កូរ៉េខាងត្បូង នៅថ្ងៃទី៩ ខែមីនា នឹងរៀបចំការបោះឆ្នោតប្រធានាធិបតី។ បេក្ខជន ដែលចូលរួមក្នុងការបោះឆ្នោតប្រធានាធិបតីកូរ៉េខាងត្បូង មានចំនួន ៤រូប ក្នុងនោះមានដូចជា លោក Lee Jae-myung មកពីបក្សប្រជាធិបតេយ្យ (DP) ដែលបក្សកាន់អំណាចនៅកូរ៉េខាងត្បូង, លោក Yoon Suk-yeol មកពីបក្សអំណាចប្រជាជន (PPP), លោក Ahn Cheol-soo មកពីបក្សប្រជាជន និងអ្នកស្រី Sim Sang-jeung មកពីបក្សយុត្តិធម៌។ ក្នុងចំណោមបេក្ខភាពទាំង ៤រូបនេះ លោក Lee Jae-myung និងលោក Yoon Suk-yeol ហាក់មានប្រជាប្រិយភាពជាងគេ។ ប្រធានាធិបតីកូរ៉េខាងត្បូង អាចកាន់អំណាចបានត្រឹមតែ ១អាណត្តិ ក្នុងរយៈពេល ៥ឆ្នាំប៉ុណ្ណោះ។ 

 

 

គណៈកម្មការបោះឆ្នោតហុងកុង ដែលភាគច្រើននៃសមាជិកមាននិន្នាការទៅរកក្រុងប៉េកាំង នៅក្នុងខែមីនា នឹងជ្រើសតាំងប្រធានប្រតិបត្តិក្រុងហុងកុងថ្មី។ អាណត្តិរបស់លោកស្រីការី ឡាំ នឹងបញ្ចប់នៅក្នុងខែកក្កដាខាងមុខ។ 

 

 

ហ្វីលីពីន នៅក្នុងខែឧសភា នឹងរៀបចំការបោះឆ្នោតប្រធានាធិបតី សម្រាប់អាណត្តិរយៈពេល ៦ឆ្នាំខាងមុខ។ បេក្ខភាពប្រធានាធិបតី ក្នុងអាណត្តិថ្មីនេះ មានដូចជា លោក Bongbong Marcos ដែលជាកូនប្រុសទីពីររបស់លោក Ferdinand Marcos Sr, អតីតកីឡាប្រដាល់អាស៊ីដ៏ល្បី លោក ម៉ានី ប៉ាគីអៅ (Manny Pacquiao), លោក Ernesto Abella អតីតអ្នកនាំពាក្យរបស់លោករ៉ូឌ្រីហ្គោ ឌូទើតេ ប្រធានាធិបតីហ្វីលីពីន និងបុគ្គលសំខាន់ៗផ្សេងទៀត។ 

 

 

អាស៊ាន នៅក្នុងខែសីហា នឹងប្រារព្ធខួបបង្កើតអាស៊ានលើកទី៥៥។ ស្របគ្នានេះ អាស៊ាន កំពុងប្រឈមបញ្ហាជាច្រើន ដែលត្រូវដោះស្រាយ ក្នុងនោះ មានដូចជាវិបត្តិនយោបាយនៅមីយ៉ាន់ម៉ា ជំងឺកូវីដ-១៩ ការជួញដូរមនុស្ស និងឧក្រិដ្ឋកម្មឆ្លងដែន ក៏ដូចជាបញ្ហាបម្រែបម្រួលអាកាសធាតុជាដើម។ 

 

 

បក្សកុម្មុយនីស្តចិន នឹងបើកមហាសន្និបាតលើកទី២០ នៅក្នុងខែតុលា។ លោកស៊ី ជិនភីង ត្រូវបានរំពឹងថា នឹងជ្រើសតាំងជាអគ្គលេខាធិការបក្សសម្រាប់៥ឆ្នាំខាងមុខទៀត។ គោលនយោបាយលើបញ្ហាសេដ្ឋកិច្ច និងវិស័យផ្សេងទៀត ក៏ត្រូវបានអនុម័តក្នុងសមាជដ៏ធំនេះដែរ។