អ្នកស្លាប់ ដោយសារគ្រោះថ្នាក់ចរាចរណ៍ក្នុងឆ្នាំ២០២១ មាន១៤៩៧នាក់។ អ្នកស្លាប់ ដោយសារគ្រោះថ្នាក់ចរាចរណ៍ក្នុងឆ្នាំ២០២០ មាន១៦៤៦នាក់។ ចំនួនអ្នកស្លាប់ ថយចុះ១៤៩នាក់ ស្មើ៩ភាគរយ។ 

 

អ្នករបួស ដោយសារគ្រោះថ្នាក់ចរាចរណ៍ក្នុងឆ្នាំ២០២១ មាន៣៦១៥នាក់។ អ្នករបួស ដោយសារគ្រោះថ្នាក់ចរាចរណ៍ក្នុងឆ្នាំ២០២០ មាន៤៦៨៦នាក់។ ចំនួនអ្នករបួស ថយចុះ១០៧១នាក់ ស្មើ២៣ភាគរយ។ 

 

របាយការណ៍អំពីគ្រោះថ្នាក់ចរាចរណ៍ប្រចាំឆ្នាំ២០២១ ត្រូវបានសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បង្ហោះលើបណ្តាញទំព័រហ្វេសប៊ុករបស់ខ្លួន កាលពីថ្ងៃទី៣១ ខែធ្នូ ឆ្នាំ២០២១។ សម្តេច សរសេរដូច្នេះថា៖«ការថយចុះគ្រោះថ្នាក់ចរាចរណ៍ អាត្រាអ្នកស្លាប់ និងអ្នករងរបួសនេះ បានបង្ហាញពីមោទនភាពនៃការចូលរួមរបស់បងប្អូនប្រជាពលរដ្ឋទាំងអស់ ក្នុងការគោរពច្បាប់ស្ដីពីចរាចរណ៍ផ្លូវគោក និងសមត្ថកិច្ចគ្រប់លំដាប់ថ្នាក់ ដែលបានប្រតិបត្តិការអនុវត្តច្បាប់ស្ដីពីចរាចរណ៍ផ្លូវគោកដោយស្មារតីវិជ្ជាជីវៈយ៉ាងសកម្ម»។

 

តាមរយៈសារលើទំព័រហ្វេសប៊ុក សម្តេចប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ជម្រាបទៅប្រជាពលរដ្ឋថា ទោះបីជាគ្រោះថ្នាក់ចរាចរណ៍ មានការថយចុះក្តី ប៉ុន្តែស្ថានភាពគ្រោះថ្នាក់ចរាចរណ៍នៅពេលនេះ នៅតែជាសោកនាដកម្ម ដោយធ្វើឲ្យមនុស្សច្រើនរាប់ពាន់នាក់ក្នុង១ឆ្នាំៗ បានបាត់បង់ជីវិត រងរបួស និង ខូចខាតទ្រព្យសម្បត្តិ។ 

 

សម្តេច បន្ថែមថា មូលហេតុនៃគ្រោះថ្នាក់ចរាចរណ៍នៅឆ្នាំ២០២១នេះ គឺដោយសារការបើកបរដោយល្បឿនលឿន មាន៣៨ភាគរយ ការមិនគោរពសិទ្ធ មាន២៤ភាគរយ ការមិនប្រកាន់ស្តាំ មាន១៤ភាគរយ ការប្រជែងគ្រោះថ្នាក់ មាន៨ភាគរយ ការបត់ឆ្វេង-ស្តាំមិនប្រយ័ត្ន មាន៨ភាគរយ ការបើកបរដោយស្ថានភាពស្រវឹង មាន៤ភាគរយ កត្តាយានយន្តមាន ៣ភាគរយ និង ការបើកបរដោយស្ថានភាពងងុយ មាន១ភាគរយ។ 

 

សម្តេចរដ្ឋមន្រ្តីមហាផ្ទៃ បន្តអំពាវនាវឲ្យប្រជាពលរដ្ឋ រក្សាស្មារតីគោរព និងអនុវត្តច្បាប់ស្ដីពីចរាចរណ៍ផ្លូវគោកឲ្យបានគ្រប់ពេលវេលា ក្នុងការធ្វើដំណើរលើដងផ្លូវ។ ជាមួយគ្នានេះ សម្តេច បានក្រើនរម្លឹកសមត្ថកិច្ចទាំងអស់ ដែលប្រតិបត្តិការអនុវត្តច្បាប់ចរាចរណ៍ បង្កើនការបន្តរឹតបន្តឹងការអនុវត្តច្បាប់ចរាចរណ៍ ដោយគ្មានការលើកលែង ឬយោគយល់អ្វីឡើយ។ បន្ថែមពីនេះទៀត សម្តេច ប្រាប់ស្ថាប័នពាក់ព័ន្ធទាំងអស់ ឲ្យរៀបចំដាក់គំនូសសញ្ញា ភ្លើងសញ្ញានិង និង ស្លាកសញ្ញាចរាចរណ៍ផ្សេងៗ ឲ្យបានគ្រប់គ្រាន់ ព្រមទាំងផ្សព្វផ្សាយជាប្រចាំពីច្បាប់ចរាចរណ៍៕