កីឡាជាតិ
ជាតិ
ណាហ្គាខបជួបប្រកួតមិត្តភាពជាមួយ BEC Tero Sasana នាម៉ោង៤ល្ងាចនេះ
× បាងកក៖ ក្លិបម្ចាស់ការពារតំណែងជើងឯកពានរង្វាន់សម្តេច ហ៊ុន សែន ណាហ្គាខប នឹងត្រូវប្រកួតមិត្តភាពកម្តៅសាច់ដុំជាមួយក្លិប BEC Tero Sasana FC នៃក្របខណ្ឌ Thai Premier League នាវេលាម៉ោង៤ល្ងាចនេះនៅកីឡដ្ឋាន Chalerm Phrakiat 72nd Stadium ក្នុងទីក្រុងបាងកក ប្រទេសថៃ។
លោក ប្រាក់ សុវណ្ណារ៉ា ដែលបច្ចុប្បន្នមានតួនាទីជាទីប្រឹក្សាបច្ចេកទេសរបស់ក្លិបណាហ្គាខប និងជាគ្រូបង្វឹកបណ្តោះអាសន្នសម្រាប់ការប្រកួតមិត្តភាពនេះ បានឲ្យដឹងថា នេះជាការប្រកួតមួយដ៏សំខាន់របស់ណាហ្គាខប ក្នុងការត្រៀមខ្លួនការពារតំណែងជើងឯកពានរង្វាន់សម្តេច ហ៊ុន សែន និងការប្រកួតក្របខណ្ឌកំពូលមិត្តហ្វូនខេមបូឌានលីក នាពេលខាងមុខ។
«លទ្ធផលឈ្នះចាញ់មិនសំខាន់នោះឡើយ ប៉ុន្តែបើឈ្នះរឹតតែប្រសើរ» នេះជាការលើកឡើងរបស់លោក ប្រាក់ សុវណ្ណារ៉ា។ លោកបានអះអាងថា នេះជាលើកទីមួយហើយដែលណាហ្គាខបចេញមកប្រកួតនៅក្រៅប្រទេសជាមួយក្លិបនៅក្នុងក្របខណ្ឌកំពូលរបស់ថៃ ដោយមានកីឡាករប្រមាណជាង២០នាក់។
លោក បានបន្ថែមថា ណាហ្គាខបនឹងប្រើការប្រកួតនេះដើម្បីវាស់ស្ទង់កម្រិតសមត្ថភាពកីឡាករបរទេសសម្រាប់ពានរង្វាន់លីក និងក្រុមកីឡាករខ្មែរសម្រាប់ពានរង្វាន់សម្តេច ហ៊ុន សែន។ លោកបានបញ្ជាក់ថា៖ «ខ្ញុំរីករាយណាស់ដែលយើងមានឱកាសចេញមកធ្វើតេស្តិ៍សមត្ថភាពកីឡាករបរទេសនៅថៃ។ មានកីឡាករកូរ៉េខាងត្បូង២នាក់ កីឡាករជប៉ុន១នាក់ និងកីឡាករអាហ្វ្រិកប្រហែល៥នាក់ទៀត ចង់ក្លាយជាសមាជិកថ្មីរបស់ណាហ្គាខប ដូច្នេះខ្ញុំនឹងដាក់ពួកគេឲ្យលេងក្នុងតង់ទីមួយ។ សម្រាប់តង់ទីពីរ ខ្ញុំនឹងដាក់កីឡាករខ្មែរទាំងអស់ដោយពួកគេគឺឈុតដែលត្រូវលេងក្នុងពានរង្វាន់សម្តេច ហ៊ុន សែន»។
ក្លិប BEC Tero Sansana FC ដែលដឹកនាំដោយគ្រូបង្វឹកប្រេស៊ីល José Alves Borges បានបញ្ចប់ក្នុងចំណាត់ថ្នាក់លេខ៧ក្នុងក្របខណ្ឌ Thai Premier League កាលពីរដូវកាលមុន។ កីឡដ្ឋានរបស់ក្លិបមួយនេះអាចផ្ទុកអ្នកទស្សនាប្រមាណ១២៥០០នាក់៕
© រក្សាសិទ្ធិដោយ thmeythmey.com