នៅរសៀលថ្ងៃទី១៤ ខែមករា អគ្គសេនាធិការចម្រុះកូរ៉េខាងត្បូង បានចាប់សញ្ញាមីស៊ីលចំនួនពីរគ្រាប់ ដែលកូរ៉េខាងជើងបានបាញ់។ ការបាញ់មីស៊ីលចំនួនពីរគ្រាប់នោះ ធ្វើឡើងបន្ទាប់ពីក្រុងព្យុងយ៉ាងរងទណ្ឌកម្មជាថ្មី ពីសំណាក់រដ្ឋាភិបាលក្រុងវ៉ាស៊ីនតោន។ 

 

តាមការចុះផ្សាយទីភ្នាក់ងារព័ត៌មាន KCNA កូរ៉េខាងជើង បានសាកល្បងបាញ់មីស៊ីលនៅខេត្ត North Pyongan ដែលមានព្រំដែនជាប់ជាមួយចិន ដើម្បីត្រួតពិនិត្យ និងវាយតម្លៃពីប្រសិទ្ធភាពនៃប្រព័ន្ធបាញ់មីស៊ីលចេញពីផ្លូវរថភ្លើង។ នេះជាការបាញ់មីស៊ីលចេញពីរថភ្លើងលើកដំបូងរបស់កូរ៉េខាងជើង បើគិតចាប់ពីខែកញ្ញា ឆ្នាំ២០២១។ 

 

ទីភ្នាក់ងារព័ត៌មានដដែល បានបន្តថា មីស៊ីលទាំងពីរគ្រាប់នោះ បានវាយប្រហារចំគោលដៅ នៅក្នុងសមុទ្រខាងកើតរបស់កូរ៉េ។ យោធាកូរ៉េខាងត្បូង នៅថ្ងៃទី១៤ ខែមករា បានអះអាងថា មីស៊ីលចំនួនពីរគ្រាប់ បានហោះចេញពីខេត្ត North Pyongan ដោយហោះបានប្រមាណ ៤៣០គីឡូម៉ែត្រ ក្នុងរយៈកម្ពស់ ៣៦គីឡូម៉ែត្រ និងល្បឿន Mach 6 ឬមានល្បឿនលឿនជាងសំឡេង ៦ដង៕