ពីមួយសប្តាហ៍ទៅមួយសប្តាហ៍ ព្រឹត្តិការណ៍អន្តរជាតិសំខាន់ៗ បានកើតឡើង។ ក្នុងសប្តាហ៍ថ្មីនេះ កូរ៉េខាងជើង បានបាញ់សាកល្បងមីស៊ីលជាថ្មី ដែលខ្លួនចាត់ទុកមីស៊ីលមានល្បឿនលឿនជាងសំឡេង។ ទន្ទឹមនេះ ប្រទេសមហាអំណាចនុយក្លេអ៊ែរទាំង ៥ បានឯកភាពទប់ស្កាត់ការរីកសាយការប្រើប្រាស់អាវុធនុយក្លេអ៊ែរ ដើម្បីបញ្ចៀសសង្រ្គាម។ ស្របគ្នាដែរ ជំងឺកូវីដ-១៩ ដែលបង្កដោយវីរុសអូមីក្រុង បានរីកសាយយ៉ាងខ្លាំងនៅលើពិភពលោក។
ថ្ងៃទី៣ ខែមករា
នាយករដ្ឋមន្រ្តីកូរ៉េខាងត្បូង Kim Boo-Kyum បានអំពាវនាវឱ្យមន្រ្តីរដ្ឋរក្សាអព្យាក្រឹតផ្នែកនយោបាយ និងគោរពវិន័យ ខណៈពេលប្រទេសនៅតំបន់អាស៊ីខាងកើតមួយនេះ ត្រៀមរៀបចំការបោះឆ្នោតជ្រើសរើសប្រធានាធិបតីនៅក្នុងខែមីនាខាងមុខ។ ផ្នែកយោធា ក៏ទទួលបានការណែនាំនេះដូចគ្នាដែរ។
មហាអំណាចពិភពលោកទាំង៥ បានចេញសេចក្ដីថ្លែងការណ៍រួមដ៏កម្រមួយ ដើម្បីទប់ស្កាត់ការរីកសាយនៃការប្រើប្រាស់អាវុធបរិមាណូ និងបញ្ចៀសជម្លោះនុយក្លេអ៊ែរ ខណៈភាពតានតឹងរវាងលោកខាងលិច និងលោកខាងកើតកំពុងតែកើតមាន។ មហាអំណាចទាំង៥ ឯកភាពមិនឱ្យមានសង្រ្គាមនុយក្លេអ៊ែរដែលនឹងមិនមានអ្នកឈ្នះឡើយ។
ថ្ងៃទី៤ ខែមករា
ទីក្រុងចិនមួយទៀត ត្រូវបានបិទខ្ទប់ក្រោយរកឃើញករណីឆ្លងជំងឺកូវីដ-១៩។ អាជ្ញាធរចិននៅទីក្រុងអ៊ីចូវ ក្នុងខេត្តហឺណាន បានប្រកាសមិនអនុញ្ញាតឱ្យប្រជាជនច្រើនជាង១លាននាក់ចាកចេញពីផ្ទះនោះទេ បន្ទាប់ពីបានរកឃើញករណីឆ្លងជំងឺកូវីដ-១៩ចំនួនតែបីករណីប៉ុណ្ណោះ។
ប្រធានប្រតិបត្តិហុងកុង អ្នកស្រី ការី ឡាំ បាននិយាយថា អ្នកស្រីមិនអាចទទួលយកបានការលើកឡើងដែលថា សិទ្ធិសេរីភាពសារព័ត៌មាននៅកុងហុងកំពុងទទួលការគំរាម និងជិតបាត់បង់ទាំងស្រុង។ លោកស្រីក៏ច្រានការរិះគន់បែបនេះដែលកើតឡើង បន្ទាប់ពីប៉ូលិសបានឆ្មក់ចូល ការិយាល័យសារព័ត៌មានជាបន្តបន្ទាប់។
ថ្ងៃទី៥ ខែមករា
អ្នកតំណាងជាន់ខ្ពស់ទទួលបន្ទុកកិច្ចការបរទេសអឺរ៉ុប Josep Borrell ព្រមានថា រុស្ស៊ីនឹងរងផលវិបាកធ្ងន់ធ្ងរ ប្រសិនបើហ៊ានវាយប្រហារលើអ៊ុយក្រែន។ មន្រ្តីជាន់ខ្ពស់របស់អឺរ៉ុបរូបនេះ ក៏បានយល់ឃើញថា គ្មានឡើយសន្តិសុខនៅអឺរ៉ុប ប្រសិនបើសន្តិសុខនៅអ៊ុយក្រែនស្ថិតក្រោមការគំរាម។
មីស៊ីលដែលបាញ់ ជាមីស៊ីលល្បឿនលឿនជាងសំឡេង។ ទីភ្នាក់ងារព័ត៌មានកូរ៉េខាងជើង បានអះអាងថា កាសាកល្បងនោះ ទទួលជោគជ័យផងដែរ។
ថ្ងៃទី៦ ខែមករា
រដ្ឋមន្រ្តីការបរទេសជប៉ុន ហាយ៉ាស៊ី យូស៊ីម៉ាសា បានជំរុញឱ្យសមភាគីអាម៉េរិក រឹតបន្តឹងការចល័តទ័ពអាម៉េរិកនៅជប៉ុន ដើម្បីទប់ស្កាត់ការរាលដាលនៃជំងឺកូវីដ-១៩ នៅក្នុងមូលដ្ឋាលើកោះអូគីណាវ៉ា ក៏ដូចជាសហគមន៍នៅជុំវិញនោះ។ ការអំពាវនាវរបស់ប្រមុខការទូតជប៉ុន ធ្វើឡើងបន្ទាប់ពីមានករណីឆ្លងជំងឺកូវីដ-១៩ ផ្ទុះឡើងជាចង្កោមនៅមូលដ្ឋានយោធាអាម៉េរិកនៅជប៉ុន។
ក្រោយបរាជ័យបង្ក្រាបបាតុកម្មទាក់ទិនរឿងប្រេងសាំងឡើងថ្លៃ ប្រធានាធិបតីកាហ្សាក់ស្ថាន លោក Kassym-Jomart Tokayev បានស្នើរសុំជំនួយពីប្លុកសន្តិសុខក្នុងតំបន់ដែលដឹកនាំដោយរុស្ស៊ី។ ក្រោយការស្នើសុំពីសំណាក់លោកប្រធានាធិបតី កងឆត្រយោងរុស្ស៊ី បានទៅកាហ្សាក់ស្ថានហើយ ក្រោមបេសកកម្ម «រក្សាសន្តិភាព»។
ថ្ងៃទី៧ ខែមករា
គណៈកម្មាធិការតំណាងសភាមីយ៉ាន់ម៉ា (CRPH) ដែលតំណាងឱ្យសមាជិកសភាជាប់ឆ្នោត បានអំពាវនាវឱ្យសម្តេច ហ៊ុន សែន ប្រធានផ្លាស់វេនអាស៊ាន គោរពសេចក្តីប្រាថ្នា និងកិច្ចខិតខំរបស់ប្រជាជនមីយ៉ាន់ម៉ា សម្រាប់ប្រជាធិបតេយ្យ។ ក្រុមសមាជិកសភាដែលជាប់ឆ្នោតក្នុងខែវិច្ឆិកា ឆ្នាំ២០២០ អះអាងថាវិបត្តិមីយ៉ាន់ម៉ាថ្ងៃនេះកើតចេញពីលទ្ធផលដោយផ្ទាល់ ពីការក្តាប់អំណាចដោយលោក មីន អ៊ុងឡាំង និងក្រុមយោធា។
កូរ៉េខាងជើង បានសរសេរលិខិតមួយផ្ញើឱ្យចិនដោយបញ្ជាក់ពីអវត្តមានរបស់ខ្លួនសម្រាប់ព្រឹត្តិការណ៍អូឡាំពិកខែកុម្ភៈខាងមុខ។ ក្នុងលិខិតដែលផ្សាយដោយប្រព័ន្ធផ្សព្វផ្សាយរដ្ឋ ទីក្រុងព្យុងយ៉ាង បានទម្លាក់កំហុសលើទង្វើអរិភាពរបស់អាម៉េរិក និងការរាលដាលជំងឺកូវីដ-១៩។
ថ្ងៃទី៨ ខែមករា
ពលរដ្ឋបារាំងជាង១០ម៉ឺននាក់ ធ្វើបាតុកម្មទូទាំងប្រទេស ដើម្បីប្រឆាំងគម្រោងរបស់រដ្ឋាភិបាលប្រធានាធិបតី អេម៉ានុយអែល ម៉ាក្រុង ក្នុងការចាត់វិធានការលើអ្នកមិនបានទទួលវ៉ាក់សាំងបង្ការជំងឺកូវីដ-១៩ ។ អ្នកតវ៉ាខ្លះ ថែមទាំងនិយាយវាយប្រហារលោក ម៉ាក្រុង ចំពោះការប្រើពាក្យសម្ដីធ្ងន់ៗរបស់លោកទៀតផង។
រុស្ស៊ី បង្ហាញការខឹងសម្បារជាខ្លាំង បន្ទាប់ពីប្រមុខការទូតអាម៉េរិក អាន់តូនី ប្លីងខិន និយាយដៀមដាមការបញ្ជូនទ័ពទៅកាន់កាហ្សាក់ស្ថានដែលកំពុងរួមរឹតដោយបាតុកម្ម។ បើតាមក្រសួងការបរទេសរុស្ស៊ី យោធាអាម៉េរិកនោះទៅវិញទេដែលដើរជ្រៀតជ្រែកប្រទេសដទៃ។