កីឡាករ Barca ដែលបំប៉ោងសំណាញ់ទី Real Madrid មានកីឡាករ Luuk de Jong នៅនាទី៤១ និងកីឡាករ Ansu Fati នាទី៨១។ ៣គ្រាប់របស់ Real Madrid ធ្វើបានដោយកីឡាករកំពុងឡើងជើង Vinicius Junior នាទី ២៥ Karim Benzema នាទី៧២ និងគ្រាប់ជ័យជម្នះធ្វើបានដោយ Federico Valverde នាទី៩០+៨ ក្នុងម៉ោងបន្ថែម១៥នាទីវគ្គទីមួយ។
 

ជាមួយភ្លាត់ស្នៀតចាញ់ក៏ដូចជារបូតពានរង្វាន់លើកដំបូងបន្ទាប់ពីមកដឹកនាំបែបនេះ គ្រូបង្វឹកវ័យ៤១ឆ្នាំក៏បានបង្ហាញអារម្មណ៍ពេញចិត្តយ៉ាងខ្លាំងចំពោះទម្រង់លេងរបស់ក្រុមហើយមានមោទនភាពខ្លាំង។
 

«ខ្ញុំគិតថាយើងធ្វើបានល្អជាង Madrid ក្នុងការលេងបាល់ គ្របដណ្តប់លើពួកគេ ហើយយើងបានគ្រប់គ្រងការប្រកួតបានយ៉ាងល្អ។ ខ្ញុំសប្បាយចិត្តព្រោះយើងកំពុងដើរផ្លូវត្រូវឡើងវិញហើយទៅកាន់ភាពខ្លាំងក្លា។»Xavi បាននិយាយប្រាប់ទូរទស្សន៍ Movistar បែបនេះក្រោយចប់ប្រកួត។
 

ថ្វីបើ Xavi លើកសរសើរទៅដល់កូនក្រុមធ្វើបានយ៉ាងល្អក្តី លោកក៏នៅតែដាសតឿនកូនក្រុមឱ្យបន្តប្រឹងប្រែងបន្ថែមទៀត ហើយថាការចាញ់ Madrid លើកនេះពិតជាឈឺចាប់ខ្លាំង។

«ចាញ់ Madrid ធ្វើឱ្យខ្ញុំឈឺចាប់ខ្លាំងពិតមែន វាមិនមែនជាលទ្ធផលយើងចង់បានឡើយ។ ប្រកួតបន្ទាប់យើងត្រូវឈ្នះ ហើយត្រូវផ្តោតការគិតសម្រាប់ការប្រកួតប្រជែងគម្រិតខ្ពស់បែបនេះ។» Xavi បានបន្ថែមបែបនេះ៕