សៀវភៅ «កម្ពុជាក្នុងនាមជាប្រធានប្តូរវេនអាស៊ាន៖ ការឆ្លើយតបនឹងទស្សនៈប្រឈម និងការពង្រឹងប្រសិទ្ធភាពកិច្ចការតំបន់» ត្រូវបានវិទ្យាស្ថានខ្មែរសម្រាប់សហប្រតិបត្តិការ និងសន្តិភាពសម្ពោធជាផ្លូវការ នាសណ្ឋាគារ Raffles Hotel Le Royal ។ សៀវភៅមួយក្បាលនេះ ត្រូវបានបោះពុម្ភឡើង ដើម្បីបង្ហាញ និងផ្តល់ជាគំនិតដល់បុគ្គលពាក់ព័ន្ធ អ្នកធ្វើគោលនយោបាយ មន្រ្តីទូត អ្នកសិក្សាស្រាវជ្រាវ និងសាធារណជនទូទៅជាដើម។ 

 

«ខ្ញុំរីករាយបង្ហាញថា សៀវភៅមួយក្បាលនេះ ត្រូវបានចងក្រងឡើងយ៉ាងម៉ត់ចត់ ជុំវិញបញ្ហាកើតឡើងនាពេលថ្មីៗ នៅក្នុងតំបន់ និងពិភពលោក»។ លោកសុធីរៈ បានសង្កត់ធ្ងន់បែបនេះ មុនបន្តថា ការវិវដ្តសន្តិសុខនៅក្នុងតំបន់ តម្រូវឱ្យអាស៊ាន ត្រូវតែប្រុងយ័ត្នខ្ពស់ ដើម្បីគ្រប់គ្រងបញ្ហាប្រឈម និងត្រូវគោរពតាមមាគ៌ាអាស៊ាន ក្នុងការកែលម្អផលប្រយោជន៍សន្តិសុខរយៈពេលវែង។ 

 

នាយកប្រតិបត្តិវិទ្យាស្ថានខ្មែរសម្រាប់សហប្រតិបត្តិការ និងសន្តិភាព បានបន្ថែមថា លោកមានជំនឿលើសមត្ថភាពរបស់រដ្ឋាភិបាលកម្ពុជា ក្នុងអភិវឌ្ឍទំនាក់ទំនងនៅក្នុងតំបន់អាស៊ាន ដោះស្រាយបញ្ហាឆ្លងតំបន់ និងបញ្ហាមិនមែនប្រពៃណី ដូចជាបរិស្ថាន ការបម្រែបម្រួលអាកាសធាតុ ដែលអាចគំរាមកំហែងដល់សន្តិភាព និងស្ថិរភាព។ 

 

ក្នុងពិធីដដែលនោះ លោក Kavi Chongkittavorn សហអ្នកនិពន្ធសៀវភៅម្នាក់ បានជំរុញឱ្យអាស៊ានបន្តអនុវត្តសន្ធិសញ្ញាមិត្តភាព និងកិច្ចសហប្រតិបត្តិការ (TAC) ដែលត្រូវបានបង្កើតឡើងក្នុងឆ្នាំ ១៩៧៦ ដើម្បីដោះស្រាយបញ្ហាផ្ទៃក្នុងដូចជាបញ្ហានៅមីយ៉ាន់ម៉ា និងបង្កើនកិច្ចសហប្រតិបត្តិការទប់ស្កាត់ជំងឺឆ្លងកូវីដ-១៩។ ក្នុងជំពូកទី៣ លោក Kavi បានលើកឡើងពីតួនាទីរបស់អាស៊ានក្នុងការរក្សាសន្តិភាព និងសន្តិសុខ។

 

ចំណែកលោកស្រី Charmaine Misalucha-Willoughby សហនិពន្ធសៀវភៅមួយរូបទៀត បានលើកឡើងពី ការប្តេជ្ញាចិត្តរបស់សមាជិកអាស៊ានចំពោះ«ម៉ាគ៌ាអាស៊ាន» ក៏ដូចជាភាពចាំបាច់របស់ «មាគ៌ាអាស៊ាន» ក្នុងការដោះស្រាយបញ្ហាសមុទ្រចិនខាងត្បូង រួមទាំងការរក្សាស្ថិរភាពនៅក្នុងតំបន់។

 

តាមរយៈការបោះពុម្ភនេះ បុគ្គលពាក់ព័ន្ធ ក៏ដូចជាអ្នកធ្វើគោលនយោបាយ និងអ្នកផ្សេងទៀត អាចទទួលបានចំណុចណែនាំចំនួន៣ធំៗ ដូចជា ភាចចាំបាច់នៃមជ្ឈភាពអាស៊ានក្នុងបរិបទការប្រកួតប្រជែងភូមិសាស្រ្តនយោបាយ, សារសំខាន់នៃកិច្ចសហប្រតិបត្តិការក្រោមសសរស្តម្ភទាំងបី របស់អាស៊ាន និងការទូតសាធារណៈនៅក្នុងបរិបទអាស៊ាន។ 

សូមបញ្ជាក់ថា « កម្ពុជាក្នុងនាមជាប្រធានប្តូរវេនអាស៊ាន៖ ការឆ្លើយតបនឹងទស្សនៈប្រឈម និងការពង្រឹងប្រសិទ្ធភាពកិច្ចការតំបន់»  ត្រូវបានសម្ពោធស្របពេលខួបលើកទី៥៥ នៃការបង្កើតអាស៊ាន ដោយមានចំនួន១០ជំពូក និងចំណុចចំនួន២ផ្សេងទៀត។ ក្នុងនោះ អ្នកជំនាញ បានលើកឡើងពី មជ្ឈភាពអាស៊ាន បញ្ហាប្រឈមរបស់កម្ពុជាក្នុងនាមជាសមាជិកអាស៊ាន និងប្រធានផ្លាស់វេនអាស៊ាន បញ្ហាសមុទ្រចិនខាងត្បូង រួមទាំងក្រមប្រតិបត្តិសមុទ្រចិនខាងត្បូង និងអត្តសញ្ញាណអាស៊ានជាដើម៕