គណៈរដ្ឋមន្រ្តីថៃ នៅថ្ងៃទី១៥ ខែកុម្ភៈ បានឯកភាពជាគោលការណ៍លើសេចក្តីប្រកាស របស់ការិយាល័យ នាយករដ្ឋមន្រ្តីជុំវិញបញ្ជីឈ្មោះ ដែនដី តំបន់រដ្ឋបាល និងទីក្រុង ក្រោមការស្នើសុំដោយការិយាល័យសង្គមថៃ(ORST)។ ក្នុងការកែប្រែថ្មី រាជធានីថៃ ត្រូវហៅថា «ក្រុងទេពមហានគរ» (Krung Thep Maha Nakhon) សម្រាប់ប្រើផ្លូវការ ប៉ុន្តែឈ្មោះ «បាងកក» នៅតែបានដដែល។ នេះបើតាមការចុះផ្សាយរបស់សារព័ត៌មាន The Nation។

 

សេចក្តីប្រកាស ដែលត្រូវបានអនុម័តដោយគណៈរដ្ឋមន្រ្តីថៃ បានបញ្ជាក់ថា ការិយាល័យសង្គមថៃបានស្នើឱ្យធ្វើបច្ចុប្បន្នភាពឈ្មោះប្រទេស,​ ទីក្រុង និងតំបន់រដ្ឋបាលមួយចំនួនពីការហៅបែបបរទេស ទៅជាការហៅបែបថៃវិញ។ 
 

ក្នុងសំណើនោះ ឈ្មោះរាជធានីរបស់ថៃខ្លួនឯង ក៏ត្រូវហៅថាក្រុងទេពមហានគរវិញ។ តាមរយៈបណ្តាញសង្គម Facebook ថ្ងៃទី១៥ ខែកុម្ភៈ ការិយាល័យសង្គមថៃបានបញ្ជាក់យ៉ាងច្បាស់ថា ទាំងក្រុងទេពមហានគរ ទាំងបាងកក នៅតែអាចប្រើប្រាស់បានដូចគ្នានៅពេលហៅសំដៅឈ្មោះរាជធានីថៃ។ 
 

កាលពីឆ្នាំ២០០១ ស្ថាប័នដដែលនេះ បានកែការហៅឈ្មោះរាជធានីថៃទៅជាបាងកក។ តាមពិតទៅ ថៃ ក៏សរសេរ និងហៅឈ្មោះរាជធានីតាមភាសារបស់ខ្លួនថា ក្រុងទេពមហានគរ យូរមកហើយដែរ ឯពាក្យបាងកក (Bangkok) ត្រូវបានហៅ និងសរសេរតាមភាសាបរទេស។
 

គណៈកម្មការ ORST មានភារៈត្រួតពិនិត្យឈ្មោះតំបន់ ហើយមានសមាជិកមកពីផ្នែកភាសាវិទ្យា និងតំណាងក្រសួងការបរទេស ដើម្បីដាក់សំណើទៅការិយាល័យនាយករដ្ឋមន្រ្តីសម្រាប់ការអនុម័តពីគណៈរដ្ឋមន្រ្តី។ ក្នុងការកែប្រែឈ្មោះតំបន់នេះលើ ថៃក៏បានអនុម័តឱ្យហៅក្រុងរ៉ូមរបស់អ៊ីតាលីទៅជារ៉ូមា (Roma), រដ្ឋធានីយ៉ាំងហ្គោន ទៅណៃពិដោ, រាជាណាចក្រនេប៉ាល់ ត្រូវប្តូរជាសាធារណរដ្ឋសហព័ន្ធប្រជាធិបតេយ្យនេប៉ាល់ដែរ។ ចំណែករដ្ឋបាឡេស្ទីន ដែលមិនទាន់ទទួលស្គាល់ដោយអង្គការសហប្រជាជាតិ ត្រូវបានថៃដាក់បញ្ចូលក្នុងបញ្ជីប្រទេសផងដែរ។ 
 

យ៉ាងណាមិញ ឈ្មោះក្រុងទេពមហានគរនេះ មិនទាន់ចូលជាធរមានឡើយ ព្រោះត្រូវរង់ចាំការត្រួតពិនិត្យពីគណៈកម្មាធិការគ្រប់គ្រងសេចក្តីព្រាងច្បាប់ និងការអង្កេតបន្ថែមពីក្រសួងការបរទេសថៃសិន៕