ការតវ៉ានៅក្រុង Almaty របស់កាហ្សាក់ស្ថាន បានចាប់ផ្តើមឡើងនៅថ្ងៃទី២ ខែមករា និងបានវិវដ្តជាកុបកម្ម បន្ទាប់ពីមានដុតអាគាររដ្ឋជាច្រើនកន្លែង។ ដោយសារភាពចលាចលកើតឡើងនៅក្នុងប្រទេស ប្រធានាធិបតីកាហ្សាក់ស្ថាន Kassym-Jomart Tokayev បានប្រកាសដាក់ប្រទេសក្នុងស្ថានភាពអាសន្នរយៈពេលពីរសប្តាហ៍ និងស្នើសុំជំនួយពីអង្គការសន្ធិសញ្ញាសន្តិសុខ​សមូហភាព (CSTO) ដើម្បីរក្សាស្ថិរភាពក្នុងប្រទេស។ តាមការស្នើសុំនេះ កងឆត្រយោងរុស្ស៊ី បានទៅដល់កាហ្សាក់ស្ថានហើយ ក្រោមបេសកកម្ម «ថែរក្សាសន្តិភាព»។ កងកម្លាំងប្រមាណ ២៥០០នាក់ នៃ CSTO នឹងត្រូវបញ្ជូនទៅកាហ្សាក់ស្ថាន។ 

 

ចាប់តាំងពីការតវ៉ាផ្ទុះឡើងនៅដើមខែមករា មនុស្សជាច្រើននាក់ បានបាត់បង់ជីវិតក្នុងនោះរួមទាំងកម្លាំងសន្តិសុខ និងប៉ូលិសកាហ្សាក់ស្ថានផង។ តាមការចុះផ្សាយរបស់ទីភ្នាក់ងារព័ត៌មាន Interfax កម្លាំងសន្តិសុខកាហ្សាក់ស្ថានចំនួន ១៨រូប បានបាត់បង់ជីវិត ខណៈ៧៤៨នាក់ផ្សេងទៀត រងរបួស។ 

 

ស្របគ្នានេះ កុបករជាច្រើននាក់ បានបាត់បង់ជីវិត ខណៈកុបករផ្សេងទៀត​ ត្រូវបានចាប់ខ្លួន និងរបួស។ ក្រសួងមហាផ្ទៃកាហ្សាក់ស្ថាន បានបញ្ចេញរបាយការណ៍ថា មនុស្សចំនួន ២២៩៨នាក់ ត្រូវបានចាប់ខ្លួន ក្នុងពេលតវ៉ា។ លើសពីនេះ អ្នកតវ៉ាច្រើនជាង ១ពាន់នាក់ បានរបួស ដោយក្នុងនោះមនុស្ស ៤០០នាក់ ត្រូវបានព្យាបាលនៅមន្ទីរពេទ្យ និង៦២នាក់​ស្ថិតក្នុងបន្ទប់សង្រ្គោះបន្ទាន់។ 

 

ការតវ៉ាដែលផ្ទុះឡើងនៅដើមខែមករា​ បានកើតឡើងដោយសារតែតម្លៃប្រេងឡើងថ្លៃ និងការមិនពេញចិត្តចំពោះលោក Nursultan Nazarbayev អតីតប្រធានាធិបតី ដែលបានបន្តក្ដាប់អំណាចក្នុងតំណែងជាប្រធានក្រុមប្រឹក្សាសន្តិសុខជាតិ។ ស្របពេលបាតុកម្មផ្ទុះឡើងបែបនេះ រដ្ឋាភិបាលកាហ្សាក់ស្ថាន បានកាត់ផ្តាច់អ៊ីនធឺណិតនៅក្នុងប្រទេស និងធ្វើឱ្យប៉ះពាល់ដល់ប្រជាជនដែលរកស៊ីជីក Bitcoin តាមអ៊ីនធឺណិតយ៉ាងខ្លាំង។ 

 

មកទល់ពេលនេះ សហគមន៍អន្តរជាតិ កំពុងតាមដានស្ថានការណ៍វិវដ្តនៅកាហ្សាក់ស្ថាន។ អាម៉េរិក បានអះអាងថា ខ្លួនកំពុងឃ្លាំមើលពីការបំពានសិទ្ធិមនុស្ស បន្ទាប់ពីរុស្ស៊ីបញ្ជូនទ័ពទៅកាហ្សាក់ស្ថាន។ ចំណែកអង់គ្លេសវិញ បានអំពាវនាវឱ្យអ្នកតវ៉ារក្សាភាពស្ងប់ស្ងៀម និងកុំប្រើហិង្សា ខណៈប្រមុខសិទ្ធិមនុស្សអង្គការសហប្រជាជាតិ លោកស្រី Michelle Bachelet បានជំរុញឱ្យគ្រប់ភាគីនៅកាហ្សាក់ស្ថានទាំងអស់ បញ្ចៀសអំពើហិង្សា និងស្វែងរកសេចក្តីសម្រេចប្រកបដោយសន្តិភាព៕