អាម៉េរិក នៅក្នុងខែកក្កដាកន្លងទៅ បានដាក់ទណ្ឌកម្មលើមន្រ្តីចិនចំនួន ៧រូប ក្នុងនោះរួមទាំង នាយករងចំនួន៥រូបនៃការិយាល័យកិច្ចការហុងកុងរបស់រដ្ឋាភិបាលចិន។ ការដាក់ទណ្ឌកម្មនេះ ត្រូវបានអ្នកនាំពាក្យក្រសួងការបរទេសចិន លោក Zhao Lijian ចាត់ទុកជាការទប់ស្កាត់ឥទ្ធិពលចិន តាមរយៈការប្រើសន្លឹកបៀហុងកុង។ 

 

ជាការឆ្លើយតបនឹងទង្វើខុសឆ្គងរបស់ក្រុងវ៉ាស៊ីនតោន រដ្ឋាភិបាលក្រុងប៉េកាំង នៅថ្ងៃទី៣០ ខែធ្នូ បានសម្រេចដាក់ទណ្ឌកម្មសងសឹក ដោយផ្អែកតាមច្បាប់ប្រឆាំងទណ្ឌកម្មបរទេស លើមន្រ្តីអាម៉េរិកចំនួន ៥រូប។ មន្រ្តីទាំង ៥រូបនោះ​ត្រូវបានហាមឃាត់ចូលក្នុងទឹកដីចិន រួមទាំងហុងកុង ម៉ាកាវ, បង្កកទ្រព្យសម្បត្តិ និងហាមឃាត់ប្រជាជនចិន ឬស្ថាប័នចិន មានទំនាក់ទំនងរកស៊ីជាមួយបុគ្គលទាំងនោះ។ 

 

បុគ្គលទាំង ៥រូប មានដូចជា លោក Wilbur Ross អតីតរដ្ឋមន្រ្តីពាណិជ្ជកម្ម, អ្នកស្រី Carolyn Bartholomew ប្រធានគណៈកម្មការពិនិត្យសន្តិសុខ និងសេដ្ឋកិច្ចចិន-អាម៉េរិក, លោក Jonathan Stivers ប្រធានបុគ្គលិកនៃគណៈកម្មការសភាលើចិន, លោក DoYun Kim មកពីវិទ្យាស្ថានប្រជាធិបតេយ្យសម្រាប់កិច្ចការអន្តរជាតិ និងលោក Adam Joseph King អ្នកគ្រប់គ្រងជាន់ខ្ពស់នៃកម្មវិធីវិទ្យាស្ថានសាធារណរដ្ឋអន្តរជាតិ។ 

 

ជាមួយគ្នានេះ លោក Zhao ក៏បានជំរុញឱ្យអាម៉េរិកបញ្ឈប់ការជ្រៀតជ្រែកកិច្ចការផ្ទៃក្នុង ហើយចិននឹងចាត់វិធានការគ្រប់ទាំងអស់ ដើម្បីការពារផលប្រយោជន៍ជាតិ និងសេចក្តីថ្លៃថ្នូរ។

 

សូមបញ្ជាក់ថា រដ្ឋាភិបាលក្រុងវ៉ាស៊ីនតោន និងក្រុងប៉េកាំង តែងដាក់ទណ្ឌកម្មសងសឹកគ្នាទៅវិញទៅទៅ។ អាម៉េរិក និងចិន តែងឈ្លោះគ្នាជុំវិញបញ្ហាលទ្ធិប្រជាធិបតេយ្យនៅហុងកុង,​ សិទ្ធិមនុស្សនៅតំបន់ស៊ីនជាំង, សមុទ្រចិនខាងត្បូង និងបញ្ហាផ្សេងទៀត៕