ភ្នំពេញ៖ បច្ចុប្បន្នតម្លៃប្រេងឥន្ធនៈនៅលើទីផ្សារកម្ពុជា បានហក់ដល់៥២០០រៀលសម្រាប់សាំងស៊ុបពែរ និង៤៧០០រៀលសម្រាប់សាំងធម្មតា។ បើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច ទោះបីតម្លៃប្រេងទាំងនេះឡើងថ្លៃ ក៏រដ្ឋាភិបាលមិនអាចបញ្ចុះតម្លៃពន្ធក្នុងការនាំចូលប្រេងឥន្ធនៈបានឡើយ។ លោកបានបញ្ជាក់ថា ពន្ធពីការនាំចូលប្រេងឥន្ធនៈ គឺជាចំណូលធំមួយសម្រាប់ទ្រទ្រង់សេដ្ឋកិច្ចជាតិ ខណៈរដ្ឋាភិបាលកំពុងចំណាយប្រមាណ៣០លានដុល្លារក្នុងមួយខែនៅក្នុងសេវាគាំពារសង្គម រួមទាំងចំណាយចាំបាច់ផ្សេងៗទៀត។
ប្រជាពលរដ្ឋ ជាពិសេសអ្នកប្រកបមុខរបបក្នុងសេដ្ឋកិច្ចក្រៅប្រព័ន្ធ ដូចជាអ្នករត់ម៉ូតូឌុប ឬកង់បី...ជាដើម កំពុងរងផលប៉ះពាល់ពីតម្លៃប្រេងឥន្ទនៈ ដែលបន្តឡើងថ្លៃឥតឈប់ឈរ។ ចំពោះការលំបាកនេះត្រូវបានលោក វង្សី វិស្សុត ទទួលស្គាល់ ផងដែរ។ ដ្បិតថា រដ្ឋលេខាធិការក្រសួងសេដ្ឋកិច្ចរូបនេះ ទទួលស្គាល់ក៏ពិតមែន ប៉ុន្តែលោកថា ជាគោលនយោបាយជាតិ ការបញ្ចុះពន្ធលើប្រេងឥន្ធនៈ មិនទាន់ជាជម្រើសល្អទេ ព្រោះធ្វើឱ្យចំណូលជាតិធ្លាក់ចុះ ខណៈរដ្ឋកំពុងរងសម្ពាធចំណាយ។
ដើម្បីជ្រាបច្បាស់សូមស្តាប់ប្រសាសន៍របស់លោក វង្សី វិស្សុត ខាងក្រោមដូចតទៅ៖
លោក វង្សី វិស្សុត បានថ្លែងក្នុងវេទិកាសាធារណៈស្តីពី«ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិ» នាថ្ងៃទី១៨កុម្ភៈ ដូច្នេះ ៖ «ប្រសិនបើបញ្ចុះពន្ធបន្តទៅទៀត តើអ្នកក្រឬអ្នកប្រកបមុខរបរក្នុងសេដ្ឋកិច្ចប្រព័ន្ធហ្នឹង អាចធានាដល់ពួកគាត់រកស៊ីបានទៀតឬអត់? ឬយ៉ាងណា? ព្រោះកាលណា បញ្ចុះពន្ធ គឺធ្វើឱ្យប្រាក់ចំណូលថវិកាជាតិធ្លាក់។ ត្រូវដឹងថា ការបញ្ចុះពន្ធអ្វីមួយត្រូវទាក់ទងនឹងការធ្លាក់នៃសេដ្ឋកិច្ច»។ លោក បានសង្កត់ធ្ងន់ថា ប្រភពសម្រាប់ថវិកាជាតិ គឺធំណាស់បានពីផ្នែកពន្ធ។
ពាក់ព័ន្ធនឹងប្រេងឥន្ធនៈឡើងថ្លៃនេះ គឺជានិន្នាការរួម និងសកលដែលធ្វើឱ្យប៉ះពាល់ដល់គ្រប់គ្នា។ លោក វង្សី វិស្សុត បន្តលើកឡើងថា ដើម្បីទប់ស្កាត់នូវការឡើងថ្លៃនៃប្រេងឥន្ធនៈហួសប្រមាណ រដ្ឋាភិបាលគឺបានកំណត់អត្រាពន្ធមួយថេរ សម្រាប់សម្រួលដល់ជីវភាពប្រជាពលរដ្ឋ។
«រដ្ឋបានកំណត់ទំហំពន្ធច្បាស់លាស់ណាស់។ ដាក់តម្លៃជាមូលដ្ឋានមួយ បើទោះបីជាតម្លៃប្រេង[នាំចូលពីទីផ្សារអន្តរជាតិ] ឡើង-ចុះប៉ុន្មានក៏ដោយ គឺវានៅហ្នឹងរហូត។ ប្រេងឡើងថ្លៃដើមមែន ប៉ុន្តែពន្ធ គឺអត់ឡើងទេ! ប្រេងចុះមែន ប៉ុន្តែពន្ធអត់ចុះទេ!»។ នេះជាការបញ្ជាក់របស់លោក វង្សី វិស្សុត ដែលរដ្ឋាភិបាលកំពុងអនុវត្តសព្វថ្ងៃលើពន្ធនាំចូលប្រេងឥន្ធនៈ ដោយបានបន្ថែមថា លើសពីនេះទៅទៀត រដ្ឋាភិបាលតាមរយៈក្រសួងពាណិជ្ជកម្ម បានតាមដានការលក់រាយប្រចាំខែ ដើម្បីកំណត់ថ្លៃប្រេងឥន្ធនៈលក់នៅតាមស្ថានីយនីមួយៗ កុំឱ្យមានកេងបន្លំផ្សេង និងឡើងចុះ ជាដើម។ បើតាមលោក វង្សី វិស្សុត យន្តការទាំងនេះ គឺជាចំណែកមួយយ៉ាងធំរបស់រដ្ឋក្នុងការដោះស្រាយបញ្ហានៃការឡើងថ្លៃប្រេងឥន្ធនៈនេះ។
លោកបានបន្តរៀបរាប់ដូច្នេះ៖ «យើងយល់ហើយការលំបាករបស់អ្នករកស៊ី អ្នកក្រីក្រ។ ប៉ុន្តែយើងខ្វះចំណូល! យើងមិនមែនខ្វះចំណូលតែអ្នករកស៊ី ពាក់ព័ន្ធនឹងប្រេងទេ យើងខ្វះចំណូលទៅចំណាយសម្រាប់ទ្រទ្រង់អ្នកក្រផ្សេងទៀតរាប់លាននាក់ ដែលយើងកំពុងឧបត្ថម្ភ»។ រដ្ឋលេខាធិការក្រសួងសេដ្ឋកិច្ចរូបនេះ បានបញ្ជាក់ថា៖ «ឥឡូវនេះយើងកំពុងជួយអ្នកក្រីក្រមួយខែៗ ប្រមាណ៣០លានដុល្លារ។ ចុះបើបន្ថយពន្ធប្រេងហ្នឹង តើបានលុយឯណា[ទៅជួយអ្នកក្រ]? [...]ក្រៅពីហ្នឹង យើងនៅដោះស្រាយបញ្ហាកូវីដ-១៩ និងរឿងផ្សេងៗទៀត ដែលយើងកំពុងរងនូវសម្ពាធចំណាយ! តើយើងបានលុយពីណាដើម្បីដោះស្រាយ?»។
សម្រាប់អ្នកជំនាញសេដ្ឋកិច្ចរូបនេះ ការដោះស្រាយលើបញ្ហាប្រេងឥន្ធនៈត្រូវមានកម្រិតមួយសម្រាប់អ្នករកស៊ីដែលពាក់ព័ន្ធនឹងប្រេងឥន្ធនៈនេះ ប៉ុន្តែគឺមិនមែនតាមរយៈការបន្ថយពន្ធនោះទេ។ លោកបាននិយាយថា នេះជាជម្រើសគោលនយោបាយមួយដ៏ពិបាក ហើយលោកជឿថា សភាពការណ៍នាពេលបច្ចុប្បន្ននេះ ការបន្ថយពន្ធលើប្រេងឥន្ធនៈមិនទាន់ជាជម្រើសល្អ ជាងការឧបត្ថម្ភប្រាក់ដល់អ្នកដែលលំបាក និងអ្នកដែលងាយរងគ្រោះនោះទេ។
បើតាមលោក វង្សី វិស្សុត សម្រាប់ឆ្នាំ២០២២ រដ្ឋាភិបាលគ្រោងចំណាយជាង១០០០លានដុល្លារ។ ក្នុងនោះ ការរៀបចំធ្វើជាម្ចាស់ផ្ទះនៃកិច្ចប្រជុំអាស៊ាន កម្ពុជាគ្រោងចំណាយពី៤០ទៅ៥០លានដុល្លារ , ការបោះឆ្នោតឃុំ-សង្កាត់ គ្រោងចំណាយ៧០លានដុល្លារ រួមទាំងចំណាយលើសុខភាពសាធារណៈ និងសេវាគាំពារសង្គម ផ្សេងៗជាដើម។
សូមជម្រាបថា កាលឆ្នាំ២០២១ អគ្គនាយកដ្ឋានគយនិងរដ្ឋាករកម្ពុជា ប្រមូលចំណូលពន្ធពីការនាំចូលប្រេងឥន្ធនៈ បានជិត២៥០លានដុល្លារ៕