លោកយាយវ័យ ៨៦ឆ្នាំមួយរូប ដែលបានទទួលវ៉ាក់សាំងបង្ការជំងឺកូវីដ-១៩ Pfizer ចំនួន ២ដូស បានទទួលមរណភាព បន្ទាប់ពីឆ្លងវីរុសបំប្លែងខ្លួនអូមីក្រុង។ នេះជាករណីស្លាប់លើកដំបូងនៅក្នុងប្រទេសថៃ ដោយសារវីរុសអូមីក្រុង។ 

 

ពាក់ព័ន្ធនឹងករណីស្លាប់នេះ មន្រ្តីសុខាភិបាលខេត្តSongkhla បានអះអាងថា ស្រ្តីរូបនេះ មានជំងឺវ័យជរា និងអាចឆ្លងវីរុសអូមីក្រុងពីចៅប្រុសរបស់ខ្លួន។ ចៅប្រុសនោះ បានចេញលទ្ធផលវិជ្ជមាននៃជំងឺកូវីដ-១៩ បន្ទាប់ពីត្រលប់មកពីខេត្តភូកេត។ លោកយាយ បានទទួលមរណភាពនៅថ្ងៃទី១២ ខែមករា និងមានលទ្ធផលឆ្លងវីរុសអូមីក្រុង។ 

 

មកទល់ពេលនេះ ករណីឆ្លងវីរុសអូមីក្រុង នៅថៃ មានជាច្រើនពាន់ករណី។ គិតត្រឹមថ្ងៃទី១០ ខែមករា ថៃ មានករណីឆ្លងអូមីក្រុងសរុបជាង ៥ពាន់ករណី។ ករណីឆ្លងជំងឺកូវីដ-១៩ សរុបនៅថៃមានចំនួនជាង ២,៣លានករណី និងអ្នកស្លាប់មានជាង ២ម៉ឺននាក់។ 

 

ទន្ទឹមនេះ ថៃបានផ្តល់វ៉ាក់សាំងបង្ការជំងឺកូវីដ-១៩ សរុបចំនួន ១០៣លានដូស ដល់ប្រជាជនខ្លួន ខណៈប្រជាជនថៃចំនួន ៤៥,៥ លាននាក់ បានទទួលវ៉ាក់សាំងចំនួន ពីរដូស៕