឡាករ Spurs រូបនេះ ត្រូវបានក្រុមគ្រូពេទ្យជួយសង្រ្គោះភ្លាមៗនៅលើទីលាន មុនបញ្ជូនទៅកាន់មន្ទីពេទ្យ។
 

នៅថ្ងៃទី៣ ខែធ្នូ ខ្សែបម្រើវ័យ២៩ឆ្នាំរូបនេះ បានចូលហ្វឹកហាត់វិញជាមួយក្លិបចាស់ Odense ក្នុងប្រទេសដាណឺម៉ាកជាលើកដំបូង ក្រោយជោគជ័យពីការវះកាត់បញ្ហាបេះដូង។ យ៉ាងណាក៏ដោយ មកទល់ពេលនេះមិន​ទាន់​មាន​ការ​បញ្ជាក់​ថា​តើ Eriksen នឹង​បន្ត​អាជីព​របស់ខ្លួនជាមួយក្លិបណានោះទេ ស្របពេល Inter Milan នឹងបញ្ចប់កិច្ចសន្យាជាមួយគេ។
 

ច្បាប់ក្នុងលីគបាល់ទាត់អ៊ីតាលី Serie A កីឡាករណាដែលមានបញ្ហាបេះដូង ឬជំងឺធ្ងន់ធ្ងរ ក្លិបមិនអនុញ្ជាតឱ្យចូលរួមទៀតឡើយ។ Inter Milan ដែល​មិន​អាច​ប្រើប្រាស់ Eriksen ​បានទៀតនោះ នឹងឈានដល់កិច្ចព្រមព្រៀងបញ្ចប់កិច្ចសន្យាជាមួយគ្នាឆាប់ៗនេះ។ នេះបើតាមការផ្សាយរបស់កាសែត BBC។
 

Eriksen បានចាកចេញពី Spurs ទៅចូលរួមជាមួយក្រុមអ៊ីតាលី Inter Milan កាលពីខែមករា ឆ្នាំ ២០២០ ក្នុងកិច្ចសន្យារយៈពេល ៤ ឆ្នាំកន្លះ។ កិច្ចសន្យារបស់ Eriksen ជាមួយ Inter Milan នៅសល់សុពលភាពជាង៣ឆ្នាំទៀត៕