កម្ពុជា បានអរគុណវៀតណាមវិញ ចំពោះការផ្តល់ជំនួយឧបត្ថម្ភ និងការគាំទ្រយ៉ាងមុតមាំដល់កម្ពុជាទាំងពេលកន្លងមក ទាំងពេលបច្ចុប្បន្ន។ កម្ពុជា ប្រាប់វៀតណាមថា កម្ពុជា «នឹងចងចាំជានិច្ច» ចំពោះជំនួយរបស់កងទ័ពវៀតណាម ដែលផ្តល់ដល់ប្រជាជនកម្ពុជា ក្នុងការរំដោះប្រទេសចេញពីរបបខ្មែរក្រហម នៅឆ្នាំ១៩៧៩។   
 

បន្ថែមពីនេះ កម្ពុជា-វៀតណាម បានឯកភាពគ្នាលើការពង្រឹងកិច្ចសហប្រតិបត្តិការលើវិស័យសុខភាពសាធារណៈ។ លោក ង្វៀន សួនហ៊្វុន ដែលជាមេដឹកនាំកំពូលរបស់វៀតណាម បានបញ្ជាក់សាជាថ្មីថា វៀតណាម នឹងបន្តផ្តល់ការថែទាំសុខភាព និងការព្យាបាលអ្នកជំងឺជាប្រជាជនកម្ពុជា ដែលទៅរកសេវាសុខាភិបាល នៅមន្ទីរពេទ្យ ប្រទេសវៀតណាម «ឲ្យប្រហាក់ប្រហែលនឹងអ្នកជំងឺជាប្រជាជនវៀតណាម» ដែរ ហើយការបង់ប្រាក់ គឺស្របតាមគោលការណ៍របស់ប្រទេសវៀតណាម៕