អន្តរជាតិ
លោក Sokhary Chau អតីតជនភៀសខ្លួនខ្មែរ ជាប់ជាអភិបាលក្រុង Lowell លោក Sokhary Chau គឺជាជនជាតិអាម៉េរិក ដើមកំណើតខ្មែរដំបូង បានកាន់តំណែងជាអភិបាលក្រុង Lowell។ រូបភាព៖ AP
× លោក Sokhary Chau ជាជនជាតិអាម៉េរិក ដើមកំណើតខ្មែរដំបូង បានកាន់តំណែងជាអភិបាលក្រុង Lowell ក្នុងរដ្ឋ Massachusetts របស់អាម៉េរិក។ លោកជាជនភៀសខ្លួនគេចពីសង្រ្គាមទៅអាម៉េរិក។
ជាជនភៀសខ្លួនពីសម័យខ្មែរក្រហម លោក Sokhary Chau បានក្លាយជាជនជាតិអាម៉េរិកដើមកំណើតខ្មែរដំបូង ចូលកាន់តំណែងជាអភិបាលក្រុង Lowell ដែលមានជនភៀសខ្លួនកម្ពុជាជាច្រើន។
«ខ្ញុំធ្លាប់ជាជនភៀសខ្លួន ពេលនេះ ខ្ញុំជាអភិបាលក្រុងមួយ នៅក្នុងរដ្ឋMassachusetts»។ លោក Sokhary ដែលមានវ័យ ៤៩ឆ្នាំ បានសាទរបែបនេះបន្ទាប់ពីស្បថចូលកាន់តំណែងជាអភិបាលក្រុង បន្ទាប់ពីក្រុមប្រឹក្សាក្រុងនេះបោះឆ្នោតគាំទ្រលោកដោយសំឡេងឯកច្ឆន្ទ។
តាមការចុះផ្សាយរបស់ទីភ្នាក់ងារព័ត៌មាន AP ក្រុងLowell គឺជាក្រុងមួយ ដែលមានប្រជាជនរស់នៅប្រមាណជាង១១ម៉ឺននាក់។ ប្រជាជន ដែលមានដើមកំណើតខ្មែរ ក៏រស់នៅក្នុងក្រុងនេះច្រើនដែរ។
ក្នុងឱកាសនោះ លោក Sokhary ក៏បានរំលឹកពីប្រវត្តិ ក្នុងនាមជាជនភៀសខ្លួនផងដែរ។ លោក Sokhary មានឪពុកជាអនុសេនីយ៍ឯកនៅក្នុងយោធាកម្ពុជា ដែលត្រូវបានខ្មែរក្រហមប្រហារជីវិតនៅក្នុងឆ្នាំ ១៩៧៥ ។ ចំណែកម្តាយរបស់លោក ដែលបានទទួលមរណភាពនៅឆ្នាំ២០២១ បានចិញ្ចឹមកូនរហូតដល់ ៧នាក់ និងបាននាំកូនមកដល់ទឹកដីអាម៉េរិក ដោយសុវត្ថិភាព។
លោក Sokhary បានមកដល់ទឹកដីអាម៉េរិកដំបូងក្នុងវ័យ ៩ឆ្នាំ និងបានតាំងលំនៅក្នុងក្រុង Pittsburgh រដ្ឋ Pennsylvania ក្រោមការជួយពីព្រះវិហារសាសនាគ្រិស្ត។ លោកបានទទួលអាហារូបករណ៍នៅសាលា Phillips Academy មុននឹងបន្តការសិក្សានៅមហាវិទ្យាល័យMacalester ក្នុងរដ្ឋMinnesota។ នៅមហាវិទ្យាល័យនេះ លោកបានសិក្សាផ្នែក វិទ្យាសាស្រ្តនយោបាយ និងសេដ្ឋកិច្ច ក្នុងនាមជានិស្សិតអាហារូបករណ៍៕
© រក្សាសិទ្ធិដោយ thmeythmey.com